1 ŴaKaronga 19 - Tonga Bible 1986

Eliya wathaŵa Yezebelu

¹ Ahabu wangutauliya Yezebelu vyose vyo Eliya wanguchita, ndi mo wangubayiya ŵamchimi ndi lipanga.

² Sono Yezebelu wangutuma thenga kwaku Eliya, kuti, “Viyo so ndimu ŵachitiyi ŵachiuta kwaku ine, ndi kuruskako so, asani umoyo wako ndirekenge kuwuchita ulaka mbumoyo wa yumoza waku wo pa nyengo nge ndi iyi la mawa.”

³ Sono wangofyerwa, ndipo wangusoka ndi wanguruta kupozomoska umoyo wake, wanguza ku Beresheba, waku Yuda, ndi wangusiya mteŵeti wake kwenikuwa.

⁴ Kweni iyo wangwenda lwendo la zuŵa limoza mu bozwa, wanguza ndi wanguja pasi musina mu kamuti ka mweyo; ndipo wangupempha kuti mphanyi wangufwa, wakuti “Mbwenu kwafiskika sono, Ambuya mwe, toni umoyo wangu; pakuti kuti nde wamamphaku cha kuruska ŵada.”

⁵ Ndipo wangula pasi, wangugona musina mu kamuti ka mweyo, ndipo ehe, mungelo wangumukwaska ndi wanguti, kwaku iyo, “Yuka ndi urghe.”

⁶ Ndipo wangulereska, awonani, ku mutu kwake kwenga chiŵande chakocheka pa mya ya moto ndi balasuma wa maji. Wangurgha ndi kumwa, wangula so pasi.

⁷ Ndipo mungelo wa Ambuya wanguza so kachiŵi, wangumukwaska wanguti, “Yuka ndi urghe, vinu ulendo ukakuŵiyanga uzitu.”

⁸ Ndipo wanguyuka wangurgha ndi kumwa, ndipo wanguruta mu nthazi ya kurgha kuwa mazuŵa machumi ghanayi msana ndi usiku ku Horebu, phiri laku Chiuta.

Eliya ku phiri la Horebu

⁹ Ndipo wanguza mu mphanji, ndi wangugona mwenimuwa; ndipo ehe, mazu gha Ambuya ghanguza kwaku iyo, ghakuti, “Uchitanji kuno, Eliya?”

¹⁰ Wanguti, “Ndachitiya sanje weniukongwa Ambuya, Chiuta wa maŵanja; pakuti ŵaYisraele ŵajowo phanganu linu, ŵabwangandukiya pasi viguŵa vinu vya sembe, ŵabaya ŵamchimi ŵinu ndi lipanga, ndipo ine, ine pe ndija ndajako, ndipo ŵapenja umoyo wangu, kuti akoso.”

¹¹ Ndipo wanguti, “Rutanga, ukami pa phiri paurongo pa Ambuya.” Ndipo ehe, Ambuya angudumuwapo, ndipo mphepo yikuru ndi ya nthazi yinguswa mapiri, ndipo yinguswa tumanatumana majarawe paurongo pa Ambuya, kweni Ambuya kuti ŵenga mu mphepo yo cha, pavuli pa mphepo penga chidiririzi, kweni Ambuya kuti ŵenga mu chidiririzi cho cha;

¹² pavuli pa chidiririzi moto, kweni Ambuya kuti ŵenga mu moto cha, ndipo pavuli pa moto penga mazu ghakuvwika kamanakamana.

¹³ Ndipo Eliya wanguguhavwa, wangubenekere chisku chake mu chirundu chake, wangutuwa ndi wanguma pa khomo la mphanji. Ndipo ehe, kunguza mazu kwaku iyo; ghakuti, “Uchitanji pano Eliya?”

¹⁴ Wanguti, “Ndachitiya sanje Ambuya, Chiuta wa maŵanja weni ukongwa; pakuti ŵaYisraele ŵajowo phanganu linu, ŵataya pasi viguŵa vinu vya sembe, ŵabaya ŵamchimi ŵinu ndi lipanga, ndipo ine, ine pe ndija, ndajako, ndipo ŵapenja umoyo wangu, kuti ŵakoso.”

¹⁵ Ndipo Ambuya anguti kwaku iyo, “Rutanga, uwere mu nthowa yako kuya ku bozwa la Damasko, ndipo utakuti wachifika, ukapake mafuta Hazaeli kuŵa karonga waSiriya,

¹⁶ ndipo Jehu mwana waku Mimshi, wakumupaka mafuta kuŵa karonga waku Yisraele, ndipo Elisha mwana waku Shafati waku Abele-mehola wakumupaka mafuta kuŵa mchimi mu malo ghako.

¹⁷ Ndipo mweniyo wakapozomokanga ku lipanga laku Hazaeli wakamubayanga ndi Jehu ndipo yo wakapozomokanga ku lipanga laku Jehu wakamubayanga ndi Elisha.

¹⁸ Ndipuuli ndikasiyangamo vikwi vinkhonde ndi viŵi (7,000) mu Yisraele, makongono ghaku ŵeniwo ghalivi kujikamiya Bala ndi mlomo wose waku wo ulivi kumufyofyontha.”

Kudanika kwaku Elisha

¹⁹ Viyo wangutuwako kuwa, ndi wangusaniya Elisha mwana waku Shafati, wangumusaniya wachilima, ndi ng'ombe za vipingu chumi ndi ziŵi paurongo pake, iyo wenga ndi ya chumi ndi ziŵi. Eliya wangumurutiliya po wenga ndipo wangupong'a chirundu chake paku iyo.

²⁰ Ndipo wangujowo ng'ombe, ndi wanguchimbiriya Eliya, wanguti, “Akani nkhafyofyonthe ada ndi ama, pavuli ndikalondonga iwe.” Ndipo wanguti kwaku iyo, “Were so vuli, pakuti kumbi ndachitanji kwaku iwe?”

²¹ Ndipo wanguweko kukumurondo, wangu to vipingu vya ng'ombe, wanguzibaya, ndipo wangubika nyama yake pamoza ndi vipingu wangupaska ku ŵanthu ndipo ŵangurgha. Pavuli wangusoka wangurondo Eliya, ndipo wangumuteŵete.