1 Samuele 20 - Tonga Bible 1986

Jonafani watovya Davidi

¹ Ndipo Davidi wanguthaŵa ku Nayoti mu Rama, wanguza ndi wangurongoro ndi Jonafani, wakuti, “Ndachitanji? Ulakwi wangu ngune? Ndipo ngune uheni wangu pa maso gha ausu, kuti ŵapenja umoyo wangu?”

² Iyo pakwamuka wanguti, “Kutali ndi ichi! Kuti ukafwanga cha. Awona, ada kuti ŵachita kanthu kakuru pamwenga kamana kwambura kukavumbuliya ine cha; nanga ichi ada ŵandibisiyengenji? Kuti kwe viyo cha.”

³ Davidi wangwamuka wanguti, “Ausu ŵaziŵa umamphavi kuti, wareke Jonafani kuchiziŵa ichi, vinu wangaŵa ndi chitima! Kweni kwakuneneska, ndarapa Ambuya amoyo! Ndarapa umoyo wako, paja nthangara yimoza pe, pakati paku ine ndi nyifwa.”

⁴ Sono Jonafani wanguti kwaku Davidi, “Chose cho ukambenge nkhakuchitiyanga.”

⁵ Davidi wanguti kwaku Jonafani, “Awona, mawa ndi mwezi ufya, ndipo ine nditenere kwachija pa gome pamoza ndi karonga; zomera ndirute, ndamubisama kudondo mpaka ku mazulo gha zuŵa la chitatu.

⁶ Asani ausu ŵawona kuti ine palivi, iwe ukambe kuti, Davidi wangundiŵeyere kundipempha kuti ndimuzomerezge wachimbiriye kwake ku Betelehemu; pakuti kwe sembe ya chirimika ndi chirimika ya mbumba yose!

⁷ Asani ŵatiti, nchamampha! Kundiŵiyenge umampha ndamteŵeti wako; kweni asani ŵakaripa, ipo ziŵa kuti ŵangusimikizga kuchita uheni.

⁸ Pa chifukwa ichi ndi chitiye lisungu ndamteŵeti wako, pakuti wanditore ndamteŵeti wako kuŵa nawe mu phanganu lakupaturika. Kweni asani kwananga kulimo mwangu, undibaye ndiwe; chifukwa na unditoriyengenji kwausu.”

⁹ Ndipo Jonafani wanguti, “Awa! Kungaŵa viyo cha! Asani ndinguziŵa kuti nchakusimikizgika ndi ada kukuchitiya uheni, mphanyi ndilivi kukunene.”

¹⁰ Davidi wanguti, kwaku Jonafani, “Na wandikambiyenge ndiyani asani ausu ŵakumuka mwa nkhaza?”

¹¹ Jonafani wanguti kwaku Davidi, “Zanga, tirute kudondo.” Viyo wose ŵaŵi wanguruta kudondo.

¹² Ndipo Jonafani wanguti kwaku Davidi, “Ambuya, Chiuta waku Yisraele, waŵe kaboni! Asani ndaŵathoŵa ada, panyengo nge ndi iyi lamawa, pamwenga zuŵa la chitatu, awona, asani ŵe umampha paku Davidi, kumbi ndingareka kutuwa kukuziŵiska?

¹³ Ndipo asani chingaŵakondweska, ada kukuchitiya uheni, Ambuya andichitiye kwakulingana ndipo asazgiyepo so, asani ndireka kukukambiya, kuti utuwepo, ndi kuti mphanyi wenda mu chimangu. Ambuya aŵenge nawe nge ndimo aŵiya ndi ada.

¹⁴ Asani ndeche wamoyo, undirongo lisungu la chanju cha Ambuya, mwakuti ndireke kufwa;

¹⁵ ndipo ureke kudumuwako lisungu lako ku nyumba yangu muyaya. Penipo Ambuya adumuwa yose wa ŵarwani ŵaku Davidi, kumutuzgako ku chisku cha charu,

¹⁶ zina laku Jonafani lireke kudumukako ku nyumba yaku Davidi, ndipo Ambuya awezga pa ŵarwani ŵaku Davidi.”

¹⁷ Ndipo Jonafani wanguwerezgapo kurapiska Davidi pa chifukwa cha chanju cha paku iyo; pakuti wangumwanja nge ndimo wangwanjiya umoyo wake.

¹⁸ Sono Jonafani wangunena nayo, “Mawa ndi mwezi ufya; iwe pakaŵangavi, chitengo chako chikaŵanga cha mwazi.

¹⁹ Ndipo pa zuŵa la chitatu ukasoŵanga ukongwa; utenere kuruta ku malo kuwa ungubisama pa nyengo yiya makani yagha ghanguŵiyako, ukaje pamphepete pa rweka la muru wa mya.

²⁰ Ndipong'enge mivwi yitatu kuchiri kwenikuwa, nge nkhuti ndilasa pa kanthu.

²¹ Ndipo awona nditumenge mhurwa, kuti, ‘Ruta, kato mivwi.’ Asani nditumunene mhurwa kuti, ‘Wona, mivwi ye mumphepete kuchiri kuno, uto,’ mbwenu iwe uzenge, chifukwa ndarapa Ambuya amoyo, kaheni kulivi kwaku iwe kweni umampha ndiwo.

