1 ŴaKorinte 14 - Tonga Bible 1986

Vyawanangwa vinyake vyakupaskika ndi Mzimu Wakupaturika

¹ Rondoni chanju, ndipo khumbirani vyamzimu vyo, kweni ukongwa kuti mutaule.

² Chifukwa wakukambiya mu karongoroledu, kuti wakambiya ku ŵanthu cha, kweni kwaku Chiuta; chifukwa palive yumoza watuvwa; kweni wakamba mangari mu Mzimu.

³ Mu fundu yinyake, yo wataula wakambiya ŵanthu mwakuti ŵazengeke, wakhwimiskike ndi ŵasangaluskike.

⁴ Yo wakambiya mu karongoroledu wajizenga yija; kweni yo wataula wazenga eklesiya.

⁵ Ndipo ndikhumba kuti mphanyi mose mwakambiyanga mu marongoroledu, kweni ukongwa viŵi kuti mutaule. Wakutaula yo ndi mura kwakuruska yo wakambiya mu marongoroledu, kweni kuti iku waŵepo wakung'anamuwa, mwakuti eklesiya lizengeke.

⁶ Kweni sono, mwa ŵabali, asani ndingaziya kwinu wakukambiya mu marongoroledu, ndikwanduliyeninge chine, asani ndireka kumkambiyani mu uvumbuzi, pamwenga mu mziŵiru, pa­mwenga mu umchimi, pamwenga mu chisambizgu?

⁷ Chingana ndi vinthu vyambura umoyo navyo, vyakumba mazu, fyoliro pamwenga bangwi, asani vireka kupambana mukakambiru kawo, chiziŵikwenge uli cho chifyororoskeka pamwenga chikambika?

⁸ Pamwenga napo, asani mbata yingapaska mazu ghakudondeska, njani wajiskomiyenge ku nkhondo?

⁹ Viyo namwe so, kwambura kuti ndi lilime mupaska mazu ghamateskeka, chiziŵikwenge uli cho mukamba? Iku muŵenge ŵakurongorole mude!

¹⁰ Mu charu mwe mitundu yinandi ya mazu, ndipo palive ghamoza ghambura fundu.

¹¹ Viyo asani ndirive kuziŵa kang'anamulidu ka mazu gho, ndiŵenge nge ngwa mtundu kwaku yo wakamba, ndi wakukamba yo nayo so viyo kwaku ine.

¹² Viyo so imwe namwe, muchikhumbira vyawuvumbuzi wa vya mzimu, vilembeni mwakuti muruske pa kwachizenge navyo eklesiya lo.

¹³ Ndiviyo wakukambiya ndi karongoroledu, warombe mwakuti waziŵe kang'anamuwa.

¹⁴ Chifukwa asani ndirombe mu karongoroledu, Mzimu wangu uromba, kweni vinjeru vyangu viura chipasi.

¹⁵ Viyo kwati? Ndirombenge ndimzimu, ndipo ndirombenge ndi vinjeru so: ndimbenge ndi mzimu, ndipo ndimbenge ndi vinjeru navyo.

¹⁶ Ipu napo, asani utumbika ndi mzimu, yo ngwambura kuwamo wanenenge uli “Ameni” pa chiwonga chako, penipo walive kuziŵa cho urongoro?

¹⁷ Chifukwa iwe ungawonga umamphavi, kweni munyake yo kuti wazengeka cha.

¹⁸ Ndimwonga Chiuta chifukwa ine ndikamba ndi marongoroledu kwakuruska mose;

¹⁹ kweni ndipuuli mu mipingu mphanyi ndikamba ndi vinjeru vyangu mazu ghankhonde, viyo kuti ndisambizge ŵanyake nawo, kwakuruska mazu vikwi chumi mu karongoroledu.

²⁰ Mwa ŵabali, mungaŵanga ŵana mu vinjeru; kweni mu uheni muŵe twana; ndipo mu vinjeru ŵakukhoma.

²¹ Mu langulu lo kwalembeke, “Ndi ŵanthu ŵa malilime ghamwenga ndipo ndi milomo ya ŵalendo ndirongoronge ndi khamu ili; ndipo chingana kuŵi viyo kweni kuti ŵakandivwiyanga cha, atiti Ambuya.”

²² Viyo marongoroledu gho nchisimikizgu, ku ŵakuvwana cha, kweni ku ŵazirakuvwana: kweni kutaula nchisimikizgu, ku ŵazirakuvwana cha, kweni ku ŵakuvwana.

²³ Viyo asani eklesiya lose laungana pamoza, ndipo wose ŵarongoro mu marongoroledu, sono asani ŵazirakuwamo pamwenga ŵazira-kuvwana, ŵaseremo asi wanenenge kuti mwafuntha?

²⁴ Kweni asani wose ŵataula, ndipo mzira-kuvwana pamwenga mzirakuwamo waseremo, wapanikisgika ndi wose, wateseka ndi wose;

²⁵ vibisibisi vya mtima wake viwoneka pakweru; ndi viyo pakuŵa pasi kavunama wamlambiyenge Chiuta; ndi kunena kuŵanthu wose kuti nadidi Chiuta we mukati mwinu.

²⁶ Na kwati, mwa ŵabali? Penipo muwunjikana, yose we ndi sumu we ndi chisambizgu, we ndi uvumbuzi, we ndi karongoroledu, we ndi ching'anamuwa. Vinthu vyose vichitikiye kuuzengi.

²⁷ Asani munthu warongorole mu karongoroledu, ŵakambe ŵaŵi pe, pamwenga ŵatatu, kwakurulika, ndipo yumoza wang'anamuwenge,

²⁸ kweni asani wakung'anamuwa palivi iku wachetame mu mpingu; kweni wajikambiyenge pa mtima wake kwaku Chiuta.

²⁹ Ndipo ŵamchimi ŵaŵi pamwenga ŵatatu ŵakambenge, ndi ŵanyake ŵateskenge vyo vikambika.

³⁰ Kweni asani uvumbuzi wawoneka ku munyake waŵakutekapo, wakudanga yo wachetame.

³¹ Chifukwa muziŵa mose kutaula, yumoza ndi yumoza alinga kuti wose ŵasambire, ndi wose ŵachinthiskike;

³² ndipo mizimu nayo ya ŵamchimi yithereskeka ku ŵamchimi.

³³ Chifukwa Chiuta kuti ngwa chimtimbaheka cha, kweni ngwa chimangu. Uli ndi mu maeklesiya ghose gha wakupaturika,

³⁴ ŵanthukazi ŵachetame mu mipingu. Kuti kuzomerezgeka kwaku wo cha kukamba; kweni ŵathere, uli ndimo linene langulu nalo.

³⁵ Kweni asani ŵakhumba kusambira kanthu, ŵafumbe ŵarumi wawo ku nyumba; chifukwa nkhwasoni ku munthukazi kukamba mu mpingu.

³⁶ Mutitinji? Kumbi nkhwaku imwe ko mazu ghaku Chiuta ghangutuliya? Pamwenga kumbi nkhwaku imwe pe ko ghanguza?

³⁷ Asani munthu warunguruka kuti ndi mchimi, pamwenga wamzimu, waziŵe kuti vyo nditukulembiyani nchilangulu cha Mbuya.

³⁸ Kweni asani munthu wareka kuwamo ivi wareke kuwamo!

³⁹ Viyo mwa ŵabali ŵangu, khumbirani kutaula, mungakanizganga kukambiya mu marongoroledu cha.

⁴⁰ Kweni vinthu vyose vichitike kwaulemu ndi kwaurusu.