1 ŴaKorinte 12 - Tonga Bible 1986

Vyawanangwa vyakupaskika ndi Mzimu Wakupaturika

¹ Kweni pa vyamzimu, mwa ŵabali, kuti ndikhumba muŵe ŵajira cha.

² Muziŵa kuti penipo mwenga ŵamtundu, mwarandizgikiyanga ku vyangoza vyambuwu, kose kweniko mwagumizgikiyanga.

³ Chakumziŵiskani nchakuti palive yumoza, wakukambiya mu Mzimu waku Chiuta, yo watiti, “Yesu ngwakutembeka”; ndipo palive yumoza waziŵa kukamba kuti, “Yesu ndi Mbuya,” kweni mu Mzimu Wakupaturika.

⁴ Kweni ghalipo mapambanu gha vyawezi, mu Mzimu yumoza pe.

⁵ Ndipo ghalipo mapambanu gha uteŵeti, kweni Mbuya yumoza mbwenu.

⁶ Ndipo ghalipo mapambanu gha machitidu, kweni Chiuta yumoza, mweniyo ngwakuchitiyamo vyose mwaku wose.

⁷ Kweni ku munthu we yose, yumoza-yumoza, kwapaskika uvumbuzi wa Mzimu kwachimovye mu vyamampha vyose.

⁸ Chifukwa kwaku uyu kwapaskika mu Mzimu mazu gha zeru; ku munyake mazu gha mziŵiru ndi Mzimu mweniyo pe,

⁹ ku munyake chivwanu, mu Mzimu mweniyo pe; kweni ku munyake vyawezi vya michizgu, Mzimu mweniyo yumoza,

¹⁰ ndi ku munyake machitidu gha minthondwi; ku munyake umchimi, ku munyake mazaza ghakupatuwa pakati mizimu; ku munyake mitundu ya marongoroledu; ndi ku munyake kang'anamulidu ka marongoroledu.

¹¹ Kweni vyose ivi wachita ndi Mzimu mweniyo yumoza pe, wakugaŵiya we yose uli ndimo wakhumbiya.

Liŵavu limoza le ndi viŵaru vinandi

¹² Chifukwa uli ndimo liŵavu ndimoza, ndipo le navyo viŵaru vinandi, kweni vyose viŵaru vyo vya liŵavu, nanga vinandi, vye liŵavu limoza; viyo so ndi Kristu nayo.

¹³ Chifukwa mu Mzimu yumoza ifwe tose tingubatizikiya ku liŵavu limoza, ŵaYuda pamwenga ŵaGriki, ŵaŵanda pamwenga ŵanangwa; ndipo tose tingumweskeka ku Mzimu yumoza.

¹⁴ Chifukwa liŵavu nalo kuti nchiŵaru chimoza cha, kweni vinandi.

¹⁵ Asani rundi likambenge, “Chifukwa kuti ndine janja cha, kuti nde la liŵavu lo cha”; kuti lireka kuŵa la liŵavu lo chifukwa chenicho cha.

¹⁶ Ndipo asani gutu linenenge, “Pakuti ndine jiso cha, kuti nde la liŵavulo cha”; kuti lireka kuŵa la liŵavu lo chifukwa chenicho cha.

¹⁷ Asani liŵavu lose lenga jiso mphanyi kuvwa kwenga pani? Asani lose lenga kuvwa, mphanyi kunuska kwenga pani?

¹⁸ Kweni nge ndimo kuliri Chiuta waŵikamo mu liŵavu viŵaru vyo, che chose chaku vyo, nge ndimo wangukhumbiya.

¹⁹ Ndipo asani vyose vyo vyenga chiŵaru chimoza, mphanyi lenga pani liŵavu?

²⁰ Kweni ehe kwe viŵaru vinandi, mu liŵavu limoza.

²¹ Jiso kuti liziŵa cha kulinene janja, “Kuti ndikavuka iwe cha”; pamwenga mutu wo unganene marundi cha, “Kuti ndikavuka imwe cha.”

²² Awa na; kweni ukongwa kwakuruska, viŵaru vya liŵavu vyo viwoneka kuŵa vyakutomborokako vikhumbikwa,

²³ ndipo vya liŵavu vyo titivipima ulaka vya kupere rumbu, pakuvyenivyo tirundapo rumbu linandiko; ndipo vizira kunozga vidu vye nawo unozgi unandiko,

²⁴ weniwo usoŵa mu viŵaru vidu vyakunozga kwakuruska. Kweni Chiuta warungang'a pamoza liŵavu lo, wapaska rumbu linandiko ku chiŵaru cho chingupere,

²⁵ alinga kuti lingaŵamo cha gaukanu mu liŵavu lo; kweni kuti viŵaru vyake viphwererane kwakuyanayana.

²⁶ Ndipo asani chiŵaru chimoza chikomwa, viŵaru vyose vikomwe pamoza nacho; asani chimoza chirumbika, viŵaru vyose vikondwere pamoza nacho.

²⁷ Kweni imwe mwe liŵavu laku Kristu, chiŵaru che chose mu chigaŵa.

²⁸ Ndipo Chiuta wajisankhiya mu mpingu wa, pakudanga ŵakutumika, kachiŵi ŵamchimi, kachitatu ŵasambizgi, pavuli ŵakuchita minthondwi, pavuli penipo ŵakuchita vyawezi vya michizgu, vyovyu, maurongozgi, mitundu ya marongoroledu.

²⁹ Wose mbakutumika kumbi? Kumbi wose mbamchimi? Kumbi wose mbasambizgi? Kumbi wose mbakuchita minthondwi?

³⁰ Kumbi wose ŵe ndi vyawezi vya michizgu? Kumbi wose ŵakamba ndi marongoro ledu? Kumbi wose ŵang'anamuwa?

³¹ Kweni ukongwa viŵi mukhumbire vyawezi vikuruku vyo. Ndipo sono ndikurongoninga nthowa yamampha kwakuruska.