1 Timote 3 - Tonga Bible 1986

Ŵarongozgi ŵa mpingu

¹ Ndamagomekezgeka nenedu lo: Asani yumoza walembe ura wa mpingu, wakhumbira mlimu weneko.

² Viyo kutenere mura kuŵa wambura kalema mrumi wa munthukazi yumoza, mkanavinyo, wakujitintha, mkongorekwa, mwanja ŵalendo, warwana kusambizga;

³ wabwawatu cha, wambembe cha; kweni mpovu, wambura lisonji, mwanja ndrama cha;

⁴ wakweruzga umampha nyumba yaku yija, wakuŵa nawo ŵana mu chithera ndi uziza wose;

⁵ kweni asani munthu wareka kuziŵa kweruzga nyumba yaku yija, waphwerenge uli eklesiya laku Chiuta?

⁶ Mteta cha, vinu pakututumuka wangawiya mu chisusa cha diabolo.

⁷ Ndipo so watenere kuŵa ndi mbiri yeneko kwaku wo mbakubwaro; vinu wangawiya mu kawereri ndi chikhwiriki cha diabolo.

Ŵakovya mu mpingu

⁸ Kwakulingana nako ŵateŵeti ŵakaŵanga ŵakongorekwa, ŵa malilime ghaŵi cha, ŵakumwa vinyo cha, wanduzi vyasoni cha,

⁹ wakuŵa ndi mangari gha chivwanu cho mu njuŵi yikhovu.

¹⁰ Kweni yaŵa nawo ŵeseke danga, pavuli po ŵamiriyenge nge mbateŵeti, asani mbakuwura masumurika.

¹¹ Kwakulingana so ŵanthukazi ŵakaŵanga ŵakongorekwa, ŵakuparamula cha, ŵamkanavinyo; ŵamagomekezgeka mwaku vyose.

¹² Ŵateŵeti ŵakaŵanga ŵarumi ŵa munthukazi yumoza, ŵakweruzga kweneko ŵana ndi nyumba zaku ŵija.

¹³ Chifukwa ŵakuteŵeta kweneko ŵajanduliya kamidu keneko, ndi chiganga chikuru mu chivwanu chamwaku Kristu Yesu.

¹⁴ Vyenivi ndikulembe ndawakugomekezga kuza kwako ruŵiruŵi,

¹⁵ kweni asani ndiziulika, alinga kuti ungaziŵa mo kutenere kujariya mu nyumba yaku Chiuta, yeniyo ndi eklesiya laku Chiuta Wamoyo, mzati ndi chijarikiru cha uneneska.

¹⁶ Ndipo kwakuzomerezgeka ngakuru mangari gha uwopa Chiuta. Mweniyo wangurongoreke muliŵavu, wangurunjiskikiya mu Mzimu, wanguwoneka ndi ŵangelo, wangumemezeka mu ŵaMitundu, wangugomekezgeka mu charu, wangurondeke kuchanya mu unkhankhu.