2 Mikoka 19 - Tonga Bible 1986

Mchimi Yehu watundula Yehosafati

¹ Yehosafati karonga waku Yuda wanguwere ku nyumba yake mu umampha.

² Kweni Yehu mwana waku Hanani muwona wanguruta kwachikumana nayo, wanguti kwaku Yehosafati, “Kumbi ukwenere kovya ŵaheni ndi kwanja wo ŵatinkha Chiuta? Pa chifukwa ichi kandundu kaku Chiuta ke paku iwe.

³ Kweni kamampha kawonekamo mwaku imwe chifukwa mungutuzgamo chikozgo cha Ashera mu charu ndi kuŵikapo mtima winu pakumpenja Chiuta.”

⁴ Yehosafati wanguja mu Yerusalemu: ndipo wanguruta so kwendendeka mukati mu ŵanthu, kutuwa ku Beresheba kwachifika ku mapiri ghaku Efraimu, kuŵawezge kwaku Chiuta wa ŵambuyawo.

⁵ Wanguŵika ŵeruzgi mu charu, mu misumba yose ya malinga yaku Yuda, msumba ndi msumba,

⁶ wanguti ku ŵeruzgi, “Chenjeni ndimo muchitiya, kuti muteruzgiya ŵanthu cha kweni Ambuya wo atuŵa namwe mucheruzga.

⁷ Viyo chofyu cha pa Ambuya chiŵe paku imwe chenjeni pakucho muchita, chifukwa Ambuya Chiuta widu kuti wakarekeriyanga cheruzgu chakubende cha, kuchita sankhu pamwenga kuronde vinda.”

⁸ Ndipo Yehosafati wangumika so mu Yerusalemu ŵaLevi ndi ŵazukuru ndi ŵara ŵa nyumba za ŵaYisraele, kweruzgiya Ambuya ndi kudumuwa milando. Ndipo ŵenga ndi vitengo vyawo mu Yerusalemu.

⁹ Ndipo wanguŵapangizga kuti, “Muchitenge ndikuŵawopa Ambuya, muŵenge ŵamagomekezgeka ndi mtima winu wose.

¹⁰ Penipo pose mlando utuza kwinu wa ŵabali ŵinu wo ŵaja mu misumba yawo, pa wakudiska ndopa wa dangu, pamwenga langulu, pamwenga vipangizgu, ndi vyeruzgu, muŵarangenge kuti ŵareke kulakwiya Ambuya alinga kuti angamusiskiyani kandundu, imwe ndi ŵabali ŵinu. Muchitenge viyo, ndipo kuti muŵenge ndi kalema cha.

¹¹ Wonani, Amaria mzukuru mura we pachanya pinu mu milando yose ya Ambuya, ndipo Zebedia mwana waku Yishumaeli, mweruzgi wa nyumba yaku Yuda ndi mura mu milando yose ya karonga; ŵaLevi ŵaŵenge nge mbateŵeti ŵinu. Chitani ndi kukhwima mtima, Ambuya aŵenge ndi ŵakutowa mu mtima!”