1 ŴaKaronga 18 - Tonga Bible 1986

Eliya ndi ŵamchimi ŵaku Bala ku phiri Karmele

¹ Pavuli pa mazuŵa ghanandi, mazu gha Ambuya ghanguza kwaku Eliya, mu chirimika cha chitatu, ghakuti, “Ruta, ukajirongo kwaku Ahabu, chifukwa ndikatumanga vuwa pa charu chapasi.”

² Viyo Eliya wanguruta kwachijirongo kwaku Ahabu. Pa nyengo iyi chilala chenga chikuru mu Samaria.

³ Ndipo Ahabu wangudana Obadiya yo wenga wakutufuliya nyumba. (Sono Obadiya wengawakopa Ambuya ukongwa;

⁴ ndipo penipo Yezebelu wangubaya ŵa mchimi ŵa Ambuya, Obadiya wanguto ŵa mchimi machumi pe chumi (100) wanguŵabisa machumi ghankhonde ghankhonde mu mphanji, ndipo wanguŵapaska kurgha ndi maji.)

⁵ Ahabu wanguti kwaku Obadiya, “Ruta mu charu ku visima vyose vya maji ndi ku madambo ghose; vinu tingasaniya uteka ndi kutaska ŵakavalo ndi nyulu kuŵa vyamoyo, ndikuti vireke kutayikapo vinyama vinyake.”

⁶ Viyo ŵangugaŵa charu pakati pawo kwachiporotamo, Ahabu wanguserere kwaku vija, Obadiya wanguserere kwaku yija.

⁷ Ndipo penipo Obadiya wenga mu nthowa, Eliya wangukumana nayo, ndipo Obadiya wangumuziŵa, ndi wanguwa pa maso pake, ndipo wanguti, “Kumbi ndimwe, mbuyangu Eliya?”

⁸ Ndipo wangumwamuka, “Ndine, Ruta, kamunene mbuyako, ‘Ehe, Eliya we kuno.’ ”

⁹ Ndipo Obadiya wanguti, “Ndalakwanji, po mukhumba kupaska muŵanda winu mu janja laku Ahabu, kuti wandibaye.

¹⁰ Po aliri amoyo Ambuya Chiuta winu, kulivi mtundu pamwenga ufumu kweniko mbuyangu walivi kutumako kwachipenja imwe, ndipo asani ŵangakamba, kuti, ‘We kuno cha,’ wachitiskenge rapu ufumu wo pamwenga mtundu wo kuti ŵalivi kumusaniyani.

¹¹ Sono imwe mutiti, ‘Ruta, kamunene mbuyako, “Ehe, Eliya wepano.” ’

¹² Ndipo ruŵi ndichipatukako kwaku imwe, Mzimu wa Ambuya ukakunyamuliyanga ko ndilivi kuziŵako ine, viyo asani ndita chinene Ahabu ndipo watondekenge kukusaniyani wakandibayanga, chingana ine ndamuŵanda winu nditopa Ambuya kutuwa ku uhurwa wangu.

¹³ Kumbi alivi kumukambiya mbuyangu chenicho ndinguchita po Yezebelu wangubaya ŵamchimi ŵa Ambuya mwenimo ndingubisiya ŵa mchimi machumi pe chumi (100), mo ndinguŵabisiya mumphanji machumi ghankhonde ghankhonde, kuŵaliska chiŵande ndi maji?

¹⁴ Ndipo sono mutiti, ‘Ruta, kanene mbuyako, “Ehe, Eliya we kuno,” ’ wakundibaya.”

¹⁵ Ndipo Eliya wanguti, “Mo aliri amoyo Ambuya ŵamaŵanja, ŵeniwo ndituma paurongo pawo, kwakuneneska ndikajirongonga kwaku iyo msana wale.”

¹⁶ Viyo Obadiya wanguruta kwachikumana ndi Ahabu, wangumunene, ndipo Ahabu wanguruta kwachikumana ndi Eliya.

¹⁷ Penipo Ahabu wanguwona Eliya, Ahabu wanguti kwaku iyo, “Kumbi ndiwe, iwe wakusuzga Yisraele?”

