2 Mikoka 12 - Tonga Bible 1986

Sheshaki waku Egipiti

¹ Ndipo unguti wakhozgeka ufumu waku Rehoboamu ndi nthazi zikuru wangujowo dangu la Ambuya, ndi Yisraele yose pamoza nayo.

² Mu chirimika cha chinkhonde cha karonga Rehoboamu, Sheshaki karonga waku Egipiti wanguza kurwana ndi Yerusalemu chifukwa wangunangiya Ambuya;

³ pamoza ndi magareta chikwi ndi machumi pe chumi ndi ghaŵi (1,200), ndi ŵapakavalo vikwi machumi ghankhonde ndi limoza (60,000). Ŵanthu ŵenga ŵambura maŵerengeka wo ŵanguza nawo pamoza kutuwa ku Egipiti ŵaLibia, ŵaSuki, ndi ŵaEtiopia.

⁴ Wanguronda mizi ya malinga yaku Yuda ndi kufika ku Yerusalemu.

⁵ Shemaya mchimi wanguza kwaku Rehoboamu ndi ku ŵana ŵa karonga ŵaku Yuda wo ŵanguwungana ku Yerusalemu chifukwa chaku Sheshaki, ndi wanguti kwaku wo, “Ambuya atiti, ‘Mwandijowo ine, nane so ndamrekani mu janja laku Sheshaki.’ ”

⁶ Viyo ŵana ŵa karonga waku Yisraele ndi karonga ŵangujiyuyuwa ŵanguti, “Ambuya mbarunji mbakunyoroka.”

⁷ Sono po Ambuya anguwona kuti wajiyuyuwa, mazu gha Ambuya ghanguza kwaku Shemaya, kuti, “Wajiyuyuwa pa chifukwa ichi kuti ndi ŵaparghang'enge cha, kweni ndiŵapaskenge kanyengo, ukari wangu kuti upungulikiyenge pa Yerusalemu cha ndi janja laku Sheshaki.

⁸ Kweni ndipuuli waŵenge mteŵeti wake, mwakuti waziŵe nchitu zangu ndi nchitu ya maufumu gha vyaru.”

⁹ Viyo Sheshaki karonga waku Egipiti wangukwera kurwana ndi Yerusalemu, wanguronda vyuma vya mu nyumba ya Ambuya ndi vyamu nyumba ya karonga, wanguruta navyo vyose.

¹⁰ Wanguto so nguru za golide zo wanguchita Solomoni; ndipo karonga Rehoboamu wanguchita nguru za mkuŵa mu malo ghaku zo, wanguzipereka mu manja gha murongozgi wa ŵalonda, yo walindanga pakhomo la nyumba ya karonga.

¹¹ Ndipo pose po karonga wangusere mu nyumba ya Ambuya, ŵalonda ŵanguza kuzito ndi kuziserezga so mu chipinda cha ulinda.

¹² Ndipo wanguti wajiyuyuwa, ukari waku Chiuta ungugowoka kwaku iyo kuti wareke kumparghang'iya limu; ndipo vinthu vingwenda so umampha mwaku Yuda.

¹³ Viyo karonga wangujikhomeska mu Yerusalemu ndi wanguwusa. Rehoboamu wenga ndi virimika machumi ghanayi pachanya chimoza wandaŵe karonga, ndipo wanguwusa virimika chumi ndi vinkhonde pachanya viŵi mu Yerusalemu, muzi weniwo Chiuta wangutondo mu mitundu yose yaku Yisraele kuŵikamo zina lake. Zina la ŵanyina lenga Nama mu Amoni.

¹⁴ Ndipo wanguchita viheni chifukwa mtima wake wangureka kuŵika pakupenja-penja Ambuya.

¹⁵ Nchitu zaku Rehoboamu zakudanga ndi zakumariya zikulembeka mu buku la mkoka laku Shemaya mchimi, ndi laku Ido muwona? Zengapo nkhondo pakati paku Rehoboamu ndi Yeroboamu ruta-ruta.

¹⁶ Ndipo Rehoboamu wangura ndi ŵambuyake, wanguŵikika mu muzi waku Davidi; ndipo Abija mwana wake wanguwusa mu malo ghake.