1 Samuele 31 - Tonga Bible 1986

Nyifwa yaku Sauli ndi ŵana ŵake

¹ Ndipo ŵaFilisti ŵangurwana ndi ŵaYisraele; ŵaYisraele ŵanguthaŵa pa maso pa ŵaFilisti, ŵangubayika pa phiri la Gilboa.

² Ndipo ŵaFilisti ŵangumurondo Sauli pamoza ndi ŵana ŵake; ŵangubaya Jonafani ndi Abnadabu ndi Malkishua, ŵana ŵaku Sauli.

³ Nkhondo yingumufinyikizga ukongwa Sauli, ŵamauta ŵangumusaniya; ndipo wangurasika ndi wakupong'a mauta.

⁴ Sono Sauli wangunena ndi wakupinga vidya vyake, “Wewepuwa lipanga lako, undigwaze nalo vinu ŵambura kuchinjika aŵa ŵangaza ŵangandigwaza ndikunditombozga.” Kweni wakupinga vidya vyake wangukana; chifukwa wangopa ukongwa, viyo Sauli wanguto lipanga lake ndi wangujiwiya paku lo.

⁵ Ndipo po wakupinga vidya vyake wanguwona kuti Sauli wafwa, iyo nayo wanguwa pa lipanga lake, wangufwa.

⁶ Viyo ndimu wangufwiya Sauli, ndi ŵana ŵake ŵatatu, pamoza ndi wakupinga vidya vyake, ndi ŵanthu ŵake wose pamoza zuŵa leniliya.

⁷ Ndipo khamu laku Yisraele lo lenga kusirgha linyake la dambo ndi wo ŵenga kusirgha ku Yordane ŵanguti ŵawona kuti ŵaYisraele ŵathaŵa ndi kuti Sauli ndi ŵana ŵake ŵabayika, ŵangusiya mizi yawo ndi kuthaŵa; ndipo ŵaFilisti ŵanguza ndi kujamo.

⁸ Ku mlenji, ŵaFilisti ŵanguza kuzachizuwa milasu, ŵangusaniya kuti Sauli ndi ŵana ŵake ŵatatu ŵafwa pa phiri Gilboa.

⁹ Ŵangudumuwa mutu wake, ndi kufwatuwa vidya vyake, wangutuma mathenga mu charu chose cha ŵaFilisti, ku taula makani ghamampha ku ŵangoza ŵawo ndi ku ŵanthu,

¹⁰ ŵanguŵika vidya vyake mu nyumba yaku Ashitaroto; ndipo ŵangukhoma liŵavu lake pa chimati cha Beteshani.

¹¹ Kweni po ŵakuja mu Yabeshe-Gileada ŵanguvwa cho ŵaFilisti ŵanguchitiya Sauli,

¹² vinkhara vyose vingusoka, ŵangwenda usiku wose, ŵangwachipawuwa chitanda chaku Sauli ndi vitanda vya ŵana ŵake pa chimati chaku Beteshani; ŵanguza navyo ku Yabeshe ndipo ŵanguvyocha kweniko.

¹³ Ŵanguto viwanga vyawo ŵanguŵika msina mu muti wa mkundi pa Yabeshe, ndipo wangufunga mazuŵa ghankhonde ndi ghaŵi.