1 Yohane 4 - Tonga Bible 1986

Mzimu wauneneska ndi wautesi

¹ Mwaŵakwanjiwa, mungavwaniyanga cha mu mzimu we wose, kweni yesani mizimu yo, asani vinu njakutuliya kwaku Chiuta. Pakuti ŵamchimi ŵatesi ŵanandi ŵaburika mu charu.

² Mwaku chenichi muziŵa Mzimu waku Chiuta: mzimu we wose wakuzomera kuti Yesu Kristu waziya mu liŵavu, ngwakutuliya kwaku Chiuta:

³ ndipo mzimu wose wakureka kumzomera Yesu, kuti ngwakutuliya kwaku Chiuta cha. Ndipo mweniyo ndi mzimu wa mkanakristu yo, mweniyo mwavwapo kuti watuza; ndipo sono we mu charu kali.

⁴ Mwe ŵakwaku Chiuta imwe, mwatwana twangu, ndipo mwaŵapunda; pakuti mweniyo we mwinu ndi mkuruku kwakuruska yo we mu charu.

⁵ Iwo mbakutuliya ku charu: chifukwa chenichi ŵakamba ulaka mba charu, ndipo charu cho chituŵavwa.

⁶ Ifwe te ŵakwaku Chiuta: mweniyo wamziŵa Chiuta, watuvwa ifwe, mweniyo kuti ngwakwaku Chiuta cha kuti watuvwa ifwe cha. Mwaku chenichi tiziŵiya mzimu wa uneneska, ndi mzimu wa urandizgi.

Chiuta nchanju

⁷ Mwaŵakwanjiwa, tanjane: pakuti chanju nchakutuliya kwaku Chiuta; ndipo yose yo watanja wapapika kwaku Chiuta, ndipo watumziŵa Chiuta.

⁸ Yo wareka kwanja walive kumziŵa Chiuta; pakuti Chiuta nchanju.

⁹ Mwaku chenichi chingurongoleke kuchiri kwaku ifwe chanju cho chaku Chiuta, mwakuti Chiuta wangutumiya Mwana wake wakuwa viya mu charu, alinga kuti tiŵenge ndi umoyo mwaku iyo.

¹⁰ Mwaku chenichi mwe chanju, mwakuti ifwe tingumwanja Chiuta cha, kweni mwakuti iyo wangwanja ifwe, ndi wangutitumiya Mwana wake kuŵa mphepeska yapa vilakwa vidu.

¹¹ Mwaŵakwanjiwa, asani Chiuta wangwanja ifwe viyo, nafwe so titenere kwanjana.

¹² Kosekose kulive yumoza wawona Chiuta: asani titanjana, Chiuta waja mwaku ifwe, ndipo chanju chake chafiskika mwidu.

¹³ Mwaku chenichi tiziŵa kuti tijamwaku iyo, ndi iyo mwaku ifwe, chifukwa watipaska vya Mzimu wake.

¹⁴ Ndipo tawona ifwe, ndipo tisimikizga kuti Dada watuma Mwana wake kuŵa Mtaski wa charu.

¹⁵ Mweniyo yose wazomerenge kuti Yesu ndi Mwana waku Chiuta, Chiuta waja mwaku iyo, ndi iyo mwaku Chiuta.

¹⁶ Ndipo ifwe tiziŵa ndipo tavwana ndi chanju chenicho Chiuta wenacho kuchiri kwaku ifwe. Chiuta nchanju; ndipo mweniyo waja mu chanju, waja mwaku Chiuta, ndipo Chiuta waja mwaku iyo.

¹⁷ Mwaku chenichi chanju cho chifiskikiya kuchiri kwaku ifwe, kuti tiŵe ndi chigomezgu mu zuŵa lo la cheruzgu; pakuti ndimo waliri yuwa, ndimo tiliri ifwe mu charu chenichino.

¹⁸ Mulive wofi mu chanju: kweni chanju chakufiskika cho chidika wofi, pakuti wofi we ndi chilanga; ndipo yo ngwakopa walive kufiskika mu chanju.

¹⁹ Ifwe titanja, pakuti iyo danga wangwanja ifwe.

²⁰ Asani munthu watiti, “Nditumwanja Chiuta,” ndipo watinkha mbali wake, ndi mtesi: chifukwa mweniyo wareka kwanja mbali wake, mweniyo watumuwona, kuti waziŵa cha kumwanja Chiuta mweniyo valive kuwona.

²¹ Ndipo dangu lenili tenalo kutuliya kwaku iyo, lakuti mweniyo ngwakumwanja Chiuta, wanjenge so mbali wake.