1 ŴaKaronga 21 - Tonga Bible 1986

Yezebelu wabayiska Naboti

¹ Sono Naboti mu Yezerele wenga ndi munda wa mphereska mu Yeserele pakuŵandikana ndi nyumba ya ufumu yaku Ahabu karonga wa Samaria.

² Ndipo pavuli paku ichi Ahabu wanguti kwaku Naboti, “Undipaske munda wako wa mphereska, kuti ndiwusanduske munda wa minkhwani, pakuti we pafupi ndi nyumba yangu, ndipo ndikakupaskanga munda wa mphereska wamamphaku kuripa wo, pamwenga asani chiwoneka kuŵa chamampha kwako, ndikakupaskanga ndrama pa mtengo wake.”

³ Kweni Naboti wanguti kwaku Ahabu, “Ambuya ŵakana kuti ndikupaske chihara cha ada.”

⁴ Ndipo Ahabu wangusere mu nyumba yake wakufya mtima ndi wakuzitiskika, chifukwa chaku cho Naboti mu Yezerele yo wangukamba kwaku iyo, pakuti wangukamba kuti, “Kuti ndikupaskenge cha chihara cha ada.” Ndipo wangula pa chita chake, ndi wangung'anamukiya kunyake chisku chake, ndipo wangukana kurgha.

⁵ Kweni Yezebelu muwoli wake wanguza kwaku iyo, wanguti, “Nchifukwa chine mzimu wako wakaripa kwakuti wakana kurgha?”

⁶ Ndipo iyo wanguti, “Chifukwa ndingukamba ndi Naboti mu Yezerele ndinguti, ‘Undipaske munda wako wa mphereska tigulane ndi ndrama; pamwenga napu, asani chingakukondweska, ndikupaske munda unyake wa mphereska kugulizgana’; ndipo iyo wangwamuka, ‘Kuti ndikupaskenge cha munda wangu wa mphereska.’ ”

⁷ Ndipo Yezebelu muwoli wake wanguti kwaku iyo, “Kumbi uteruzga Yisraele sono? Yuka, urghe kurgha, ndipo mtima wako usangaruke; ine ndikakupaskanga munda wa mphereska waku Naboti mu Yezerele yo.”

⁸ Viyo Yezebelu wangulemba ŵakalata mu zina laku Ahabu, wangudidimizgapo chizighiriyu chake, ndipo wangutuma ŵakalata wo ku ŵaraŵara ndi ŵanangwa wo ŵajanga ndi Naboti mu msumba wake.

⁹ Ndipo wangulemba viyo mu ŵakalata wo, “Memezani kufunga, ndipo mumukwezge pachanya Naboti mukati mu ŵanthu.

¹⁰ Ndipo mumike ŵanthu ŵatesi ŵaŵi ŵakumikana nayo, ndipo yaŵa ŵampaske mulando, kunena kuti, ‘Iwe watuka Chiuta ndi karonga.’ Pavuli mumutuzge, mumudine ndi mya kuti wafwe.”

¹¹ Ndipo ŵanthu ŵamu msumba wake, ŵara ndi ŵanangwa wo ŵajanga mu msumba, wanguchita nge ndimo Yezebelu wangutumiya mazu kwaku iwo. Ulaka ndimo kungulembeke mu ŵakalata wo wanguŵatumiya.

¹² Wangumemeza kufunga, ndipo ŵanguŵika Naboti pachanya mukati mu ŵanthu.

¹³ Ndipo ŵanthu ŵatesi ŵaŵi wo ŵangusere ndi ŵanguja pasi pakuthyana nayo, ndipo ŵanthu ŵatesi wo ŵangutole Naboti mlando paurongo pa ŵanthu, ŵanguti, “Naboti wangutuka Chiuta ndi karonga.” Viyo ŵangumutuzga mu msumba ŵangumudina ndi mya wangufwa.

¹⁴ Pavuli ŵangutuma kwaku Yezebelu, kuti, “Naboti wadinika ndi mya, wafwa.”

¹⁵ Wati wavwa ichi Yezebelu kuti Naboti wadinika ndi mya ndipo wafwa, wangunena ndi Ahabu, “Yuka, uto munda wa mphereska waku Naboti muYezerele yo kuŵa wako, weniwo wangukana kukupaska pa ndrama; pakuti Naboti kuti ngwamoyo cha, kweni ngwakufwa.”

¹⁶ Ndipo wanguti wavwa Ahabu, kuti Naboti wafwa, wangusoka wangusikiya ku munda wamphereska waku Naboti kwachiwuto kuŵa wake.

¹⁷ Pavuli mazu gha Ambuya ghanguza kwaku Eliya muTishibi, ghakuti,

¹⁸ “Soka, ruta kwachikumana ndi Ahabu karonga waYisraele yo wemu Samaria; ehe, we mu munda wa mphereska waku Naboti, mo waya kwachijitole kuŵa wake.

¹⁹ Ukanene kwaku iyo, ‘Viyo atiti Ambuya, “Kumbi wabaya ndi kuphanga so?” ’ Ndipo ukanene, kuti, ‘Viyo atiti Ambuya, “Mu malo mwenimo ŵagaru ŵanyanganga ndopa zaku Naboti, ndimu so ŵagaru ŵakanyanganga ndopa zako.” ’ ”

²⁰ Ahabu wanguti kwaku Eliya, “Kumbi wandisaniya, wa mphindikwa wangu we?” Wangwamuka, “Ndakusaniya, chifukwa wajiguliska wamweni kuchita mphurupuru mu maso gha Ambuya.

²¹ Ehe, ndikazanga ndi uheni paku iwe; ndikakupeyanga tetete, ndipo ndikadumuwangako kwaku Ahabu munthurumi yose, kapolo pamwengamwanangwa, mu Yisraele,

²² ndipo ndikayichitanga nyumba yako nge ndi nyumba yaku Yeroboamu mwana waku Nebati, ulaka ndi nyumba yaku Basha mwana waku Ahija, chifukwa cha ukari wo wandisosomoliyako, ndi chifukwa chakuti wachitiska Yisraele kulakwa.

²³ Ndipo ghaku, Yezebelu, Ambuya anguti, ‘Wagaru ŵakarghanga Yezebelu mukati mwa malili ghaku Yezerele.’

²⁴ We yose yo ngwaku Ahabu yo wakafwiyanga mu msumba ŵagaru ŵakarghanga, ndipo yose yo wakafwiyanga ku bwaro viyuni vya mude vikarghanga.”

²⁵ Pengavi yumoza mweniyo wangujiguliska kuchita mphurupuru mu maso gha Ambuya, kwakulingana ndi Ahabu, mweniyo wangunyengeka ndi Yezebelu muwoli wake.

²⁶ Wanguchita kwa unyakazi ukongwa pakurondo ŵangoza, ulaka ndimo ŵanguchitiya ŵaAmori, ŵeniwo Ambuya anguŵataya paurongo pa ŵaYisraele.

²⁷ Ndipo penipo Ahabu wanguvwa mazu gho, wanguparuwa vyakuvwara vyake, wanguvwara chigudulu ndi wangufunga, ndi wangugona mu chigudulu, ndipo wangwendayenda ndi chitima.

²⁸ Mazu gha Ambuya ghanguza kwaku Eliya muTishibi, ghakuti,

²⁹ “Kumbi wawona mo wajiyuyuliya Ahabu paurongo pangu? Chifukwa chakuti wajiyuyuwa, kuti ndikatolenga suzgu yo mu mazuŵa ghake cha, kweni mu mazuŵa gha ŵana ŵake ndikatolenga suzgu yo pa nyumba yake.”