1 Timote 5 - Tonga Bible 1986

Nchitu ya ŵachivwanu

¹ Ungachenyanga cha mura, kweni mchiskenge nge ndi usu; ŵamanako nawo nge mbabali,

² ŵanthukazi ŵara-ŵara nawo nge mbanyoko; ŵamanako nawo nge mbazichi, mu ukhovu wose.

³ Tumbika vyoko vyo ndi vyoko vyeneko.

⁴ Kweni asani choko chinyake che nawo ŵana pamwenga ŵazuku, ŵasambire yaŵa danga kuchitiya mbumba yaku ŵija ulemu, ndi kuwerezga ŵapapi ŵawo liwerezga chifukwa chenichi nchamarondeka mu maso ghaku Chiuta.

⁵ Kweni choko cheneko ndi chamasiya chigomekezga paku Chiuta, ndipo chijaririya mu maniniziku ndi mu marombo usiku ndi msana.

⁶ Kweni cho chitechitechi chafwa cheche chamoyo.

⁷ Ivi navyo languliyanga, alinga kuti viŵe vyambura kalema.

⁸ Kweni asani munthu wareka kuŵarongosole limu ŵaku yija, ndi viŵiviŵi ŵapake pa nyumba, wakana chivwanu, ndipo ndi muheniko kwakuruska mzira chivwanu.

⁹ Chingalembeka cha choko chakupereŵe virimika machumi ghankhonde ndi limoza (60) cho chinguŵa muwoli wa munthurumi yumoza,

¹⁰ chakusimikizgikiya mu nchitu zeneko, asani chalera ŵana, asani charonde ŵalendo ndi wezi, asani chasambiska marundi gha ŵakupaturika, asani chovya ŵakusuzgika, asani chandondoloska mlimu wose wamampha.

¹¹ Kweni vyoko vimanako kananga, chifukwa vyati vyatwangiya paku Kristu, vikhumba kuŵirwa so;

¹² ndipo vituŵa ndi chisusa, pakuti vyajowo chivwanu chawo chakudanga.

¹³ Napu so visambira kuŵa vikata, vyakuuraura ku nyumba ndi nyumba; ndi vikata pe cha, kweni so vyapa mlomo ndi vyamwendanatu, vyakurongoro vyamburakwene.

¹⁴ Viyo na ndikhumba vimanako kuŵirwa so, kupapa ŵana, kuruliska nyumba, kupaska nyengo cha ku ŵamawongu yaku titukiya:

¹⁵ chifukwa ndisono vinyake vikunyongoke kuvuli kwaku Satana.

¹⁶ Asani munthukazi wachivwanu we navyo vyoko, wavyovye, ndipo ungazitiskika cha mpingu wo; alinga kuti ungavyovya vyoko vyeneko.

¹⁷ Ŵara wo ŵateruzga kaunthu ŵenereskeke thumbiku lakuwerezga, viŵi-viŵi wo ŵatakatakiya mu mazu ndi chisambizgu.

¹⁸ Chifukwa lititi lembo lo, “Ng'ombe yakupwantha trigu ungayisunamiskanga cha.” Ndipo, “Wanchitu ngwakwenere mphotu yake.”

¹⁹ Pa mura ungarondi yapo chipacha cha, kwambura kuti mpha ŵakaboni ŵaŵi pamwenga ŵatatu.

²⁰ Ŵakulakwa uŵachenye mu maso ghaku wose, alinga kuti ŵakujapo nawo ŵaŵe ndi chopu.

²¹ Ndikuchenjezga pa maso ghaku Chiuta, ndi ghaku Kristu Yesu, ndi gha ŵangelo ŵakusankhika, kuti usunge vyenivi kwambura chisankha, wakuchitiya kanthu pa chanasi cha.

²² Ungaŵikapo manja pa yumoza ruŵiruŵi cha, chingana nkhusangana mu vilakwa vya ŵanyake cha: ukajisunganga mkhovu.

²³ Ungamwiyamwiya maji cha, kweni imwa vinyo nayo mumanavi, chifukwa cha chifu chako ndi mauthomboru ghako ghanandi.

²⁴ Vilakwa vya ŵanthu ŵanyake viwoneke limu, vyakudanjiyako ku cheruzgu, kweni ŵanyake nawo viŵarondo.

²⁵ Kwakulingana nako kwe nchitu zeneko zo ziwoneke limu, ndipo nanga zambura kuwoneka zo kuti zingaziŵa kubisika cha.