1 Yohane 3 - Tonga Bible 1986

Ŵana ŵaku Chiuta

¹ Alereni, chanju cho watipaska Dada, mwakuti titamulike ŵana ŵaku Chiuta: ndimo tiriri. Chifukwa chenichi chirive kutiziŵa, pakuti chengavi kumziŵa iyo.

² Mwaŵakwanjiwa, sono te ŵana ŵaku Chiuta, ndipo chindarongoleke ndasono mo tiŵiyenge. Kweni tiziŵa kuti, penipo wakawonekanga, tikaŵanga ŵakukozgana nayo; pakuti tikamuonanga mo waliri.

³ Ndipo munthu yose wakuŵa nacho chigomekezgu chenichi paku iyo, wajitozga ulaka ndimo waliri wakutowa Yuwa.

⁴ Munthu yose yo wachita chilakwa, wachita uchikana marangu nawo so: ndipo chilakwa mbuchikana marangu.

⁵ Ndipo muziŵa kuti wanguwoneka Yuwa, alinga kuti watuzgepo vilakwa; ndipo mwaku iyo chilakwa mulive.

⁶ Munthu yose wakuja mwaku iyo kuti walakwa cha: yose yo ngwakulakwa kuti wamuwona cha, chingana nkhumziŵa.

⁷ Mwatwana twangu, munthu wangamrandizgani kose cha: yo ngwakuchita urunji ndi murunji uli ndimo waliri murunji Yuwa.

⁸ Yo ngwakuchita chilakwa ngwakutuliya kwaku diabolo yo; pakuti kutuwa ku mtendeku walakwa diabolo yo. Mwana yo waku Chiuta wangurongoleke chenichi kuti wanange nchitu zo zaku diabolo.

⁹ Munthu yose yo wapapika kwaku Chiuta kuti wachita chilakwa cha, pakuti mbeu yake yijaririya mwaku iyo: ndipo kuti waziŵa kulakwa cha, pakuti wapapika kwaku Chiuta.

¹⁰ Mwaku chenichi ŵarongoleka ŵana wo ŵaku Chiuta ndi ŵana wo ŵaku diabolo: munthu yose wakuura kuchita urunji, kuti ngwa kwaku Chiuta cha, chingana ndi yo walive kumwanja mbali wake.

Yanjanane

¹¹ Pakuti wenuwu mbuthenga wo, weniwo mwavwa kutuwa ku mtendeku, kuti tanjane:

¹² Ulaka ndi Kaine cha, yo wenga wakutuliya ku mheni yo, ndipo wangubaya mhurwa wake. Ndipo wangumbayiya chifukwa chine? Chifukwa nchitu zake zenga ziheni, ndi za mhurwa wake zirunji.

¹³ Mwa ŵabali, mungazizwanga asani charu chikutinkhani.

¹⁴ Tiziŵa ifwe kuti tatuwako ku nyifwa kuyiyamo mu umoyo, pakuti titanja ŵabali wo. Yo wareka kwanja, wajaririya mu nyifwa.

¹⁵ Munthu yose yo watinkha mbali wake ngwambanda: ndipo muziŵa wambanda kuti wendi umoyo wa muyaya mwaku iyo cha.

¹⁶ Mwaku chenichi tiziŵiya chanju, mwakuti Yuwa wanguŵikiya pasi umoyo wake pa chifwa chidu: ndipo titenere ifwe kuŵikiya pasi maumoyo ghidu pa chifwa cha ŵabali wo.

¹⁷ Kweni yose yo we nacho chuma cha charu, ndipo wawona mbali wake kuti wakavuka, ndi wamjariya lisungu lake, chanju cho chaku Chiuta chija uli mwaku iyo?

¹⁸ Mwatwana twangu, tinganjiya mu mazu pamwe mu lilime cha; kweni mu nchitu ndi mu uneneska.

¹⁹ Mwaku chenichi tiziŵiyenge kuti te ŵamu uneneska wo, ndipo paurongo pake tikhozgiyenge mtima widu,

²⁰ mwaku chose chenicho mtima widu ungatisuska; pakuti Chiuta ndi mkuruku ku mtima widu, ndipo waziŵa vyose.

²¹ Mwaŵakwanjiwa, asani mtima ulive kutisuska, te nacho chigomezgu kuchiri kwaku Chiuta;

²² ndipo chose chenicho tipempha, tironde kwaku iyo, chifukwa tisunga marangu ghake, ndipo tivichita vyakunozga pa maso pake.

²³ Ndipo lenili ndi dangu lake, kuti tivwaniyenge mu zina la Mwana wake Yesu Kristu, ndi kuti tanjane, uli ndimo wangutilanguliya.

²⁴ Ndipo yo ngwakusunga marangu ghake, waja mwaku iyo, ndi iyo mwake. Ndipo mwaku chenichi tiziŵiya kuti waja mwidu, mu Mzimu mweniyo wangutipaska.