1 Timote 2 - Tonga Bible 1986

Chisopo cha mpingu

¹ Viyo, pakudanga ŵaka, ndichiska kuti ghachitikiye maniniziku, marombo, mapemphu, vyakuwonga, pa chifukwa cha ŵanthu wose;

² pa chifukwa cha ŵakaronga ndi wose ŵaraŵara; alinga kuti tijariyenge umoyo wakuzika ndi wakudeka mu uwopa Chiuta wose ndi uziza.

³ Chenichi nchamampha ndi chamarondeka mu maso ghaku Chiuta Mtaski widu,

⁴ mweniyo wakhumba ŵanthu wose kutaskika ndi kufikapo pa mziŵiru wa uneneska.

⁵ Chifukwa kwe Chiuta, ndi mwendapakati yumoza, pakati paku Chiuta ndi ŵanthu, Munthu Kristu Yesu.

⁶ Yo wangujipereka thumba lapa chifwa chaku wose: chinthu chakusimikizgika pa nyengo zake,

⁷ waku cho ndingumikikiya ine mumemeza ndi wakutumika, (ndineneska, kuti nditetacha), msambizgi wa ŵaMitundu mu chivwanu ndi uneneska.

⁸ Viyo ndiŵakhumba ŵanthurumi kuromba mu malo ghose, pakusoska manja ghakhovu kwambura chikwiya ndi suskanu.

⁹ Kwakulingana nako, ŵanthukazi nawo ŵajidyoŵe mu chivwaru chakutowa, ndi soni ndi ndi chinjeru; ndi chiluka ndi golide cha, pamwenga ndi ndeŵereŵi pamwenga ndi chivwaru cha mtengu ukuru cha;

¹⁰ kweni (chenicho chitenere ŵanthukazi wo ŵazomerezga uwopa Chiuta) ndi nchitu zamampha.

¹¹ Munthukazi wasambiriyenge mu udeke ndi mu chithera chose.

¹² Kweni kuti ndimzomerezga munthukazi kusambizga cha, chingana nkhutufuliya pa munthurumi cha, kweni kuŵa mu chisisi.

¹³ Chifukwa Adamu wanguumbika danga, Eva pavuli;

¹⁴ ndipo kuti Adamu wangufuvyika cha, kweni munthukazi yo pakufuvyika wanguwiya mu ujumphi:

¹⁵ kweni ŵataskikiyenge mu kupapapaŵana, asani ŵajaririya mu chivwanu ndi chanju ndi ukongorekwa pamoza ndi chinjeru.