1 ŴaKorinte 11 - Tonga Bible 1986

¹ Muŵe ŵakwezga ine mo ine nane nditezge Kristu.

Kuvwinkha mutu pakusopa

² Sono ndimrumbani kuti mu vinthu vyose mwandikumbuka, ndi kuti mwasungirizga midauku yo, uli ndimo ndinguyipereke kwinu.

³ Kweni ndikhumba muziŵe, kuti munthurumi yose mutu wake ndi Kristu; ndipo mutu wa munthukazi ndi murumi wake, ndipo mutu waku Kristu ndi Chiuta.

⁴ Munthurumi yose wakuŵa ndi chivwinkhu pa mutu, wachiromba pamwenga wachitaula, walengeska mutu wake.

⁵ Kweni munthukazi yose, mweniyo waromba pamwenga wataula ndi mutu wake wambura kufukika, walengeska mutu wake, wenge ngwakumeteka.

⁶ Chifukwa asani munthukazi walive kufukika, iku wasenge sisi lake; kweni asani nkhwalilengu ku munthukazi kusengeka pamwenga kumeteka, iku wafukike.

⁷ Munthurumi kuti watenere kufukika mutucha, pakuti iyo nchikozgu ndi unkhankhu waku Chiuta: kweni munthukazi mbunkhankhu wa munthurumi.

⁸ (Chifukwa kuti munthurumi ngwa ku munthukazi cha; kweni munthukazi ngwaku munthurumi.

⁹ Chifukwa nadi kuti munthurumi wangulengeke munthukazi cha; kweni munthukazi wangulengeke munthurumi.)

¹⁰ Chifukwa chenichi muthukazi watenere kufukika mutu wake, pa chifukwa cha ŵangelo wo.

¹¹ Ndikweni, mu Mbuya munthukazi kuti we pade pa munthurumi cha, chingana ndi munthurumi pade pa munthukazi cha.

¹² Chifukwa uli ndimo munthukazi wangulengeke kutuwa ku munthurumi, viyo munthurumi nayo le wapapika ndi munthukazi. Kweni vyose vyakutuliya kwaku Chiuta.

¹³ Mwaku mwaŵeni yeruzgani: kumbi kuyiyamu munthukazi kuti warombe Chiuta kwambura kufukika?

¹⁴ Asi kaŵiru kija kakusambizgani kuti, asani munthurumi walimbika sisi, ndi lilengu kwaku iyo?

¹⁵ Kweni asani munthukazi walimbika sisi, mbunkhankhu wake? Pakuti sisi lake likupaskikiya iyo nge nchivwinkhu.

¹⁶ Kweni asani yumoza wachita suskano pakukhumba kususka waka, tirive ifwe karusu kaviyo, chingana ndimu mipingu yaku Chiuta.

Njonesku ya Ambuya

¹⁷ Kweni ndichikulanguliyani ichi, kuti ndimrumbani cha, chifukwa kuti muwungana mu umampha cha kweni mu uheni.

¹⁸ Chifukwa, chakudanga nchakuti muchiungana nge mbampingu ndituvwa mwe magaukanu mukati mwinu, ndipo kurwandi ndivwana.

¹⁹ Chifukwa nadi mungwenere kuŵa magaukanu mukati mwinu, alinga kuti ŵawoneke wo mbakurumbika.

²⁰ Viyo muchiwungana pamoza, kuti muturgha nadi njonesku ya Ambuya cha.

²¹ Chifukwa mu kurgha kwinu munthu we yose watinthimika pa kurgha kwaku yija, uyu waturgha ndi nja, ndipo uyu watumwa mpaka kuloŵe.

²² Awa na, asi mwe nazo nyumba zakumwaŵeni mwenimo nungargha ndikumwa? Pamwenga kumbi muyuyuwa mpingu waku Chiuta, ndi kuŵalengeska wo mbakusauka? Nkhakambanganji namwe? Kumbi nkhakurumbaninga mwaku chenichi? Awa kuti nditikurumbani cha.

²³ Chifukwa ine ndinguronde ku Ambuya chenicho so ndingupereka kwaku imwe, kuti Ambuya Yesu mu usiku wo wakumbolekiyanga, wanguto chiŵande.

²⁴ Ndipo wanguti wawonga, wangumenya, ndipo wanguti, “Chenichi ndi liŵavu langu, lapa chifwa chaku imwe: chenichi chitani kwachikumbuka ine.”

²⁵ Viyo so nkhombo nayo, pavuli pa koneska, wakuti, “Nkhombo iyi ndi phanganu lifya mu ndopa zangu; chenichi chitani, penipo pose mutumwa, kwachikumbuka ine.”

²⁶ Chifukwa penipo pose muturgha chiŵande chenichi, ndi mutumwa nkhombo yeniyi, mutaula nyifwa ya Ambuya mpaka wazenge.

²⁷ Ndiviyo yose wakurgha chiŵande cho pamwenga wakumwa nkhombo yo ya Ambuya kwambura kwene, wakaŵanga wakalema ku liŵavu ndi ndopa vya Ambuya.

²⁸ Kweni wadange wajesa munthu ndi viyo warghepo chiŵande cho, ndi wamweko nkhombo yo.

²⁹ Chifukwa wakurgha ndi wakumwa pakureka kuteska liŵavu lo. Watijirghiya ndi watijimwiya chisusa.

³⁰ Chifukwa chenichi ŵanandi mbakutomboroka ndi mbarwali mwaku imwe, ndipo ŵanandi ŵara tulo.

³¹ Kweni asani tajeruzganga taŵeni mu uneneska, mphanyi kuti tatinge teruzgikenge cha.

³² Kweni pakweruzgika tilangika ndi Mbuya, alinga kuti tingasuskikiya pamoza ndi charu cha.

³³ Ndiviyo, mwa ŵabali ŵangu, muchiungana pamoza pakurgha, lindizganani.

³⁴ Ndipo asani yumoza watufwa msara, warghe kwake ku nyumba, alinga kuti mureke kuwungirana ku chisusa. Ndipo vyo vya jako ndazamurongoro po ndiziyenge.