1 ŴaKorinte 15 - Tonga Bible 1986

Chiyuka chaku Kristu ku nyifwa

¹ Kweni ndimziŵiskiyani, mwa ŵabali, evangeli weniwo ndingumtauliyani, weniwo nawo munguronde, mwenimo so mumiya,

² mwaku weniwo so mutaskikiya, ne mukoreze mazu gho ndingumtauliyani; vinu ching'anamuka chinu chingaŵa cha ŵaka.

³ Chifukwa mu vinthu vyakuzirwa vyakudanga ndingupereka kwaku imwe chenicho nacho ndinguronde, kuti Kristu wangufwa chifukwa cha vilakwa vidu, kwakulingana ndi malembo gho;

⁴ ndipo kuti wanguŵikika; ndi kuti wanguyuskika pa zuŵa lachitatu, kwakulingana ndi malembo;

⁵ ndi kuti wanguwoneka kwaku Kefa; pavuli pake ku chumi ndi ŵaŵi wo.

⁶ Pavuli wanguwoneka ku ŵabali ŵakuruska machumi pe chumi ghankhonde pa malo ghamoza, ŵaku ŵeniwo ŵanandi ku ŵachalipo, kweni ŵanyake ŵara.

⁷ Pavuli wanguwoneke Yakobe, pavuli pake ku ŵakutumika wose.

⁸ Ndipo pakumariya limu wanguwoneka kwaku ine nane, ulaka nkhu wausoposka.

⁹ Chifukwa ine nde mumana limu wa wakutumika, ndawambura kwene kutamulika wakutumika, chifukwa chakuti ine ndinguliŵemba eklesiya laku Chiuta.

¹⁰ Kweni ndi wezi waku Chiuta nde ine mo ndiliri: ndipo wezi wake wakwaku ine kuti unguŵa wawaka cha; pakuti ndatakataka kwa nthazi ukongwa kwakuruska iwo wose; ndipuuli ine cha, kweni wezi waku Chiuta wo we nane.

¹¹ Viyo na manyi ndine, pamwenga iwo, tingutaula, ndipo imwe munguvwana.

Chiyuka chidu ku nyifwa

¹² Kweni asani Kristu wataulika kuti wakuyuskika ku ŵakufwa, ŵakamba uli ŵanyake mwaku imwe kuti chiyuska cha ŵakufwa palive?

¹³ Asani chiyuska cha ŵakufwa kulive, iku chingana ndi Kristu kuti wakuyuskika cha;

¹⁴ ndipo asani Kristu walive kuyuskika, chitaula chidu nchaumbughuya, ndipo chivwanu chinu nacho nchaumbughuya.

¹⁵ Ndipo so tisanirika kuŵa visimisimi vitesi vyaku Chiuta; pakuti tingusimikizgiya ndi Chiuta kuti wanguyuska Kristu, mweniyo wengavi kunyuska, asani nadi ŵakufwa, kuti ŵayuskika cha.

¹⁶ Chifukwa asani ŵakufwa kuti ŵayuskika cha, iku chingana ndi Kristu kuti wakuyuskika cha.

¹⁷ Ndipo asani Kristu walive kuyuskika, chivwanu chinu nchaŵaka; mweche mu vyakulakwa vinu.

¹⁸ Sono wo ŵakufwiya mwaku Kristu nawo mbakuyowa.

¹⁹ Asani mu umoyo uno pe te ŵakugomekezga mwaku Kristu, iku mu ŵanthu wose ifwe te ŵasokwa kwakuruska.

²⁰ Kweni sono wayuskika Kristu ku ŵakufwa, mruwuku waku wo mbakura.

²¹ Chifukwa mwakuti mu munthu yikuza nyifwa, mu munthu so chikuza chiyuska cha ŵakufwa.

²² Chifukwa uli ndimo mwaku Adamu ŵafwiya wose, viyo so mwaku Kristu wose ŵasanduskikenge ŵamoyo.

²³ Kweni yose mu mindondomeku wake: Kristu mruwuku; pavuli pake wo mbaku Kristu, pa uzi wake.

²⁴ Pavuli po pe umari, penipo wampereka ufumu wo kwaku Chiuta Dada iyo, penipo wamwayuwa ura wose ndi mtufu wose ndi nthazi.

²⁵ Chifukwa kutenere iyo kuwusa, mpaka penipo waŵika ŵamawongu wose kusi ku marwayo ghake.

²⁶ Wamawongu wakumariya kwachiwayulika ndi nyifwa.

²⁷ “Chifukwa, Chiuta wathereske vinthu vyose kusi ku marwayo ghake.” Kweni po wanguti, “Vyose vyathereskeka,” kuwoneka kuti iyo ngwa pade yo wangumthereske vyose.

²⁸ Ndipo vyati vyathereskeke vyose kwaku iyo, po ndipo Mwana nayo watherenge kwaku mweniyo wangu­mthereske vyose, alinga kuti Chiuta waŵe vyose mwaku vyose.

²⁹ Iku ŵamchitanji wo mbakubatizikiya pa chifwa cha ŵakufwa wo? Asani kosekose ŵakufwa ŵareka kuyuskika, ŵabatizikiyanji chifukwa chawo?

³⁰ Ndipo nanga ifwe nafwe so tijariyanji mu urwani ora le lose? Kuti nthufwa zuŵa ndi zuŵa.