²² Kweni asani ndinena ndi mhurwa yo kuti, ‘Wona, mivwi ye kunthazi kwako,’ mbwenu rutanga; pakuti Ambuya akutuma kutali,

²³ asani nkhwaku vyo iwe ndi ine tarongoro, awona, Ambuya ŵe pakati paku iwe ndi ine muyaya.”

²⁴ Viyo Davidi wangubisama mudondo, mwezi ufya unguti wafika karonga wanguja pasi kurgha.

²⁵ Karonga wangu ja pa chitengo chake, nge mpha nyengo zinyake, pa chitengo cha pafupi ndi chimati; Jonafani wanguja kwakulereskana nayo, Abnere wanguja kumphepete kwaku Sauli, kweni malo ghaku Davidi ghanguja mwazi.

²⁶ Kweni ndipuuli pa zuŵa liya Sauli kuti wangukamba kanthu cha, chifukwa wangupima kuti, “Kanthu kanyake kamuwiya; ngwambura kutozgeka, nadi ngwambura kutozgeka.”

²⁷ Kweni pa zuŵa la chiŵi ku mlenji pavuli pa mwezi ufya, malo ghaku Davidi ghenga mwazi. Ndipo Sauli wangufumba Jonafani mwana wake, “Chifukwa nchine mwana waku Jese walivi kufika ku chakurgha, zana ndi msana wale?”

²⁸ Jonafani wangwamuka Sauli, “Davidi wangundiŵeyere kuti ndimuzomerezge warute ku Betelehemu;

²⁹ wanguti, ‘Ndizomerezgeni ndirute; pakuti mbumba yangu ye ndi sembe ku muzi, ndipo mubali wangu wandilanguliya kuŵapo, viyo asani ndingasaniya lisungu mu maso ghinu ndizomerezgeni ndirute, ndikaŵawone ŵabali ŵangu.’ Pa chifukwa ichi watondeka kuza ku gome la karonga.”

³⁰ Sono kandundu kaku Sauli kangukore paku Jonafani, wangunena nayo, “Wamwana wa munthukazi wa mtafu ndi wakugaruka, kumbi utiti ndireka kuziŵa kuti wasankha mwana waku Jese, mwakuti ujipaske soni, ndi ku soni ya nkhuli ya anyoko?

³¹ Pakuti nyengo yose yo mwana waku Jese wakajariyanga ndi umoyo pa charu chapasi, paulengevi chingana ndiwe nanga ndi ufumu wako kuti ukakhozgekanga cha. Chifukwa ichi tuma ŵanthu wapenjeke ndipo ŵazi nayo kuno kwangu, pakuti nadi wakafwanga.”

³² Jonafani wanguŵamuka awiske, “Wakafwiyanganji? Wachitanji?”

³³ Sono Sauli wangumupong'a ndi mkondo kuti wamungwazi; viyo Jonafani wanguziŵa kuti awiske ŵenga ŵakunozgeka kubaya Davidi.

³⁴ Jonafani wangusoka kutuwapo pa gome ndi mtima wakukwiya ukongwa, ndipo kuti wangurgha cha pa zuŵa la chiŵi la mwezi, pakuti wanguŵa wachitima ndi Davidi, chifukwa awiske ŵangumurengeska.

³⁵ Ku mlenji Jonafani wanguruta ku dondo pa nyengo yo wangupangana ndi Davidi, wakuŵa ndi munyamata mumanavi.

³⁶ Ndipo wangunena ndi munyamata wake, “Chimbiya kasaniye mivwi yo ndipong'a.” Munyamata weche kuchimbiya, wangupong'a muvwi kuŵenuska pachanya pake.

³⁷ Munyamata wanguti wafika pa malo po muvwi unguwa, Jonafani wangudanirizga ku munyamata yuwa wanguti, “Asi muvwi we kunthazi kwako?”

³⁸ Ndipo Jonafani wangudanirizga pavuli pa munyamata yuwa, “Endanga, tinthimika, reka kuma.” Viyo munyamata waku Jonafani wangutondo mivwi, wanguza nayo ku mbuyake.

³⁹ Kweni munyamata yuwa kuti wanguziŵa kanthu cha; Jonafani pe ndi Davidi ndiwo ŵanguziŵa cho ŵachitanga.

⁴⁰ Jonafani wanguto vidya vyake wangupaska ku munyamata wake, wangumunene, “Ruta ukenge navyo ku muzi.”

⁴¹ Wanguti waruta munyamata yuwa, Davidi wangusotopoka pa muru wa mya, wanguwa pasi kavunama wangukotama katatu; ndipo ŵangufyofyonthana yumoza ndi munyake, ndi kuliriyana yumoza ndi munyake, kweni Davidi wanguliya kwakuruska.

⁴² Viyo Jonafani wanguti kwaku Davidi, “Rutanga mu chimangu, ifwe tose taŵi tarapiyana mzina la Ambuya kuti, ‘Ambuya akaŵanga pakati paku ine ndi iwe, pakati pa mbeu yangu ndi mbeu yako muyaya.’ ” Pavuli Davidi wangusoka, wanguruta, ndipo Jonafani wanguwere ku muzi.