1 ŴaKorinte 2 - Tonga Bible 1986

Uthenga waku Kristu wakupayikika

¹ Ndipo ine, mwa ŵabali, ndichiza kwinu, kuti ndinguziya kumutauliyani uthenga waku Chiuta mu mphekuru pamwenga mu zeru waka cha.

² Chifukwa kuti ndingupima kuziŵapo mukati mwinu kanthu so kanyake cha, kweni Yesu Kristu pe, ndi iyo wakupayikika.

³ Ndipo ine ndinguŵa kwinu mu unthomboru, mu chopu, ndi mu chitenthe chikuru.

⁴ Mazu ghangu ndi chitaula changu kuti vinguŵa mu mazu ghakuwoja gha zeru waka cha, kweni mu karongoledu ka Mzimu ndi ka nthazi:

⁵ alinga kuti chivwanu chinu chireke kukho mu zeru ya ŵanthu kweni mu nthazi yaku Chiuta.

Zeru zaku Chiuta

⁶ Nakweni nako zeru tirongoro mu ŵakukhoma: ndipo kuti ndi zeru ya mgonezi uno cha, chingana nja wachirongozgi ŵamgonezi uno cha, wo ŵakutemeke ku wayurika:

⁷ kweni tirongoro zeru yakubisika yaku Chiuta, yeniyo yenga yindaŵepo migonezi, Chiuta wanguteme limu ku unkhankhu widu.

⁸ Zeru yeniyo wengavi kuyiziŵa nanga njumoza wa ŵakuwusa ŵa mgonezi uwu: chifukwa asani ŵanguyiziŵa, mphanyi ŵengavi kuŵapayika Ambuya ŵa unkhankhu.

⁹ Kweni nge ndimo kwalembeke, “Vyenivyo jiso lengavi kuviwona, ndi gutu lengavi kuvivwa mu mtima wa munthu vyengavi kubukamo, vyose vyo Chiuta waŵarongosole wo mbakumwanja.”

¹⁰ Kweni Chiuta wavivumbuliya kwaku ifwe mu Mzimu. Pakuti Mzimu yo wapenjapenja vinthu vyose, wapenja ndi vyandimba vyaku Chiuta.

¹¹ Chifukwa mu ŵanthu njani ŵaziŵa vya munthu, kweni mzimu wa munthu, wa mwake? Viyo so vyaku Chiuta kuti yumoza waviziŵa cha, kweni Mzimu waku Chiuta ndiyo.

¹² Kweni kuti taronde ifwe, mzimu wa charu cha, kweni Mzimu wakutuliya kwaku Chiuta, mwakuti tiziŵe vyo vyapaskika kwawanangwa ndi Chiuta kwaku ifwe.

¹³ Vyenivyo so tirongoro, mu mazu ghakusambizgika ndi zeru ya unthu cha, kweni mwaku gho ghasambizgika ndi Mzimu; pakung'anamuwa uneneska wa vya Mzimu kwaku wo ŵakuronde mzimu.

¹⁴ Kweni munthu wambura mzimu kuti wangaronde vyawanangwa vya Mzimu waku Chiuta cha chifukwa kwaku iyo vye kupusa; ndipo kuti waziŵa kuviteska cha, pakuti viteruzgika ndi mzimu.

¹⁵ Kweni yo wendi mzimu wateruzga vinthu vyose, iyo mweneko kuti wateruzgika ndi munthu yumoza cha.

¹⁶ “Chifukwa njani wafikapo pa chinjeru cha Mbuya, kuti wamrunguchizgenge?” Kweni ifwe te nacho chinjeru chaku Kristu.