1 Samuele 8 - Tonga Bible 1986

Ŵa Yisraele ŵakhumba karonga

¹ Samuele wanguti wakota, wangumika ŵana ŵake kuŵa ŵeruzgi pa ŵaYisraele.

² Mwana wake wakudanga wenga Yoele wa chiŵi wenga Abija, yaŵa ŵenga ŵeruzgi mu Beresheba.

³ Kweni ndipuuli ŵana ŵake kuti ŵangwenda mu nthowa zake cha, ŵangupatukiya ku chanduwu chiheni ŵanguronde vimbundi ndipo ŵangutimbanizga kweruzga.

⁴ Ndipo ŵaraŵara wose ŵaYisraele ŵanguwungana ŵanguza kwaku Samuele ku Rama.

⁵ Ŵangunena nayo, “Awonani, imwe mwakota ndipo ŵana ŵinu kuti ŵatenda munthowa zinu cha; sono tisankhiyeni karonga yo watiusenge, nge ndi mitundu yinyake.”

⁶ Kweni ichi Samuele kuti chingumukondweska cha po ŵangunena nayo kuti, “Tipaskeni karonga wakutiusa.” Ndipo Samuele wanguromba ku Ambuya.

⁷ Pakwamuka Ambuya anguti, “Vwiya mazu gha ŵanthu mwaku vyose vyo ŵakambenge nawe chifukwa kuti ŵapata iwe cha, kweni ŵapata ine kuti ndiŵe karonga wawo.

⁸ Kwakuyana ndi vyose vyo ŵandichitiya, kutuliya pa zuŵa lo ndinguŵatuzgiya mu Egipiti mpaka ku zuŵa lino mbakundijowo ndi kutataliya ŵachiuta ŵanyake, ndipo ivi ndivyo ŵachitiya ndi iwe.

⁹ Sono vwiya mazu ghawo; chimoza pe, utenere kuŵaziŵiska, ndi kuŵarongo nthowa za karonga yo waŵausenge.”

¹⁰ Viyo Samuele wanguŵakonkhoske ŵanthu wo ŵamupemphanga karonga mazu ghose gha Ambuya.

¹¹ Wanguti, “Izi ndizo zikaŵanga nthowa za karonga yo wakuuseninge: wakatonga ŵana ŵinu kuŵamika mu magareta ghake ndi mu ŵakavalo ŵake, ndi kuchimbiya paurongo pa magareta ghake;

¹² wakajisankhiyanga zinduna za nkhondo za vikwi ndi zinduna za machumi ghankhonde, ŵanyake kukulima ndi kuvuna vyakurgha vyake, kupanga vidya vyake vya nkhondo ndi vyakunozge magareta ghake.

¹³ Wakatonga ŵana ŵinu ŵanthukazi kuŵa ŵakupanga vyachema, ŵakubika, ndi ŵakocha viŵande.

¹⁴ Wakatonga minda yinu ya nyata yamampha ndi ya mphereska ndi ya ma Olive wakayiperekanga ku ŵanchitu ŵake.

¹⁵ Wakatonga cha chichumi cha mbeu zinu ndi cha mphereska zinu wakaperekanga ku nduna zake ndi ŵanchitu ŵake.

¹⁶ Wakatonga ŵanchitu ŵinu ŵanthurumi ndi ŵanchitu ŵinu ŵanthukazi, ndi ng'ombe zinu zakututuŵa ndi mbunda zinu, wakazigwiriskanga nchitu yake.

¹⁷ Wakatonga cha chichumi mu vyakuŵeta vinu, ndipo mukaŵanga ŵanchitu ŵake.

¹⁸ Ndipo mu zuŵa liya mwazamuliya chifukwa cha karonga winu, mweniyo mwasankha mwaŵeni; zuŵa liya kuti mwazamukuvwa kwamuka kwa Ambuya cha.”

¹⁹ Kweni ndipuuli ŵanthu ŵangukana kuvwa mazu ghaku Samuele wanguti,

²⁰ “Awa! Tipenja karonga wakutiusa, mwakuti nafwe tiŵe nge ndi mitundu yose yinyake, ndi kuti karonga widu yo wakatiyeruzganga wakatidanjiriyanga ndipo wakarwanga nkhondo zidu.”

²¹ Samuele wanguti wavwa makambidu ghose gha ŵanthu, wanguwerezga kughakamba ku Ambuya.

²² Ambuya angunena ndi Samuele kuti, “Vwiya mazu ghawo, ŵasankhiyi karonga.” Samuele wanguti ku ŵaYisraele, “Rutaninga munthu yose ku msumba wake.”