1 ŴaKorinte 10 - Tonga Bible 1986

Chenjezgu lakumikana ndi ŵachiuta ŵangoza

¹ Chifukwa kuti ndikhumba cha, mwa ŵabali, mureke imwe kuziŵa, kuti auskefwe wose ŵenga pasi pa mtambo wo, wose ŵanguporota mu nyanja yo;

² ndipo wose ŵangubatizikiya mwaku Mosese, mu mtambo wo ndi mu nyanja yo;

³ ndipo wose ŵangurgha chakurgha cha Mzimu waku Chiuta unguŵapaska;

⁴ ndipo wose ŵangumwa chakumwa cha Mzimu wo. Chifukwa ŵamwanga ku Jarawe lamzimu lakuŵarondo: ndipo Jarawe lo lenga Kristu.

⁵ Kweni Chiuta wengavi kukondwa ndi urapasi waku wo; rekani ŵangumwaranikiya mu bozwa.

⁶ Ndipo sono ivi vyakutichenjezga ifwe, mwakuti tingakhumbiranga ifwe viheni cha, uli ndimo ŵangukhumbiriya iwo.

⁷ Ndipo tingaŵanga ŵakusopangoza cha uli mbanyake ŵaku wo; nge ndimo kwalembeke, “Khamu linguteka pasi kurgha ndi kumwa ndipo lingusoka kwachivina.”

⁸ Ndipo tingaŵanga ŵareŵi cha, uli ndimo ŵanyake ŵaku wo ŵanguchitiya ndipo mu zuŵa limoza viguŵa vikwi machumi ghaŵi ndi vitatu.

⁹ Tingesanga Ambuya cha, nge ndimo ŵangwese ŵanyake ŵaku wo, ndipo ŵangumara ndi njoka zo.

¹⁰ Ndipo mungadinginikanga cha, nge ndimo ŵanyake ŵaku wo ŵangudinginikiya, ndipo ŵangumara ndi wakubaya yo.

¹¹ Ivi vinguŵaŵiya ŵa nge nchakuteskiyapo; ndipo vingulembeke kutichenjezga ifwe, paku taŵenifwe wafikiya umari wa migonezi.

¹² Viyo yo ngwakujipima kuti watuma, wacheŵe vinu wangawa.

¹³ Kuti kakuziyanipo cha kesedu kakupambana ndiko kaziya pa munthu we yose. Ndipo Chiuta ngwamagomekezgeka, mweniyo kuti wangatayirizga imwe cha kuti mweseke kwakujumpha cho mungakunthiyapo; kweni pamoza ndi kesedu ko wapaskenge so nthowa yakuposomokiyapo, alinga kuti muziŵenge kukunthiyapo.

¹⁴ Viyo mwaŵakwanjiwa ŵangu, thaŵani kusopa-ngoza.

¹⁵ Ndikamba nge nkhu ŵakuwamo; jeruzgeni mwaŵeni cho ndinena.

¹⁶ Chandi cha chitumbiku cho titumbika, asi tisangana mu ndopa zaku Kristu? Chiŵande cho timenya, asi tisangana mu liŵavu laku Kristu?

¹⁷ Pakuti chiripo chiŵande chimoza, ifwe taŵanandi te liŵavu limoza; chifukwa tose tisanganapo pa chiŵande cho chimoza.

¹⁸ Thoŵani kachitiru ka ŵaYisraele: asi wakurgha vya sembe vyo mbakusangana ndi jochero lo?

¹⁹ Kumbi nding'anamuwanji ndi ichi? Ndiku kuti nchakubayikiya changoza nkhanthu kumbi? Pamwenga kuti changoza nkhanthu kumbi?

²⁰ Awa na, vyo ŵamitundu ŵabaya, ŵabayiya ŵademone, kuti ŵabayiya kwaku Chiuta cha. Kuti ndikhumba imwe kuŵa ŵakusangana ndi ŵademone cha.

²¹ Kuti muziŵa cha kumwa chandi cha Mbuya ndi chandi cha ŵademone: kuti muziŵa cha kusanganapo gome la Mbuya ndi gome la ŵademone.

²² Pamwenga tisosomole Mbuya ku sanji, kumbi? Kumbi te ŵanthazi ifwe kwakuruska iyo?

²³ “Vinthu vyose vyamachitika”; kweni kuti vyose vitovya cha. “Vinthu vyose vyamachitika”; kweni kuti vyose vizenga cha.

²⁴ Paŵevi yumoza wakujilembeze umampha wa paku vija kweni yose wapa munyake.

²⁵ Chose cho chiguliskika pa msika wa nyama rghani, ndipo rekani kufumbapo kanthu kakuguŵiskana mu njuŵi cha.

²⁶ Chifukwa, “Ncha Ambuya charu chapasi, ndi uzali wake.”

²⁷ Asani yumoza wa ŵambura chivwanu wakudanani, ndipo mukhumba kuruta; rghanipo chose cho chajarikikiya imwe, kwambura kufumbapo kanthu pa chifukwa cha njuŵi.

²⁸ Kweni asani yumoza watikuneniyani, “Ichi ncha vyakubayikiya changoza,” mungarghangapo cha, pa chifukwa chaku yuwa warongoro, ndi chifukwa cha njuŵi:

²⁹ kuti ndinena njuŵi zaku iwe wamweni cha, kweni za munyake yo; iku reka kurgha chifukwa wanangwa wangu uteruzgika uli ndi njuŵi za munthu munyake?

³⁰ Asani ine ndisanganapo pakurgha ko ndawonge kali, chifukwa chine ndisuskika kwawaka paku cho ndiwonge?

³¹ Viyo chingana muturgha, chingana mutumwa, chingana muchitanji, chitiyani vyose ku unkhankhu waku Chiuta.

³² Mungaguŵiska ŵaYuda, chingana mbaGriki, chingana ndi mpingu waku Chiuta cha:

³³ ulaka ndine nane mwaku vyose nditesa ndikondweska wose, ndawakulembe chanduwu chaku ndamweni cha, kweni cha ŵanandi wo, alinga kuti ŵataskike.