¹⁸ Ndipo wangwamuka, “Ine ndirivi kusuzga Yisraele, kweni iwe ndiwe wachita ichi, ndi nyumba ya ausu, chifukwa mukujowo malangulu gha Ambuya, mukurondo ŵa Bala.

¹⁹ Viyo sono tuma ndi uwungang'e ŵaYisraele wose kwangu pa phiri Karmele, ndi ŵamchimi machumi pe chumi ghanayi ndi machumi ghankhonde (450) ŵaku Bala ndi ŵa mchimi machumi pe chumi ghanayi (400) ŵaku Ashera, ŵeniwo ŵaturgha pa gome laku Yezebelu.”

²⁰ Viyo Ahabu wangutuma ku ŵaYisraele wose ndi wanguwungang'a pamoza ŵa mchimi pa Phiri Karmele.

²¹ Ndipo Eliya wanguza pafupi ndi ŵanthu wose, wanguti, “Mpaka zuŵanji mwendenge ŵakuganthiyaganthiya ndi makhumbo ghaŵi ghakupambana? Asani Ambuya ndiwo Chiuta, murundoni, kweni asani ndi Bala, iku rondoni mweniyo.” Ndipo ŵanthu kuti wangumwamuka nanga ndi mazu cha.

²² Eliya wanguti ku ŵanthu, “Ine, ndipo ine pe, ndine ndajapo mchimi wa Ambuya; kweni ŵa mchimi ŵaku Bala mbanthu wo ŵe machumi pe chumi ghanayi ndi machumi ghankhonde (450).

²³ Chichitike kuti nkhuzi ziŵi zipaskike kwaku ifwe, ndipo iwo ŵasankhepo nkhuzi yimoza yawo, ŵayidumuwe yimana yimana ŵayiŵike pa nkhuni pachanya kweni ŵareke kuŵikako moto; ndipo ine nane ndirongosonge nkhuzi yinyake yo ndi kuyiŵika pa nkhuni, kuŵikako moto cha.

²⁴ Ndipo mudane pa zina laku chiuta winu, ine ndikadananga pa zina la Ambuya, ndipo Chiuta yo wamukenge ndi moto, ndiyo ndi Chiuta.” Ndipo ŵanthu wose ŵangwamuka kuti, “Ghakambika umampha.”

²⁵ Sono Eliya wanguti ku ŵamchimi ŵaku Bala, “Jisankhiyeni nkhuzi yimoza ndipo mudange ndimwe kuyirongoso, pakuti imwe mwe ŵanandi ndipo mudane pa zina laku chiuta winu kweni mungaŵikangako moto cha.”

²⁶ Ndipo ŵanguto nkhuzi yo ŵangupaskika ŵanguyirongoso, ndi ŵangudana pa zina laku Bala kwamba ndi mlenji mpaka msana pakati, “Bala we, utamuke!” Kweni pengavi mazu, ndipo pengavi yo wangwamuka. Ndipo ŵanguganthiyaganthiya pa chiguŵa cha sembe cho ŵanguchita.

²⁷ Ndipo pa msana pakati Eliya wanguŵaseka, wanguti, “Bongoninga ukongwa, pakuti ndi chiuta; akhumba waghanaghana, pamwenga waya kunyake, pamwenga wepa ulendo, pamwenga ankhumba wagona, iko watenere kumuyuska.”

²⁸ Ndipo ŵangubongo ndi mazu gha mkankha ŵangujicheka-cheka ndi malipanga ndi vimayi kwakulingana ndi lusu lawo mpaka ndopa zinguchucha.

²⁹ Unguti waruta msana pakati, ŵangurutiliya kujikweŵeska mpaka nyengo yakupereke visopo, kweni kwengavi limazu; pengavi yumoza wangwamuka, pengavi yo wanguphwereko.

³⁰ Sono Eliya wangunena ndi ŵanthu wose, “Ndereni kunu kufupi.” Ŵanthu wose ŵanguza kufupi, ndipo wangurongose so chiguŵa cha sembe cha Ambuya cho chinguwiskika pasi.

