1 Timote 4 - Tonga Bible 1986

Ŵasambizgi ŵatesi

¹ Kweni Mzimu iyo wakamba pakweru, kuti mu nyengo zakumariya ŵanyake ŵadezukengekoku chivwanu, pakuphwere mizimu yirandizgi ndi visambizgu vya ŵademone,

² mu fuzi ya ŵatesi, wo mbakochereka mu njuŵi zaku ŵija,

³ ndi mbakukanizga kutorana, ndi mbakulanguliya kufunga ku vyakurgha, vyenivyo Chiuta wangwatiya kurondeka kwakuwonga ndi ŵakuvwana ndi ŵakuziŵiska uneneska wo.

⁴ Pakuti chakwatika chose chaku Chiuta nchamampha, ndipo kangakanizgika kanthu cha, asani karondeka ndi kuwonga;

⁵ chifukwa kapaturikiya mu mazu ghaku Chiuta ndi mu rombo.

Mteŵete wamagomekezgeka waku Yesu Kristu

⁶ Asani uŵakumbuska ŵabali ndi vyenivi, uŵenge mteŵeti mweneko waku Kristu Yesu, wakulereka mu mazu gha chivwanu, ndi gha chisambizgu cheneko chenicho warondo kuno ku le:

⁷ kweni nthanu zamtonyoru ndi zaukhongwe kananga. Kweni ujilimbiskiye ku uwopa Chiuta:

⁸ chifukwa kujilimbiska ko kwaliŵavu nkhwakwanduliya kumanavi; kweni uwopa Chiuta ngwakwanduliya vyose, pakuŵa nacho chipanganu cha umoyo wasono ndi chaku wo utakuzanga.

⁹ Ndamagomekezgeka nenedu lo, ndipo ndakwenere nchakati yose.

¹⁰ Chifukwa cheni chititataliya ndipo tilimbalimbiya, pakuti tagomekezge paku Chiuta wamoyo, mweniyo ndi Mtaski wa ŵanthu wose, ukongwa wa ŵachivwanu.

¹¹ Languliyanga vyenivi, ndi sambizganga vyo.

¹² Wareke munthu yose kuyeya umpupuka wako; kweni uŵe chandiru cha ŵakuvwana mumazu, mu nkharu, mu chanju, mu chivwanu, mu ukhovu.

¹³ Mpaka nthuza, phwere kuŵerenga, kuchiska, kusambizga.

¹⁴ Ungachijowo cha chaulera cho chamwako, chenicho chingupaskika kwaku iwe penipo ŵamchimi ŵangurongoro, ndi ŵara ŵanguŵikapo manja.

¹⁵ Phwerenga vyenivi jaririyanga mwaku vyo, alinga kuti kakiyakiyidu kako kawoneke kwaku wose.

¹⁶ Jichenjeriyenge wamweni, ndi so ku chisambizgu chako. Jaririyanga mwaku vyenivi; chifukwa pakuchita chenichi ujitaskenge wamweni ndi wo ŵatukuvwa.