1 ŴaKorinte 8 - Tonga Bible 1986

Mafumbu pa vyakurgha vyakunozgeke ŵachiuta ŵangoza

¹ Kweni nge nkhwaku vyo vyabayikiya vyangoza: tiziŵa kuti tose te ndi mziŵiru. “Mziŵiru wo utukumuska,” Kweni chanju ndicho chizenga.

² Asani munthu watiti waziŵa kanthu, wandaziŵepo mo watenere kuziŵiya.

³ Kweni asani yumoza watumwanja Chiuta, mweniyo waziŵikwa ndi iyo.

⁴ Viyo kuchiri ku chakurgha cha vyakubayikiya vyangoza tiziŵa kuti, “Changoza kuti nkhanthu cha mu charu,” ndipo kuti, “Palive chiuta kweni yumoza pe.”

⁵ Chifukwa chingana ŵalipo ŵeniwo ŵatamulika ŵachiuta, mu machanya, pamwenga pa charu; uli ndipo nadi kuliri “ŵachiuta ŵanandi,” ndi “ŵambuya ŵanandi;”

⁶ kweni kwaku ifwe walipo Chiuta yumoza pe, Ada, kutuliya kwaku mweniyo kwe vyose ndi mwaku mweniyo tose tijariya Mbuya yumoza, Yesu Kristu mwaku mweniyo mwe vyose, ndi ifwe mwaku iyo.

⁷ Kweni kuti mu munthu yose mwe mziŵiru wo cha. Wanyake pakuziŵiriya vyangoza mpaka kuno ku sono, ŵaturgha nge vyakubayikiya vyangoza; ndipo njuŵi zawo pakuŵa ziteta, zikazuzgika.

⁸ Kweni chakurgha kuti ndicho chititore ifwe pa maso paku Chiuta cha: asani tireka kurgha kuti ndipo te ŵaheni kwakuruska cha, asani titurgha kuti ndipo te ŵamampha kwakuruska cha.

⁹ Kweni cheŵani vinu mtufu winu uwu ungaŵiya chiguŵisku kwaku ŵeniwo mbadomboto,

¹⁰ chifukwa asani munthu wangakuwona iwe wakuŵa ndi mziŵiru, kuja pa gome mu kasopi wangoza, asi njuŵi zake, pakuŵa iyo wadomboto, zikhomeskekenge kurgha vyakubayikiya vyangoza?

¹¹ Ndi viyo wanangikiya pa mziŵiru wako wadomboto yo, mbali mweniyo Kristu wangufwiya.

¹² Ndipo pakulakwiya ŵabali wo, ndi pakulasa njuŵi zawo zakutomboloka, mulakwiya Kristu,

¹³ viyo, asani chakurgha chitumguŵiska mbali wangu, kuti nkharghanga cho cha muyaya, alinga kuti ndireke kumguŵiska mbali wangu.