³¹ Eliya wanguto mya chumi ndi yiŵi, kwakuyana ndi unandi wa mafuku gha ŵana ŵaku Yakobe, kwaku mweniyo mazu gha Ambuya ghanguza, ghakuti, “Yisraele likaŵanga zina lako.”

³² Ndipo ndi mya yo wanguzenga chiguŵa cha sembe mu zina la Ambuya. Ndipo wangukumba ngalande kuzunguliya chiguŵa, yikuru yakuti yingajamo myeso jiŵi ya mbuto.

³³ Ndipo wanguyalika umampha nkhuni, ndi kudumuwa nkhuzi mathuŵi mathuŵi ndi kughaŵika pa nkhuni pachanya. Ndipo wanguti, “Zazani misuku yinayi ya maji, mughadire pa sembe yakocha ndi pa nkhuni.”

³⁴ Wanguti, “Chitani so viyo kachiŵi,” ŵanguwerezga so. Ndipo wanguti, “Chitani so viyo kachitatu.” Ndipo ŵanguchita kachitatu.

³⁵ Ndipo maji ghangutaŵala kwakuzunguliya chiguŵa, ndi kuzaza so ngalande.

³⁶ Ndipo pa nyengo yakupereke chisopo, Eliya mchimi wanguza pafupi, wanguti, “Ambuya, Chiuta waku Abrahamu, Yisaki, ndi Yisraele, chitani kuti ndimwe Chiuta waku Yisraele, ndi kuti ine nde muŵanda winu, ndipo ndachita vinthu vyose ivi pa mazu ghinu.

³⁷ Mundamuke, Ambuya mwe, mindamuke, mwakuti ŵanthu yaŵa ŵaziŵe kuti imwe, Ambuya, ndimwe Chiuta, ndikuti ndimwe mwang'anamuliya mitima yawo kuvuli.”

³⁸ Sono moto wa Ambuya unguwa, ndi ungocha sembe yakocha, ndinkhuni, ndi mya, ndi fuvu; ungumyanga maji gho ghenga mungalande.

³⁹ Ndipo penipo ŵanthu wose ŵanguwona ichi, ŵanguwa kavunama pa visku vyawo, ndipo ŵatinge, “Ambuya ndiwo Chiuta, Ambuya ndiwo Chiuta.”

⁴⁰ Ndipo Eliya wanguti kwaku wo, “Ŵakoni ŵamchimi ŵaku Bala, mungarekapo yumoza kuti wathaŵa cha.” Ndipo ŵanguŵako; sono wangusikiya nawo ku kamsinji ka Kishoni, ndipo ŵanguŵabayiya kwenikuwa.

⁴¹ Ndipo Eliya wanguti kwaku Ahabu, “Rutanga, ukarghe ndi kumwa, chifukwa kuvwika mphomo ya vuwa yinandi.”

⁴² Viyo Ahabu wangukwera kwachirgha ndi kumwa. Ndipo Eliya wangukwera pachanya pa Karmele; ndipo wangukotamiya pasi ndi wanguŵika chisku chake pakati pa makongono ghake.

⁴³ Ndipo wangunena ndi muŵanda wake, “Kwere kunena, ulereske kuchiri kunyanja.” Ndipo wangukweriyako, wangulereska ndi wanguti, “Kulivi kanthu.” Eliya wanguti, “Ruta so kankhonde ndi kaŵi.”

⁴⁴ Ndipo pa nyengo ya chinkhonde ndi chiŵi, wanguti, “Ehe, kamtambo kadokudoku nge ndi janja la munthu kakwera kutuwa mu nyanja.” Sono wanguti, “Ruta kwera, kamunene Ahabu, ‘Rongoso gareta lako ndipo rutanga usikenge, vinu vuwa yingakumika.’ ”

⁴⁵ Ndipo pa kanyengo kamanavi kuchanya kungufipa ndi mitambo ndi mphepo, ndipo kwenga vuwa yikuru. Ndipo wangukwera wanguruta ku Yeserele.

⁴⁶ Ndipo janja la Ambuya lenga paku Eliya, ndipo wangujichinyiya mu chiunu chake, ndipo wanguchimbiya panthazi paku Ahabu pa likomo la Yezerele.