1 Samuele 27 - Tonga Bible 1986

Davidi mukati mu ŵaFilisti

¹ Ndipo Davidi wanguti waghanaghana mu mtima wake wanguti, “Ndifwenge zuŵa linyake ku janja laku Sauli; palivi so kanyake kamampha kwangu kwakuruska kuti ndithaŵiye ku charu cha ŵaFilisti; mpaka po Sauli wavukenge kundipenja mukati mu mphaka za ŵaYisraele, ndipo ndikapozomokanga mu janja lake.”

² Viyo Davidi wangusoka wanguruta iyo ndi ŵanthu machumi pe chumi ghankhonde ndi limoza (600) wo ŵenga nayo, kuya kwaku Akishi mwana waku Maoka, karonga waku Gata.

³ Ndipo wanguja ndi Akishi pa Gata, iyo pamoza ndi ŵanthu ŵake, munthu yose ndi mbumba yake, Davidi nayo ndi ŵawoli ŵake ŵaŵi, Ahinoamu waku Yezerele, ndi Abigaili waku Karmele, choko chaku Nabala.

⁴ Ndipo Sauli wanguti wavwa kuti Davidi wathaŵiya ku Gata, kuti wangumpenja so cha.

⁵ Davidi wangunena ndi Akishi, “Asani ndasaniya wezi mu maso ghinu, ndipaskeniko malo mu umoza wa misumba ya charu chinu, mwakuti ndijengepo pakuti ndijariyengenji ndamteŵeti winu pamoza namwe mu msumba winu?”

⁶ Viyo pa zuŵa liya Akishi wangumpaska Ziklaga, rekani Ziklaga ngwa mafumu ghaku Yuda mpaka ku zuŵa linu.

⁷ Ndipo unandi wa mazuŵa gho Davidi wangujariya mu charu cha ŵaFilisti ghenga chirimika chimoza ndi myezi yinayi.

⁸ Sono Davidi ndi ŵanthu ŵake ŵangukwera, kwachirwa nkhondo ndi ŵaGeshuru, ŵaGirizi, ndi ŵaAmaleke; pakuti aŵa ndiwo ŵenga ŵakuja mu charu kutuliya ku mwaka kutuliya ku Shuru, mpaka ku charu cha Egipiti.

⁹ Davidi wangupasuwa charu, wengavi kusiyapo munthurumi pamwenga munthukazi wamoyo, wanguskoŵa mberere, ng'ombe, zimbunda, ŵagamila, ndi vyakuvwara, wanguwere kwaku Akishi.

¹⁰ Wachimufumba Akishi, “Kumbi msana wale mungamukurwa paninkhondo?” Davidi wanguti, “Kumwera kwa Yuda, pamwenga kumwera kwa Yerahamele pamwenga kumwera kwa ŵaKeni.”

¹¹ Ndipo Davidi kuti wangusiyapo munthurumi pamwenga munthu­kazi wamoyo cha, kuti wangapingiya makani ku Gata, kughanaghana “Vinu ŵangakamba gha paku ifwe, kuti, ‘Davidi wachita vyakuti.’ ” Ili linguŵa lusu lake pa nyengo yose yo wangujariya mu charu cha ŵaFilisti.

¹² Ndipo Akishi wangumugomezga Davidi, kughanaghana kuti, “Wachita chifukwa waŵa wakutinkhika ukongwa ndi ŵanthu ŵaku Yisraele; pa chifukwa ichi wakaŵanga mteŵeti wangu muyaya.”