1 Samuele 7 - Tonga Bible 1986

¹ Ndipo ŵanthu ŵaku Kiriata-jearimi ŵanguza ndi kuto bokosi la Ambuya, ndipo ŵangulitore ku nyumba yaku Abinadabu pa mutunthu; ndipo ŵangupaturiskiya mwana wake Eleazara, kuŵa wakusunga bokosi la Ambuya.

² Kutuwa pa zuŵa lo bokosi lingufikiya pa Kiriata-jearimi, nyengo yikuru yingujumphapo, akhumba virimika machumi ghaŵi (20) nyumba yose yaku Yisraele yingutenje paurongo pa Ambuya.

³ Penipo Samuele wangunena ndi nyumba yaku Yisraele, “Asani mung'anamukiya ku Ambuya ndi mtima winu wose, iku tuzgani ŵachiuta ŵachilendo ndi Ashitaroto mukati, rongozgiyani mitima yinu ku Ambuya, mteŵetiyeni iyo, ndipo wakamupozomoskaninga mu janja la ŵaFilisti.”

⁴ Viyo ŵaYisraele ŵangutuzga ŵaBala ndi Ashitaroto, ndipo ŵangutataliya Ambuya.

⁵ Samuele wanguti, “Wunjikani Yisraele yose ku Mizpa, mwakuti ndikurombiyeni ku Ambuya.”

⁶ Viyo ŵanguwunjikana pa Mizpa, ndipo ŵangunegha maji ŵangughadira paurongo pa Ambuya, ŵangufunga zuŵa liya, ndipo penipa ŵanguti, “Tanangiya Ambuya.” Ndipo Samuele wangweruzga ŵaYisraele pa Mizpa.

⁷ Sono ŵaFilisti ŵanguti ŵavwa kuti ŵaYisraele ŵawungana pa Mizpa, mafumu gha ŵaFilisti ghangukwera kumikana ndi Yisraele. ŴaYisraele ŵanguti ŵavwa ichi ŵenga ndi mantha pa ŵaFilisti.

⁸ Ndipo ŵangunena ndi Samuele, “Rekani kurekezga kuliya ifwe ku Ambuya Chiuta widu, kuti watipozomoske ku ŵaFilisti.”

⁹ Viyo Samuele wanguto kamberere kakonkha kukapereka nge ndi mpasku wose wakocha ku Ambuya, ndipo Samuele wanguliliya ku Ambuya pa ŵaYisraele, ndipo Ambuya angumwamuka.

¹⁰ Sono Samuele wachipereka mpasku wakocha, ŵaFilisti ŵangundere kufupi kurwana ndi ŵaYisraele; kweni Ambuya angudiririska ndi mazu gha nthazi pa ŵaFilisti zuŵa liya ndipo anguŵapong'a ku chimtimbaheka, ndipo ŵangupasuka paurongo pa ŵaYisraele.

¹¹ Ndipo ŵaYisraele ŵangutuwa pa Mizpa kurondo ŵaFilisti, ŵanguŵakoso, mpaka kusika kwa Betekara.

¹² Viyo Samuele wanguto mwa ndi kuwumika pakati pa Mizpa ndi Jeshana, ndipo wangudana zina lake Ebenezere, pakuti wanguti, “Panu, Ambuya atovya.”

¹³ Viyo ŵaFilisti ŵangupundika, ndipo kuti ŵangusere so mu charu cha Yisraele cha. Janja la Ambuya lenga lakumikana ndi ŵaFilisti mu mazuŵa ghose ghaku Samuele.

¹⁴ Misumba yo ŵaFilisti ŵanguronda ku ŵaYisraele yinguwezgeke ku ŵaYisraele kutuwa ku Ekroni mpaka ku Gata; ndipo ŵaYisraele ŵangupoka chigaŵa chawo kujanja la ŵaFilisti. Panguŵa so chimangu pakati pa ŵaYisraele ndi ŵaAmori.

¹⁵ Samuele wangweruzga Yisraele mazuŵa ghose gha umoyo wake.

¹⁶ Ndipo wayendanga mwakuzunguliya chirimika ndi chirimika ku Betele, Gilgala, ndi Mizpa; wangweruzga ŵaYisraele mu malo ghose yagha.

¹⁷ Pavuli wanguwere ku Rama, pakuti nyumba yake yenga kweniko, ndipo ndikwenikuwa so ko waperekiyanga cheruzgu ku ŵaYisraele. Ndipo wanguzengako jochero la sembe la Ambuya.