2 Mikoka 14 - Tonga Bible 1986

Asa wabaya ŵaKuchi

¹ Viyo Abija wangura ndi ŵambuyake, ŵangumuŵika mu muzi waku Davidi; ndipo Asa mwana wake wanguwusa malo ghake. Mu mazuŵa ghake charu chenga bata virimika chumi.

² Ndipo Asa wanguchita cho nchamampha ndi chakunyoroka paurongo pa Ambuya Chiuta wake.

³ Wangubwanganduwa majochero gha ŵachiuta ŵambura kuziŵikwa, ndi malo gha pachanya, ndipo wanguswa vyangoza ndi kudumuliya pasi Ashera;

⁴ ndipo wangulanguriya Yuda kuti wapenje Ambuya Chiuta wa ŵambuyawo, kufiska dangu ndi langulu.

⁵ Ndipo wangutuzga so malo gha pachanya ndi vikozgo mu mizi yose yaku Yuda, ndipo ufumu wenga bata paurongo pake.

⁶ Ndipo wanguzenga mizi ya malinga mwaku Yuda, chifukwa charu chingupumuwa. Wengavi nkhondo mu virimika viya chifukwa Chiuta wangumpumuzga.

⁷ Ndipo wanguti kwaku Yuda, “Tiyeni tizenge msumba iyi, tizingirizge ndi malinga, ndi vitanthali ndi malikomo, ndi mipiringizgu, charu cheche chidu, chifukwa tampenja Chiuta widu, tampenja, ndipo iyo watipaska chimangu kosekose.” Viyo wanguzenga ndi kufiska umamphavi.

⁸ Ndipo Asa wenga ndi ŵankhondo vikwi machumi pe chumi ghatatu (300,000) ŵa mwaku Yuda, ŵakupinga nguru ndi mikondo, ndipo so ndi vikwi machumi pe chumi ghaŵi pachanya machumi ghankhonde ndi ghatatu (280,000) ŵa mwaku Benjamini, ŵakupinga nguru ndi mauta; wose wo vyenga vinkhara vyanthazi.

⁹ Ndipo kunguza Zera waku Etiopia ndi ŵanthu vikwi machumi pe chumi kwazirwa nkhondo (1,000,000), ndi magareta machumi pe chumi ghatatu (300), ŵangufika ku Meresha.

¹⁰ Ndipo Asa wangutuwa kurwana nayo, ŵangujarika umampha nkhondo zawo mu dambo la Zefata ku Meresha.

¹¹ Ndipo Asa wanguririya kwa Ambuya Chiuta wake kuti, “Ambuya Chiuta, wakulingana ndi imwe nkhulivi, kovya pakati pa ŵanthazi ndi ŵambura nthazi. Tovyeni Ambuya Chiuta widu, pakuti tiyegeme kwinu, ndipo mu zina linu tizirwi ndi chimzinda ichi. Ambuya ndimwe Chiuta widu munthu kuti wangamtondani cha.”

¹² Viyo Chiuta wangukoso ŵa Etiopia paurongo paku Asa ndi Yuda, ŵaEtiopia ŵanguthaŵa.

¹³ Asa ndi ŵanthu wo wenga nawo ŵanguŵandondoroska kwachifika mpaka ku Gera, ndipo ŵaEtiopia ŵanguthaŵa, ŵengavi nthazi; ŵangumbininika paurongo paku Chiuta ndi pa maso pa ŵankhondo ŵake. ŴaYuda ŵanguronda miskowo yinandi ukongwa.

¹⁴ Ndipo ŵangukoso mizi yose kwakuzunguriya Gera, chifukwa chopu chaku Chiuta chinguŵawiya. Ndipo ŵanguskowa mizi yose chifukwa yenga ndi vinthu vinandi.

¹⁵ Ndiposo ŵangukoso mahema gha ng'ombe, ndi kuronda mberere zinandi, ndi ŵagamila, ndi ŵanguwere ku Yerusalemu.