1 Yohane 5 - Tonga Bible 1986

Upundi widu pa charu

¹ Yose wakuvwana kuti Yesu ndiyo Kristu, wapapika kwaku Chiuta: ndipo yose wakumwanja wakupapa yo, watanja yo so ngwakupapika kwaku iyo.

² Mwaku chenichi tiziŵa kuti titanja ŵana ŵaku Chiuta, po titumwanja Chiuta, ndi kuchita marangu ghake.

³ Chifukwa chenichi nchanju cho chaku Chiuta, kuti tisunge marangu ghake; ndipo marangu ghake gho kuti ngazitu cha.

⁴ Pakuti chose cho chapapika kwaku Chiuta chipunda charu: ndipo wenuwu mbupundi wo wapunda charu, chivwanu chidu cho.

⁵ Kweni njani yo ngwakupunda charu? Ndi mweniyo ngwakuvwana kuti Yesu ndi Mwana waku Chiuta.

⁶ Mwenuyu ndiyo wanguziya mu maji ndi ndopa, Yesu Kristu; mu maji gho pe cha, kweni mu maji gho ndi mu ndopa zo.

⁷ Ndipo Mzimu yo ndiyo wasimikizga, pakuti Mzimu yo ndiyo Uneneska wo.

⁸ Pakuti mbatatu ŵeniwo ŵasimikizga, Mzimu yo, ndi maji gho, ndi ndopa zo; ndipo ŵatatu yaŵa mba kumoza.

⁹ Asani tironde chisimisimi cha ŵanthu, chisimisimi chaku Chiuta nchikuruku: pakuti chisimisimi chaku Chiuta nchenichi, chakuti wasimikizga vyapa Mwana wake.

¹⁰ Mweniyo wavwaniya mu Mwana waku Chiuta we nacho chisimisimi mwaku yija: mweniyo wareka kuvwaniya mwaku Chiuta wamchita mtesi; pakuti wareka kuvwaniya mu chisimisimi chenicho Chiuta wamsimikizgiya Mwana wake.

¹¹ Ndipo chenichi nchisimisimi cho, chakuti Chiuta wakutipaska umoyo wamuyaya, ndipo umoyo wenuwu wemu Mwana wake.

¹² Mweniyo we ndi Mwana yo we nawo umoyo; yo walive Mwana waku Chiuta walive umoyo.

Umoyo wamuyaya

¹³ Kwaku imwe mwaŵakuvwaniya mu zina la Mwana waku Chiuta ndalemba vyenivi, alinga kuti muziŵe kuti mwe nawo umoyo wamuyaya.

¹⁴ Ndipo chenichi nchigomezgu chenicho te nacho kuchiri kwaku iyo kuti, asani tipempha kanthu kwakuyana ndi khumbu lake, watuvwa ifwe:

¹⁵ ndipo asani tiziŵa kuti watuvwa ifwe, chenicho chose tingapempha, tiziŵa kuti tenagho mapempho ghenigho tapempha kwaku iyo.

¹⁶ Asani munthu wangawona mbali wake kuchita chilakwa, chakurata ku nyifwa cha, wakapemphanga, ndipo Chiuta wampaskenge umoyo kweni chifukwa chaku wo ŵalakwiya ku nyifwa cha. Chifukwa chakurata ku nyifwa chiripo: kuti ndikamba kuti wapemphe paku chenicho cha.

¹⁷ Uwura urunji wose nchilikwa: ndipo chiripo chilakwa chakurata ku nyifwa cha.

¹⁸ Tiziŵa kuti yose yo ngwakupapika kwaku Chiuta kuti warutiliya mu kulakwa cha, chifukwa Mwana yo waku Chiuta watimsunga ndipo mheni yo kuti wamkwaska cha.

¹⁹ Tiziŵa kuti te ŵakwaku Chiuta, ndipo charu chose chira mu nthazi ya mbeni yo.

²⁰ Kweni tiziŵa kuti Mwana waku Chiuta waza, ndipo kuti watipaska chinjeru, alinga kuti timziŵe mneneska yo; ndipo te mu mneneska yo, nadidi mu Mwana wake Yesu Kristu mwenuyu ndi Chiuta mneneska yo, ndi Umoyo Wamuyaya wo.

²¹ Mwatwana twangu tuwaniko ku vyangoza.