2 Mikoka 17 - Tonga Bible 1986

Umampha ndi ukuru waku Yehosafati

¹ Ndipo mwana wake Yehosafati manguwusa mu malo ghake wangujikhozga kulimbana ndi Yisraele.

² Wanguŵika ŵankhondo mu charu chaku Yuda, ndi mu mizi yaku Efraimu yo awiske Asa ŵanguronda.

³ Ndipo Chiuta wenga nayo Yehosafati chifukwa wendanga mu nthowa zakudanga, wengavi kupenja ŵaBala.

⁴ Kweni wangupenja Ambuya Chiuta wa awiske, wangwenda mu marangu ghake, kwambura kwenda mu nthowa zaku Yisraele.

⁵ Pa chifukwa ichi Chiuta wangukhozga ufumu mu janja lake; ndipo Yuda yose wanguza ndi vyawanangwa kwaku Yehosafati; wenga ndi usambasi ndi ulemu ukongwa.

⁶ Mtima wake wenga wanthazi mu nthowa zaku Chiuta, ndipo so wangutuzgamo malo gha pachanya ndi vyakusopiyamo (vya Chiuta waŵaka) mwaku Yuda.

⁷ Muchirimika cha chitatu chakuwusa kwake wangutuma zinduna zake Benihaili, ndi Obadia, ndi Zekariya, ndi Nataneli, ndi Mikaya kusambizga mu misumba yaku Yuda.

⁸ Pamoza nawo wangutuma ŵaLevi Shemia, ndi Netania, ndi Zebedia, ndi Asahelu, ndi Shemiramoti, ndi Yehoyatani, ndi Adoniya, ndi Tobia, ndi Tobadoniya ŵaLevi; ndi nawo Elishama ndi Yoramu, ŵazukuru.

⁹ Ndipo ŵangusambizga kwaku Yuda, ŵenga ndi buku la marangu gha Ambuya, ŵangwendendeka mu misumba yose yaku Yuda kusambizga ŵanthu.

¹⁰ Ndipo ŵakaronga wose ŵamu vyaru vyo ŵangopa Ambuya, kuti wanguchita cha nkhondo ndi Yehosafati.

¹¹ Ndipo ŵanyake ŵa ŵaFilisti ŵanguza ndi vyawanangwa kwaku Yehosafati, ndi mithulu ya siliva; ndipo Arabai ŵanguza ndi miskambo, mberere zinthurumi vikwi vinkhonde ndi viŵi pachanya machumi pe chumi ghankhonde ndi ghaŵi (7,700) ndipo so ndi mbuzi vikwi vinkhonde ndi viŵi pachanya machumi pe chumi ghankhonde ndi ghaŵi (7,700).

¹² Ndipo Yehosafati wangukuzgika ukongwa, wanguzenga malinga ghatali ndi mizi yakulongamo vyuma;

¹³ wenga ndi zinkhokwe zinandi mu mizu yaku Yuda, ndi ŵankhondo mu Yerusalemu vinkhara vyanthazi.

¹⁴ Kwakulingana ndi nyumba za awuskeu maŵerengedu ndi agha; ŵaku Yuda, ŵachirongozgi ŵavikwi: Adna nduna yira, ndi ŵankhondo ŵanthazi vikwi machumi pe chumi ghatatu (300,000).

¹⁵ Ndipo wachiŵi kwaku iyo wenga Yehohanani chirongozgi, ndi vikwi machumi pe chumi ghaŵi pachanya machumi ghankhonde ndi ghatatu (280,000),

¹⁶ wachitatu wenga Amasia mwana waku Zikri, yo wangujipereka yija mwawanangwa ku nchitu yaku Chiuta; pamoza ndi iyo ŵankhondo vikwi machumi pe chumi ghaŵi (200,000)

¹⁷ Ŵaku Benjamini, Eliada, munthu wanthazi, chinkhara, ndi vikwi machumi pe chumi ghaŵi (200,000) ŵanthu ŵa mauta ndi nguru,

¹⁸ wachiŵi kwaku iyo wenga Yehozabadi ndi vikwi machumi pe chumi pachanya machumi ghankhonde ndi ghatatu (180,000) vya ŵanthu ŵakujirongosole nkhondo.

¹⁹ Yaŵa ndiwo ŵalindanga karonga, pachanya pa ŵanyake wo iyo wanguŵika mu misumba ya malinga mwaku Yuda yose.