1 Samuele 24 - Tonga Bible 1986

Davidi kuti wakhumba cha kwananga umoyo waku Sauli

¹ Sauli wanguti wawe kukurondo ŵaFilisti, wanguziŵiskika kuti, “Awonani, Davidi wemu bozwa la Engedi.”

² Viyo wanguto ŵanthu ŵakusankhika vikwi vitatu (3,000) mu ŵaYisraele, wanguruta kwachipenja Davidi ndi ŵanthu ŵake kunthazi ku Majarawe gha mbuzi za mdondo.

³ Ndipo ŵangufika pa makhora gha mberere, penipo penga mphanji; Sauli wangusere mukati mwakuti wajipumuzge. Po Davidi ndi ŵanthu ŵake ŵanguja mukati imo mwa mphanji yo.

⁴ Ndipo ŵanthu ŵaku Davidi ŵangunena nayo, “Lino ndi zuŵa lo Ambuya atimukambiyani kuti, ‘Awona, ndampereka murwani wako mu janja lako ukamuchitiyanga chose cho nchamampha kwako.’ ” Penipo wangusoka Davidi mwauchenjezi wangudumuwako mkano wa khanju laku Sauli.

⁵ Pavuli pake mtima waku Davidi ungumulasa, chifukwa wangudumuwa mkano waku Sauli.

⁶ Wanguti ku ŵanthu ŵake, “Ambuya akana kuti ndichiti chinthu ichi ku mbuyangu kuti ndimusoske janja langu kumikana nayo, pakuti ngwakupakika wa Ambuya.”

⁷ Viyo Davidi wangukanizga ŵanthu ŵake ndi mazu yagha, ndipo kuti wanguŵazomerezga cha kuti ŵamubaye Sauli. Sauli wangusoka kutuwa mu mphanji, wanguruta munthowa yake.

⁸ Pavuli Davidi nayo wangusoka, wangutuliya kubwaro, wangudana pavuli paku Sauli, wakuti, “Mbuyangu karongo!” Pakung'anamuka Sauli, Davidi wangukotama mutu wake pasi wangumulambiya.

⁹ Ndipo wanguti kwaku Sauli, “Chifukwa nchine mutuvwa ku makambiru gha ŵanthu wo ŵatiti, ‘Awonani, Davidi wapenja kumupwetekani?’

¹⁰ Alereni, zuŵa lino maso ghinu ghawona mo Ambuya amperekiyani mu janja langu mu mphanji ŵanyake ŵatinge ndimubayeni, kweni ine ndamurekani. Ndakamba kuti, ‘Kuti ndiŵikenge janja langu kumikana ndi mbuyangu cha, chifukwa ngwakupakika wa Ambuya.’

¹¹ Awonani ada, wonani mkono wa khanju linu mu janja langu; pakuti ndadumuwako mkano ku khanju linu, kweni kumbayani cha, mtenere kuziŵa ndi kuwona kuti mu manja ghangu mulivi kaheni chingana nkwananga. Palivi cho ndamunangiyani, chingana imwe mupenja umoyo wangu kuwuto.

¹² Ambuya ŵeruzge pakati paku ine ndi imwe, Ambuya ndiwo awezge thayu paku imwe kweni janja langu kuti limikanenge namwe cha.

¹³ Nge ndimo nthanthi ya ŵamwaka yikambiya, ‘Mu mheni mutuwa uheni,’ kweni janja langu kuti limikanenge namwe cha.

¹⁴ Karonga wa ŵaYisraele watuliya chifukwa chaku yani? Murondo yani? Garu wakufwa kumbi! Murondo kabanthi kawaka!

¹⁵ Ambuya ndiwo aŵe ŵeruzgi, apaske cheruzgu pakati paku ine ndi imwe, awone, andikambiye mlando wangu, anditaske mu janja linu.”

¹⁶ Davidi wanguti wamara kurongoro mazu yagha ndi Sauli, Sauli wanguti, “Kumbi ndigho mazu ghako yagha, Davidi mwana wangu?” Sauli wangusoska mazu ghake wanguliya.

¹⁷ Wanguti kwaku Davidi, “We murunji ukongwa kuruska ine chifukwa wandiwezge umampha po ine ndakuchitiyanga uheni.

¹⁸ Ndipo zuŵa lino wakamba pa kwero vyamampha vyo wachitiya ine, mwakuti wareka kundibaya po Ambuya angundiŵika mu manja ghako.

¹⁹ Chifukwa asani munthu wasaniya murwani wake, kumbi wangamusiya waka kuti warutenge? Ambuya akupaske mphoto yamampha pa chifukwa chaku vyo wandichitiya msana wale.

²⁰ Ndipo sono, awona, ndipanikizga kuti ukaŵanga karonga ndikuti ufumu wa ŵaYisraele ukakuzgikangamu janja lako.

²¹ Viyo ndirapiye ku Ambuya kuti, kuti ukadumuwangako cha mphapo yangu yakuza pavuli pangu, ndikuti, kuti ubwanganduwenge zina langu cha mu nyumba ya ada.”

²² Ndipo Davidi wangurapa ichi paku Sauli. Sono Sauli wanguwere kumuzi; kweni Davidi ndi ŵanthu ŵake ŵangukwere mu linga.