1 ŴaKorinte 5 - Tonga Bible 1986

Ulakwi mu mpingu

¹ Nadidi kuvwika kuti mwinu mwe ureŵi; ureŵi wakuti chingana ndi mu ŵamtundu kuti ulipo wa viyo cha, kuti munthu walakwenge ndi muwoli wa awiske!

² Ndipo imwe mutukumuka, kumbi kuti mungwenere kuchita chitima cha? Wakuchita ichi mutuzgeni mukati mwinu.

³ Chifukwa ine chingana nde kunyake mu liŵavu kweni nde namwe pamoza mu mzimu, viyo pakuŵapo namwe mu mzimu,

⁴ ndamweruzga kali mu zina la Ambuya yo wachita chenichi. Penipo mwaungana imwe, ndi mzimu wangu pamoza namwe, mu zina ndi nthazi ya Ambuyafwe Yesu,

⁵ muperekeni waviyo kwaku Satana ku wanangiku wa liŵavu mpaka penipo warapa, alinga kuti wataske mzimu wake mu zuŵa la Ambuya Yesu.

⁶ Kuti nchamampha cha chitumbwa chinu. Asi muziŵa kuti mtupu umanavi utupiska burunga lose?

⁷ Photoni mtupu wakali wo, kuti muŵe burunga lifya, nge ndimo muliri ŵazira mtupu. Chifukwa phaska lidu nalo labayika, ndilo Kristu.

⁸ Viyo tiyeni tichite dghera, ndi mtupu wakali cha, chingana ndi mtupu wa uheni ndi utimbanizi cha, kweni ndi viŵande vizira-mtupu vya urunji ndi uneneska.

⁹ Ndingukulembiyani mu kalata wangu, kusangana ndi ŵareŵi cha;

¹⁰ posepose ndi ŵareŵi ŵa charu chino cha, pamwenga ndi ŵachiŵinu, pamwenga ndi ŵachipanira, pamwenga ndi ŵakusopangoza; iku mphanyi mungwenere kutuwa mu charu.

¹¹ Kweni ndingukulembiyani kusangana nayo cha, asani yumoza wakuzumbulika mbali ndi mreŵi, pamwenga wachi ŵinu, pamwenga msopangoza, pamwenga wakutuka, pamwenga wakuloŵe, pamwenga wachipanira; waviyo chingana nkhurghanayo nako cha.

¹² Chifukwa nchine kwaku ine kuweruzga wakubwaro? Asi imwe muteruzga wamukati mu eklesiya?

¹³ Wakubwaro ndi Chiuta yo waweruzgenge? “Msezgeni mtimbanizi yo mukati mwinu.”