1 Samuele 21 - Tonga Bible 1986

Davidi wathaŵa kutuwa kwaku Sauli

¹ Ndipo Davidi wanguza ku Nobo kwaku Ahimeleke mzukuru; Ahimeleke wanguza ndi chitenthe kukumana ndi Davidi, wanguti kwaku iyo, “Chifukwa nchine wewija, wambura munthu munyake?”

² Davidi wangunena ndi Ahimeleke mzukuru, “Karonga wandilanguliya kanthu, wandinene kuti, ‘Paulevi yumoza wakuti waziŵe ke kose kaku vyo nditukutumiya, nanga ndi vyo ndakulanguliya.’ Ine ndachita phanganu ndi ŵanyamata pa malo ghakuti, ghakuti.

³ Sono iwe, wendi kanthu uli mu janja lako? Ndipaske viŵande vinkhonde, pamwenga kanthu kanyake ko kalipo.”

⁴ Mzukuru wanguti kwaku Davidi, “Ndilivi, chiŵanae chaŵaka, kweni chiŵande chakupaturika chiripo asani ŵanyamata ŵako pe ndiwo ŵajisunga ku ŵanthukazi.”

⁵ Davidi wangwamuka mzukuru wanguti, “Kwakuneneska nge ndimo ndichitiya nyengo zose asani nde pa lwendo; viyaŵi vya ŵanyamata vyakupaturika, nanga ulendo ngwa ŵaka; ipo ukongwako msana unu wale viyaŵi vyawo vikaŵanga vyakupaturika?”

⁶ Viyo mzukuru wangumpaska chiŵande chakupaturika; pakuti chiŵande chinyake pengavi kweni chiŵande cha pa maso, cho chatuzgika paurongo pa Ambuya, kuti chisinthane ndi chakocha sono pa zuŵa lo ŵatuzgiyapo chinyake.

⁷ Sono munthu munyake wa ŵateŵeti ŵaku Sauli wenga penipa zuŵa liya, kumulindika paurongo pa Ambuya; zina lake lenga Doege waku Edomu nduna ya ŵaliska ŵa vyakuŵeta vyaku Sauli.

⁸ Davidi wangunena ndi Ahimeleke, “Kumbi pano ulivi mkondo pamwenga lipanga? Pakuti ine kuti ndajipingiya lipanga nanga ndi vidya cha chifukwa nchitu ya karonga yaŵa yakuthaŵiriya.”

⁹ Mzukuru wanguti, “Lipanga laku Goliati muFilisti yuwa ukubaya mudambo la Ela, lepano, likukurungika mu saru kurweka kwa Efodo; asani ulitonge, lito, pakuti linyake palive kweni ndenilo pe.” Davidi wanguti, “Lakuyana ndi lo palivi; ndipaske.”

¹⁰ Davidi wangusoka wanguthaŵa Sauli zuŵa liya, wanguya kwaku Akishi karonga waku Gata.

¹¹ Ŵateŵeti ŵaku Akishi wangunena nayo, “Kumbi uyu asi ndi Davidi karonga wa charu cho? Kumbi asi ŵambanga yumoza ndi munyake ŵachimuzumbuwa mukuvina, ‘Sauli wabaya vikwi vyake, kweni Davidi vikwi vyake vya machumi?’ ”

¹² Davidi wangusunga mazu yagha mu mtima, ndipo wanguŵa wamantha ukongwa ndi Akishi karonga waku Gata.

¹³ Mwakuti wangusintha nkharu yake pa maso pawo wanguŵa nge ngwakufuntha mukati mwawo, wangukwaruwa-kwaruwa pa visasa vya pa vipata, ndipo lorozo lasoromokiyanga ku mwembe wake.

¹⁴ Akishi wangunena ndi ŵateŵeti ŵake, wakuti, “Ehe mutimuwona munthu wakufuntha, chifukwa nchine mwamutore kunu kwangu?

¹⁵ Kumbi ndikavuka ŵakufuntha kuti mwamutore uyu kwaziseŵe vyakufuntha vyake pa maso pangu? Kumbi waserenge mu nyumba yangu uyu?”