2 Mikoka 2 - Tonga Bible 1986

Solomoni wapangana ndi Hiramu za milimu yakasopi

¹ Sono Solomoni wangufikapo pa fundu yakuzenge zina la Ambuya nyumba yakupaturika, ndiso nyumba yake ya ufumu wake.

² Ndipo Solomoni wangulemba ŵanthu vikwi machumi ghankhonde ndi ghaŵi (70,000) ŵakupinga katundu, ndi vikwi machumi ghankhonde ndi ghatatu (80,000) kukumba mya mu mapiri, ndi vikwi vitatu pachanya machumi pe chumi ghankhonde ndi limoza (3,600) kuŵa ŵakulereska ŵanchitu.

³ Solomoni wangutuma mazu kwaku Hiramu, karonga waku Turo kuti, “Nge ndimo munguchitiya ndi Davidi ada ndi kuŵatumiya miti ya milanji yakuzenge myumba yawo yakujamo, viyo ndimo muchitiye ndi ine.

⁴ Awonani sono nde pafupi kuzenge zina la Ambuya Chiuta wangu nyumba ndi kuyipaturiya kwaku Iyo kochiyamo vyakununkhira, vyachema chamampha paurongo pake, ndiso hakuperekiyamo ruturuta mpasku wa chiŵande-chakulongo, ndi yakuperekiyamo sembe zakocha ndi mlenji ndiso ndi mazulo, pa masabata ndi pa kuŵalika kwa mwezi, ndi madghera ghakunozgeka gha Ambuya Chiuta widu, nge ndimo ghakumikikiya Yisraele muyaya.

⁵ Ndipo nyumba yo ndi kazenganga yiŵenge yikuru, chifukwa Chiuta widu ndi mkuru kuruska ŵachiuta wose,

⁶ kweni ndiyani wangaziŵa kumzenge nyumba, pakuti machanya, chingana ndi machanya ukongwa kuti ghatumukwana cha? Ndine yani ine kuti ndimzenge nyumba, kweni malo ghakochiyapo vyakunumkhira paurongo pake ndigho?

⁷ Viyo munditumiye munthu yo ngwakuziŵa dongosolo la mlimu wa golide, ndi siliva, mkuŵa, ndi visulo, thonje lakufyuŵara, ndi liyera, ndi lifipa nge ndi mtambo, munthu wakuziŵa kulemba kwakujoba pa mya, kuzachitakataka pamoza ndi ŵanchitu wo nde nawo mwaku Yuda, ndi Yerusalemu ŵeniwo ada Davidi ŵanguŵa nawo.

⁸ Munditumiye miti ya milanji ndi ya mlombwa ndi ya alagumu yaku Lebanoni, Pakuti ndiziŵa kuti ŵateŵeti ŵinu ŵaziŵa kutema miti mu Lebanoni. Ndipo ŵateŵeti ŵangu ŵakaŵanga pamoza ndi ŵinu;

⁹ kuti ŵazachindinozge miti yinandi ukongwa, chifukwa nyumba yo ndizengenge yiŵenge yikuru ndi yakuziziswa.

¹⁰ Ndipaskenge ŵateŵeti ŵinu ŵakutema miti, myeso vikwi machumi ghaŵi (20,000) vya trigu wakuchoko, ndi vikwi machumi ghaŵi (20,000) vya Barile, ndi vikwi machumi ghaŵi (20,000) vya vinyo, ndi vikwi machumi ghaŵi (20,000) vya mafuta.”

¹¹ Viyo Hiramu karonga waku Turo wangamuka mu karata yo wangutuma kwaku Solomoni wanguti, “Chifukwa Ambuya atanja ŵanthu ŵawo reka akuŵika iwe karonga waku wo.”

¹² Hiramu wanguti so, “Atumbikike Ambuya Chiuta waku Yisraele, yo wakurenga kuchanya ndi pasi, yo wapaska karonga Davidi mwana wazero, wakuzazika vinjero ndi zero, mweniyo wakazengiyanga Ambuya kasopi, ndi wakazenganga nyumba yake ya ufumu.

¹³ “Sono ndatuma munthu wakuwamu, wakuzazika ndi vinjero, Huramabi,

¹⁴ mwana wa munthukazi wa ŵana ŵanthukazi ŵaku Dani, ndipo wiske wenga munthu waku Turo. Wakusambira kuchita vya golide, siliva, mkuŵa, visulu, mya, ndi thonji lakuchesama, simba, ndi waziŵa kuchita nchitu yose ya manja yo yingapaskika kwaku iyo, ndi fundi zinu, fundi za mbuya wangu, Davidi ausu.

¹⁵ Sono ehe trigu ndi barile, mafuta ndi vinyu, vyaku vyo mbuya wangu mwakamba, tumani ku wateŵate ŵinu;

¹⁶ ndipo tikatemanga miti yose yo mungakhumba kutuwa ku Lebanoni, ndi kuza nayo kwaku imwe mu maphaka mu nyanja pe mpaka kufika nayo ku Yopa, mwakuti kutuwa ko muzachiyitore ku Yerusalemu.”

¹⁷ Ndipo Solomoni wanguŵerenga ŵalendo wo ŵenga mu charu cha Yisraele, nge ndimo wanguŵerenge Davidi wiske wake, ndipo ŵangusanirika vikwi machumi pe chumi ghankhonde ndi machumi ghankhonde ndi vitatu pachanya, machumi pe chumi ghankhonde ndi limoza (153,600).

¹⁸ Vikwi machumi ghankhonde ndi ghaŵi (70,000) ŵaku wo wanguŵapatuliya ku nchitu yakupinga katundu, vikwi machumi ghankhonde ndi ghatatu (80,000) wanguŵaputuliya ku nchitu yakuswa mya mu mapiri, ndi vikwi vitatu pachanya machumi pe chumi ghankhonde ndi limoza (3,600) ŵakuwona ndi ŵakuchiska ŵanthu kuchita nchitu.