2 Mikoka 16 - Tonga Bible 1986

Asa wapangana ndi Benihadadi, ndi walimbana ndi Yisraele

¹ Mu chirimika cha machumi ghatatu ndi vinkhonde ndi chimoza cha muusu waku Asa, Basha karonga waku Yisraele wanguza kwaku Yuda, wanguzenga Rama, mwakuti wajarizge wose ŵakutuwa ndi ŵakusere kwaku Asa karonga waku Yuda.

² Ndipo Asa wangutuzga siliva ndi golide kutuwa mu nkhokwe za vyuma vyamu nyumba yaku Chiuta ndi mu nyumba ya karonga, wangutuma kwaku Benihadadi karonga waku Siriya yo wajanga ku Damasko, kuti,

³ “Paŵe phanganu pakati pako ndi ine, nge ndimo lenge pakati pa ada ndi ausu; ehe, ndakutumiya siliva ndi golide, iwe urute ukaswe phanganu lako ndi Basha karonga waku Yisraele kuti watuweko kwaku ine.”

⁴ Ndipo Benihadadi wanguvwiya karonga Asa, wangutuma ŵachirongozgi ŵankhondo zake kwachisosomo misumba yaku Yisraele, wangukoso Ijoni ndi Dani, ndi Abelmaimu ndi misumba yose ya zinkhokwe za vinthu vyaku Naftali.

⁵ Ndipo wanguti wavwa Basha wangureka kuzenga Rama, nchitu yingurekeka.

⁶ Penipo Asa wanguto wose ŵaku Yuda, kwachito mya ya Rama ndi miti yake yo wazengiyanga Basha, ndipo wanguzenge Geba ndi Mizipa.

⁷ Pa nyengo yo wanguza Hamani muwona kwaku Asa karonga waku Yuda, wanguti, “Chifukwa wagomekezga fumu yaku Siriya, ulivi kugomezga Ambuya Chiuta wako, pa chifukwa ichi nkhondo ya fumu ya Siriya murwani wako yapozomoka mu janja lako.

⁸ Kumbi asi ŵaEtiopia ndi ŵaLibiya ŵenga chimzinda cha nkhondo, ndi magareta ghanandi ukongwa ndi ŵapakavalo? Kweni chifukwa unguyegeme ku Ambuya, iwo anguŵapereka mu janjalako.

⁹ Pakuti maso gha Ambuya ghalereska uku ndi uku mu charu chose chapasi, ku jirongo nthazi kovya wo mitima yawo njakufikapo pa maso pake. Mwaku ichi wachita ubereŵeza; kwamba sono uŵenge ndi zinkhondo.”

¹⁰ Penipo ndipo Asa wangukaripa ndi muwona wangumuŵika mu nyumba ya magoŵa, wangutundiya nayo pa chifukwa cha chinthu ichi. Ndipo Asa wangusuzga ŵanthu ŵanyake pa nyengo yeniyo.

¹¹ Nchitu zaku Asa, zapakudanga ndi pakumariya, wonani, zikurembeka mu Buku la ŵaKaronga ŵaku Yuda ndi Yisraele.

¹² Asa mu chirimika cha machumi ghatatu ndi vinkhonde ndi vinayi (39) cha muusu wake, wangukoleka ndi thenda ya marundi, ndipo nthenda yake yingukuwa ukongwa; mu urwali wake kuti wangupenja Ambuya cha, kweni zing'anga.

¹³ Asa wangura ndi ŵambuyake, wangufwa mu chirimika cha machumi ghanayi pachanya chimoza (41) cha muusu wake.

¹⁴ Ŵangumuŵika mu muunda wake wo wangujinozge yija mu msumba waku Davidi. Ŵangumgoneka pa chita chakuzaza ndi vyachema vya mtundu mtundu, vyakunozgeka ndi ŵakupanga minkhwara, ndipo ŵangusonkha chi moto chikuru mwakumtumbika.