1 ŴaKaronga 4 - Tonga Bible 1986

Karonga Solomoni wenga karonga wa Yisraele yose

¹ Karonga Solomoni wenga karonga wa ŵaYisraele wose,

² ndipo izi ndizu zenga nduna zake za pachanya: Azariya mwana waku Zadoki wenga mzukuru;

³ Eliholefi ndi Ahija ŵana ŵaku Shisha ŵenga ŵalembi; Yehosafati mwana waku Ahiludi wenga mlembi wa makani;

⁴ Benaya mwana waku Yehoyada wenga wakutufuliya liŵanja lankhondo; Zadoki ndi Abiyatara ŵenga ŵazukuru;

⁵ Azariya mwana waku Natani wenga wakutufuliya ŵarongozgi; Zabudu mwana waku Natani wenga mzukuru ndi bwezi la karonga;

⁶ Ahishara ndiyo watufuliyanga nyumba ya karonga; ndipo Adoniramu mwana waku Abda wenga wakutufuliya ŵanchitu ŵakuchichizgika.

⁷ Solomoni wenga ndi ŵamirizi chumi pachanya ŵaŵi (12) pachanya pa Yisraele yose, ŵeniwo ŵanozganga vyakurgha vyakuza ku karonga ndi mbumba yake; munthu ndi munthu wangujinozge vyakurgha vya mwezi umoza mu chirimika.

⁸ Agha ndighu ghenga mazina ghawo; Benhuri mu charu cha mitunthu chaku Efraimu;

⁹ Benedekera muMakazi, Shalbimu, Betshemeshi, ndi Elon-betehanani;

¹⁰ Benhesedi, mu Aruboti (kwaku uyu kwenga Soko ndi charu chose cha Heferi);

¹¹ Benabinadabu, mu Nafatadori yose (wenga ndi Tafata mwana waku Solomoni nge ndi muwoli wake);

¹² Bana mwana waku Ahiludi, mu Tanaka, Megido, ndi Betesheani yose yo wa pafupi ndi Zaretani pasika pa Yezerele, kutuwa Betesheani kwachifika ku Abelemehola kwachifika kusirgha kwa Jokumeamu;

¹³ Bengaberi, mu Ramoti-gileada (wenga ndi mizi yaku Jairi, mwana waku Manase, yo yemu Gileada; ndipo wenga ndi chigaŵa cha Argobu, cho chemu Bashani, misumba yikuru machumi nkhondi ndi limoza (60) ya malinga ndi mipiringizgu ya mkuŵa);

¹⁴ Ahinadabu mwana waku Ido mu Mahanaimu;

¹⁵ Ahimazi, mu Naftali (wanguto Besemati mwana waku Solomoni kuŵa muwoli wake);

¹⁶ Bana mwana waku Hushai, mu Ashere ndi Beloti.

¹⁷ Yehosafati mwana waku Paruwa, muIsakara;

¹⁸ Shimei mwana waku Ela, muBenjamini;

¹⁹ Geberi mwana waku Uri, mu charu cha Gileada, charu chaku Sihori karonga wa Amori ndi Ogi karonga wa Bashani. Ndipo mwenga murongozgi yumoza mu charu chaku Yuda.

²⁰ Yuda ndi Yisraele unandi wawo wenga nge ndi mchenga wakulikumba la nyanja, ŵarghanga ndi kumwa ndipo ŵenga ŵakukondwa.

²¹ Solomoni wanguwusa pa maufumu ghose kwamba ku Efrate kwachifika ku charu cha ku ŵaFilisti ndi ku mphaka ya Egipiti, ŵanguza ndi mithulu, ŵangutataliya Solomoni mazuŵa ghose gha umoyo wake.

²² Vyakurgha vyaku Solomoni vya zuŵa limoza vinguŵa myeso machumi ghatatu (30) ya ufwa wakusililika ndi myeso machumi ghankhonde ndi limoza (60) ya ufwa wakuseŵa,

²³ ng'ombe chumi limoza (10) zakututuŵa, ndi ng'ombe machumi ghaŵi (20) zakuliskika umampha-chipozwa, ndi mberere machumi pe chumi (100) kwambura kusazgako ŵana ŵa mbuzi, ndi mphoyo, ndi mphala, ndi nyoli zakututuŵa.

²⁴ Pakuti wenga ndi muwusu pa chigaŵa chose cha kuzambwe kwa Efrate kutuwa ku Tifisa mpaka ku Gaza, pa ŵakaronga wose kuzambwe kwa Efrate; ndipo wenga ndi chimangu mu vigaŵa vyose vyakumuzunguliya.

²⁵ Ndipo Yuda ndi Yisraele ŵanguja mwambura suzgu, kwamba ku Dani mpaka Beresheba, munthu yose wanguja pasi pa mphereska yake ndi pasi pa mkuyu wake, mazuŵa ghose ghaku Solomoni.

²⁶ Solomoni wanguŵa ndi vikwi machumi ghanayi (40,000) vya makhora gha ŵakavalo ŵa magareta, ndi vikwi chumi ndi viŵi (12,000) vya ŵakukwera pa ŵakavalo.

²⁷ Ndipo ŵara-ŵara wo ŵangupereka kurgha kwa karonga Solomoni, ndi kwaku wose wo ŵanguza ku gome la karonga, we yose mu mwezi wake; kuti ŵangupereŵezgapo nanga nkhanthu kamoza cha.

²⁸ Kurgha kwa barile ndi uteka wake vya ŵakavalo ndi ŵakavalo ŵapusu ŵanguza navyo ku malo kweniko vyakhumbikwanga, we yose kwakuyana ndi mlimu wake.

²⁹ Ndipo Chiuta wangupaska Solomoni zeru ndi kuwamo vyakuruska pa mweso, ndi kukuwa kwa vinjeru nge ndi mchenga wa palikumba la nyanja,

³⁰ viyo kuti zeru yaku Solomoni yinguruska zeru za ŵanthu wose ŵaku vuma, ndi zeru yose ya mu Egipiti.

³¹ Pakuti wenga wa zeru kwakuruska ŵanthu wose ŵanyake, wazeru kuruska Etani muEzrahi, ndi Hemani, Kalkolo, ndi Darda, ŵana ŵaku Maholo, ndipo mbiri yake yenga mu mitundu yose kwakuzunguliya.

³² Wangukamba so zinthanthi vikwi vitatu (3,000); ndipo sumu zake zenga chikwi chimoza ndi zinkhonde (1,005).

³³ Wangukamba gha miti, kwamba sidara lo le mu Lebanoni kwachifika ku hisopo lo lime mu chimati; wangukamba so gha zinyama, viyuni, ndi vyakukwaŵa pasi, ndi somba.

³⁴ Ndipo ŵanthu ŵangutuwa kumakhamu ghose kuzachivwa zeru zaku Solomoni ŵangutuwa ku ŵakaronga wose ŵa charu chapasi, wo ŵanguvwa gha zeru zake.