1 ŴaKorinte 4 - Tonga Bible 1986

Ŵakutumika ŵaku Kristu

¹ Viyo munthu watipimiye nge mbateŵeti ŵaku Kristu, ndi ŵalindanyumba ŵa mangari ghaku Chiuta.

² Panu so, kukhumbikwa mu ŵalindanyumba, kuti munthu wasanirike wamagomekezgeka.

³ Kweni kwaku ine nkhamanavi limu kuti nderuzgike ndi imwe, pamwenga ndi cheruzgu cha munthu; ndikweni kuti nditijeruzga chingana ndine ndamweni cha.

⁴ Pakuti ndirive kukaziŵa kanthu kapaku ndamweni cha; ndikweni nako kuti ndirunjiskikiya mwaku chenichi cha: yo ngwakunderuzga ndi Mbuya.

⁵ Viyo mungeruzgiyanga limu kanthu cha, yindaze nyengo, Ambuya ŵenga ŵandaze, ŵeniwo nawo ŵavumuwenge vibisibisi vya mdima, ndipo ŵawoneskenge pakweru vipangu vya mitima. Penipa ndipo likamuŵiyanga munthu we yose rumbu lake kutuliya kwaku Chiuta.

⁶ Kweni mwa ŵabali, ivi ndirongoro nding'anamuliya paku ndamweni ndi paku Apolo pa chifukwa chinu; alinga kuti mwaku ifwe musambirenge kuja kwakulingana ndi vyo vyalembeka mwakuti wareke munthu yose waku imwe kujitukumuwa iyo mweneko ndi kuyeya munyake.

⁷ Chifukwa njani yo wawona kupambana kwinu? Ndipo we ndi chine iwe cho ulive kuronde? Kweni asani ukuchita kuronde, utumbwiyanji na nge kuti nchawanangwa cha?

⁸ Mwakhorwa kali, mwasambasa kali, mwausa kwambura ifwe: inya mphanyi munguwusa mwakuti nafwe so tiuse pamoza namwe.

⁹ Chifukwa ndighanaghana kuti Chiuta warongo ifwe taŵakutumika ŵapavuli limu, nge mbanthu ŵakukomboleke ku nyifwa: pakuti taŵa chakuwoniyapo ku charu, ndi ku ŵangelo, ndi ku ŵanthu.

¹⁰ Te ŵakupusa ifwe pa chifukwa chaku Kristu kweni imwe mwe ŵavinjeru mwaku Kristu. Ifwe te ŵakutomboroka kweni imwe mwe ŵanthazi. Mwe ŵakurumbika imwe, kweni ifwe te ŵakuyuyulika.

¹¹ Mpaka ku ora lino tituvwa nja ndi nyota, te ŵankhuli, tibakafulika, ndipo tiuraura waka taŵambura muzi,

¹² titakataka ndi manja ghaku taŵeni. Po titokoskeka, ifwe titumbika; po tiŵembeka, ifwe tikunthiyapo;

¹³ po titukika, ifwe tiŵeyere; tachitika nge ndi marara gha charu, uli ndi viswaswani vya vinthu vyose, mpaka kuno ku sono.

¹⁴ Kuti ndilemba ivi kukulengeskani cha, kweni kukuchinyiyani nge mbana ŵangu ŵakwanjiwa.

¹⁵ Chifukwa chingana mwaku Kristu mungaŵa ndi ŵarongozgi vikwi chumi, ndikweni kuti mwe ndi auskemwe ŵeni ŵanandi cha: pakuti mwaku Kristu Yesu ine ndakupapiyani mu evangeli.

¹⁶ Viyo ndikuŵeyereni, muŵi ŵakwezga ine.

¹⁷ Chifukwa chenichi ndamtumiyani Timote, mwana wangu wakwanjiwa ndi wamagomekezgeka mu Mbuya, mweniyo wazamkumbuska imwe mendedu ghangu ghamwaku Kristu, uli ndimo kosekose ndisambizgiya mu mipingu yose.

¹⁸ Kweni ŵanyake ŵatukumuka, ulaka nge ndirekenge kuzako kwinu.

¹⁹ Kweni ndizenge kwinu ruŵi, asani Ambuya azomera; ndipo nkhaziŵanga vyakukamba vya ŵakujitukumuwa waka wo cha, kweni nthazi yawo ndiyo.

²⁰ Chifukwa ufumu waku Chiuta kuti ngwamu mazu waka cha, kweni ngwamu nthazi.

²¹ Mukhumbanji na? Nkhaziyanga kwaku imwe ndi likhwechu kumbi, pamwenga mu chanju ndi mu mzimu wa ukhovu?