1 Samuele 3 - Tonga Bible 1986

Ambuya atimuwoneke Samuele

¹ Ndipo mhurwa Samuele wateŵetiyanga Ambuya pasi paku Eli, mazu gha Ambuya kuti ghanguŵapo viŵi cha mu mazuŵa ghenigha, nanga ndi mboniwoni kuti zinguwoneka viŵi cha.

² Pa nyengo yiya Eli, yo maso ghake ghangwamba kuchita chidima, mwakuti kuti walereskanga umampha cha, wagonanga pasi mu malo ghakuyija;

³ nyali yaku Chiuta yenga yindazimwe, Samuele wagonanga pasi mukati mu nyumba yakupaturika ya Ambuya, pafupi ndi bokosi la phanganu laku Chiuta.

⁴ Sono Ambuya angudana, “Samuele! Samuele!” Iyo wanguti, “Ndine pano!”

⁵ Ndipo wanguchimbiriya kwaku Eli, wanguti, “Ndine pano pakuti mwandidana.” Wangumwamuka, “Kuti ndadana cha; kagone pasi.” Viyo wanguruta wangugona.

⁶ Ambuya angudana so, “Samuele!” Ndipo Samuele wanguyuka wanguruta kwaku Eli, wanguti, “Ndine pano pakuti mwandidana.” Kweni wanguti, “Kuti ndadana cha, mwana wangu; kagone pasi.”

⁷ Samuele wengavi kuziŵa Ambuya, chingana ndi mazu gha Ambuya ghengavi kuvumbulika kwaku iyo.

⁸ Ndipo Ambuya angumudana so kachitatu Samuele. Wanguyuka ndi kuruta kwaku Eli, wanguti, “Ndine pano pakuti mwandidana.” Sono Eli wanguziŵa kuti Ambuya ndiwo amudananga mhurwa yo.

⁹ Chifukwa ichi Eli wangunene Samuele, “Ruta, kagone, ndipo asani watikudana, iwe unene kuti, ‘Kambani, Ambuya, pakuti muteŵeti winu watuvwa.’ ” Viyo Samuele wanguruta ndi kugona mu malo ghake.

¹⁰ Ndipo Ambuya anguza anguma pafupi, kudana nge mphanyengo zinyake, “Samuele! Samuele!” Ndipo Samuele wanguti, “Kambani; mteŵeti winu watuvwa.”

¹¹ Sono Ambuya angunena ndi Samuele, “Awona nde pafupi kuchita kanthu mu Yisraele, pakut keniko makutu ghaku we yose yo wakavwanga ghazenenekenge.

¹² Pa zuŵa liya ndifiskenge paku Eli vyose vyo ndakamba kwakulingana ndi nyumba yake, kutuwa pakwamba mpaka pa umari.

¹³ Ndipo nditumukambiya kuti nde pafupi kulanga nyumba yake muyaya, pa ulakwi wo wanguwuziŵa, chifukwa ŵana ŵake ŵatukanga Chiuta ndipo iyo kuti wanguŵakanizga cha.

¹⁴ Pa chifukwa ichi ndarapa ku nyumba yake Eli kuti uheni wapa nyumba yaku Eli kuti ukatozgekanga ndi sembe pamwenga mpasku cha muyaya.”

¹⁵ Samuele wangugona mpaka ndi mlenji; sono wangujura visasa vya nyumba ya Ambuya. Ndipo Samuele wenga ndi mantha kuti wamunene Eli za chiwona chiya.

¹⁶ Kweni Eli wangudana Samuele wanguti, “Samuele, mwana wangu.” Iyo wanguti, “Ndine pano.”

¹⁷ Ndipo Eli wanguti, “Nchine cho angukamba nawe? Ungandibisanga cha. Chiuta wakuchitiye viyo ndipo wasazgiyepo so asani undibisenge kanthu ke kose ko wangukunene.”

¹⁸ Viyo Samuele wangumukambiya vyose ndipo kuti wangubisa kanthu cha. Ndipo Eli wanguti, “Ndi Ambuya; iko achite cho chingaŵa chamampha kwaku iwo.”

¹⁹ Ndipo Samuele wangukuwa, Ambuya ŵenga nayo ndipo kuti anguzomerezga cha kuti mazu ghawo ghareke kufiskika.

²⁰ Viyo ŵaYisraele wose kutuliya ku Dani mpaka ku Beresheba ŵanguziŵa kuti Samuele wasankhika kuŵa mchimi wa Ambuya.

²¹ Ndipo Ambuya anguwoneka so pa Shilo pakuti angujivumbuwa iwo ŵeneko kwaku Samuele penipa.