1 Samuele 5 - Tonga Bible 1986

Bokosi laku Chiuta la phanganu mukati mu ŵaFilisti

¹ ŴaFilisti ŵanguti ŵapoka bokosi laku Chiuta, ŵangulito kutuwa ku Ebenezere nipaka ku Ashidodi,

² sono ŵaFilisti ŵanguto bokosi laku Chiuta ndi kuliŵika mu nyumba yaku Dagoni ŵangulimika pafupi ndi Dagoni.

³ Ndipo ku mlenji ŵanguti ŵayuka ŵanthu ŵaku Ashidodi, awonani, Dagoni wawa pasi kavunama paurongo pa bokosi la Ambuya. Viyo ŵangumuyuska Dagoni ndikumuŵika so mu malo ghake.

⁴ Kweni ŵanguti ŵaza so ku mlenji unyake, awonani, Dagoni wawa kavunama pasi paurongo pa bokosi la Ambuya, mutu waku Dagoni ndi manja ghake ghose ghaŵi vingudumuka ndi kugona mukhomo: Dagoni wanguja chipiriŵiri pe.

⁵ Ichi ndicho chifukwa chake ŵazukuru ŵaku Dagoni ndi wose wo ŵasere mu nyumba yaku Dagoni kuti ŵakanda pa khomo laku Dagoni cha mu Ashidodi mpaka ku zuŵa lino.

⁶ Ndipo janja la Ambuya lingumikana nawo ŵanthu ŵaku Ashidodi ndi mu vigaŵa vyake.

⁷ Po ŵina Ashidodi ŵanguti ŵawona mo vinthu vinguŵiya, ŵanguti, “Bokosi laku Chiuta waku Yisraele kuti litenere kuja ndi ifwe cha; chifukwa janja lake laŵa lakumikana ndi ifwe ndi Dagoni chiuta widu.”

⁸ Viyo ŵangudanana ndi kuwungana pamoza mafumu ghose gha ŵaFilisti, ŵanguti, “Tikachitanganji ndi bokosi laku Chiuta wa ŵaYisraele?” Wangwamuka ŵanguti, “Rekani bokosi laku Chiuta waku Yisraele litoreke ku Gata.” Viyo ŵanguruta nalo ku Gata.

⁹ Kweni wanguti ŵalitore kuwa, janja la Ambuya lingumikana ndi msumba uwa, kuŵapaska suzgu yikuru ukongwa anguŵasuzga ŵanthu ŵamu msumba, wose ŵamana ndi ŵara, ndi nthenda ya vitupatupa.

¹⁰ Viyo ŵangutuma bokosi la phanganu laku Chiuta ku Ekroni. Linguti lafika bokosi laku Chiuta ku Ekroni, ŵanthu ŵaku Ekroni ŵangubongo ŵakuti, “Watiziya ifwe ndi bokosi laku Chiuta waku Yisraele kwazitibaya ifwe ndi ŵanthu ŵidu.”

¹¹ Pa chifukwa ichi ŵangutuma ndipo ŵanguwungana pamoza mafumu ghose gha ŵaFilisti, ŵanguti, “Tuzganipo bokosi laku Chiuta waku Yisraele, liwezgeke ku malo ghake, mwakuti lireke kutibaya ifwe ndi ŵanthu ŵidu.” Pakuti kunguŵa suzgu yikuru ya nyifwa mu msumba wose. Janja laku Chiuta lingumikana nawo ukongwa;

¹² ŵanthu wo ŵengavi kufwa ŵangupwetekeka ndi vitupatupa, ndipo nkhuta yamu msumba yingukwere kuchanya.