³¹ Ndirapa mu kujikuzga ko ndenako mwinu mwa ŵabali, ndiko nde nako mwaku Kristu Yesu Ambuyafwe.

³² Asani ulaka ndi munthu ndiguruwana ndi vikoku ku Efeso, nchine chanduwu changu? Asani ŵakufwa ŵareka kuyuskika; “Tirghenge ndi timwenge, chifukwa mawa tifwenge.”

³³ Mungaranda cha: “Mabwezi ghaheni ghatananga majaridu ghamampha.”

³⁴ Yukiyani ku urunji, ndi kuti mungalakwa cha; chifukwa ŵanyake mbajira mu kumuziŵa Chiuta; ndikamba namwe ichi alinga kuti mulengeke lilengu.

Chiyuka cha liŵavu

³⁵ Kweni panyake yumoza wafumbenge, “Wayuskika uli ŵakufwa? Ndipo ŵatuza ndi liŵavu lakutinji?”

³⁶ Mzereza we, cho umija iwe kuti chingasanduskika chamoyo cha, kwambura kuti chadanga chafwa.

³⁷ Ndipo cho umija, kuti umija iwe liŵavu lo likaŵangapo cha, kweni nje pe yija, akhumba ya trigu, pamwenga ya mbutu zinyake.

³⁸ Kweni Chiuta wayipaska liŵavu uli ndimo wangakhumbiya, ku mbeu yose liŵavu lake.

³⁹ Kuti nyama yose ndi nyama yakulinganalingana cha; kwenyama yinyake nja ŵanthu, yinyake ndi nyama ya vinyama, yinyake ndi nyama ya viyuni, ndi yinyake nja somba.

⁴⁰ Kwe maliŵavu ghakuchanya ndi maliŵavu ghapasi: kweni unkhankhu wa ghakuchanya ngwakuti e, ndipo wo wa ghapasi ngunyake.

⁴¹ Kwe unkhankhu wakuti e wa dazi, ndi unkhankhu unyake wa mwezi, ndi unkhankhu unyake wa zinyenyezi; chifukwa nyenyezi yipambana ndi nyenyezi mu unkhankhu.

⁴² Chiyuka nacho cha ŵakufwa che viyo. Limijika mu chivuzi; liyuskika mu uura-chivuzi.

⁴³ Limijika mu myuyu; liyuskika mu unkhankhu. Limijika mu unthomboru; liyuskika mu nthazi.

⁴⁴ Limijika liŵavu lakawi; liyuskika liŵavu lamzimu. Uli ndipo kuliri liŵavu lakawi, kwe liŵavu nalo lamzimu.

⁴⁵ Viyo so kwalembeka, “Munthu wakudanga yo Adamu, wanguŵa mzimu wakututa”; Adamu wakumariya yo wanguŵa mzimu wakupaska umoyo.

⁴⁶ Kweni kuti lo la mzimu ndakudanga cha, kweni lo lakawi; pavuli pake lamzimu lo.

⁴⁷ Munthu yo wakudanga ngwa pasi, ngwadongu: munthu yo wachiŵi ngwa kuchanya.

⁴⁸ Mo waliri wadongu yo, mbaviyo so ŵadongu; ndipo mo waliri wakuchanya yo, mbaviyo so ŵakuchanya.

⁴⁹ Ndipo uli ndimo tavwariya chikozgu cha wadongu yo, ndimu tamvwariya chikozgu so cha wakuchanya yo.

⁵⁰ Kweni chenichi ndititi, mwa ŵabali, nyama ndi ndopa kuti viziŵa cha kuhara ufumu waku Chiuta; chingana nchivuzi kuti chihara uwurachivuzi cha.

⁵¹ Awonani, ndikukambiyani mangari. Tose kuti tamura cha, kweni tamsanduskika,

⁵² mu ka nyengo kamanavi mu kukupiya kwa jiso, pa mbata yakumariya. Chifukwa mbata yamkumba, ndipo ŵakufwa ŵamyuskika ŵambura-chivuzi, ndipo ifwe tamsanduskika.

⁵³ Chifukwa lamawoleka ili litenere kuvwara uwurachivuzi, ndi lachifweni ili litenere kuvwara chivuzi, ndi lachifweni lenili litenere kuvwara uwura-nyifwa:

⁵⁴ kweni penipo lachivuzi lenili lavwara uwura-chivuzi, ndi lachifweni lenili lavwara uwura chifweni, po ndipo ghamukuŵapo mazu gho ghakulembeka, “Nyifwa yamezeke mu upundi!

⁵⁵ Nyifwa'we, we pani upundi wako? Nyifwa we, le pani liwozga lako?”

⁵⁶ Liwozga la nyifwa mbulakwi; ndipo nthazi ya ulakwi ndi langulu.

⁵⁷ Kweni viwongo viŵiye Chiuta, yo watipaska upundi mu Ambuyafwe Yesu Kristu.

⁵⁸ Viyo na, mwa ŵabali ŵangu ŵakwanjiwa, muŵe ŵakuti gwa, ŵambura manderezgeka, ŵakufurwiya nyengo zose mu nchitu ya Ambuya, pakuziŵa kuti mu Mbuya mlimu winu kuti ngwawaka cha.