1 Samuele 19 - Tonga Bible 1986

Davidi waŵembeka ndi Sauli

¹ Sauli wangukamba ndi mwana wake Jonafani ndi ŵateŵeti ŵake wose, kuti wabayi Davidi kweni Jonafani, mwana waku Sauli wangukondwere ukongwa mwaku Davidi.

² Jonafani wanguti kwaku Davidi, “Ada a Sauli ŵapenja kukubaya; viyo la mawa ujichenjere, uje mu malo ghakubisika ndipo ujibise;

³ ine ndirutenge ndamukuma pamoza ndi ada kudondo ko iwe wamukuŵa, sono ine ndikambenge nawo ada vyapaku iwe; ndipo asani ndaziŵa kanthu ke kose ndikukambiyenge.”

⁴ Sono Jonafani wangukamba umampha gha kurumba Davidi kwa wiske a Sauli, wanguti, “Rekani kughanaghaniya uheni pa mteŵeti winu Davidi; chifukwa iyo walive kumunangiyani kanthu, ndipo nchitu zake zaŵa zamampha kwaku imwe.

⁵ Pakuti wanguŵika umoyo wake mu chikufi chake; ndipo wangubaya muFilisti, ndipo Ambuya anguchita utaski ukuru paku Yisraele yose. Munguwona, mungukondwere, na chifukwa nchine mulakwenge kumikana ndi ndopa zambura kafukwa, pakubaya Davidi wambura kafukwa?”

⁶ Viyo Sauli wanguvwiya mazu ghaku Jonafani; ndipo Sauli wangurapa, “Ndarapa Ambuya amoyo, kuti wakabayikanga cha.”

⁷ Sono Jonafani wangudana Davidi, wangumurongo vinthu vyose ivi. Ndipo Jonafani wangumutore Davidi kwaku Sauli, ndipo wajanga pa maso pake nge ndi kali.

⁸ Yinguŵapo so nkhondo; Davidi wangutuwa kurwa ndi ŵaFilisti, ndipo wangubaya ŵanandi ukongwa ndikuti ŵanguthaŵa paurongo pake.

⁹ Sono mzimu uheni wakutuliya ku Ambuya ungumuwiya so Sauli, po wanguja mu nyumba yake ndi mkondo mu janja lake; ndipo Davidi wambanga kalingu.

¹⁰ Sauli wangukhumba kumukandirizgiya Davidi ku chimati ndi mkondo; kweni wangumuŵerama Sauli mwakuti wangugwaza mkondo pa chimati. Ndipo Davidi wangupozomoka, wanguthaŵa.

¹¹ Usiku uwa Sauli wangutuma mathenga ku nyumba yaku Davidi kwachimukhazga, mwakuti wamubaye ku mlenji. Kweni Mikala, muwoli, waku Davidi, wangumunene, “Asani ureka kutaska umoyo wako usiku unu mawa ukabayikanga.”

¹² Viyo Mikala wangumutuzgiya kubwaro Davidi pakumusiskiya pa dangazi wangupozomoka ndipo wanguthaŵa.

¹³ Mikala wanguto chikozgu wangugoneka pa chita ndi kuŵikako ku mutu wake msamiro wa weya wa mbuzi, wanguchivwinkha ndi vivwaro.

¹⁴ Ndipo po Sauli wangutuma mathenga kwa chimuto Davidi, Mikala wanguti, “Watama.”

¹⁵ Sauli wangutuma mathenga kuti ghakamuwone Davidi ndikuti, “Mutoriyeni kuno kwangu pa chita mwakuti ndi mubaye.”

¹⁶ Po mathenga ghanguti ghasere, ehe, chikozgu chenga pa chita, musamiro wa weya wa mbuzi kumutu kwake.

¹⁷ Sauli wanguti kwaku Mikala, “Chifukwa nchine wandinyenga viyo ndipo wazomerezga murwani wangu kuruta, wapozomoka?” Mikala wanguti, “Wangundinene kuti, ndizomerezge ndirute, kumbi ndikubayiyengenji?”

¹⁸ Sono Davidi wanguthaŵa ndipo wangupozomoka, wanguza kwaku Samuele ku Rama, ndipo wangumukonkhoske vyose vyo Sauli wangumuchitiya. Ndipo iyo ndi Samuele ŵanguruta ndi ŵanguja pa Nayoti.

¹⁹ Ndipo kungukambikiya Sauli kuti, “Awonani, Davidi we pa Nayoti mu Rama.”

²⁰ Sauli wangutuma mathenga kwachimuto Davidi; ndipo po wanguwona, mzinda wa ŵamchimi uchichima, ndi Samuele wakuma nge ndi mura pachanya pawo, mzimu waku Chiuta unguwiya pa mathenga ghaku Sauli nawo so ŵanguchima.

²¹ Kunguti kwakambikiya Sauli, wangutuma so mathenga ghanyake, iwo nawo ŵanguchima. Sauli wangutuma mathenga ghanyake ka chitatu, ndipo nawo so ŵanguchima.

²² Pavuli iyo mweneko wanguruta ku Rama, ndipo wangufika pa chisima chikuru cho che mu Seku; wangufumba, “Wepani Samuele ndi Davidi?” Yumoza wanguti, “Onani, ŵe pa Nayoti mu Rama.”

²³ Kutuwa pa wanguruta ku Nayoti mu Rama; ndipo mzimu waku Chiuta unguwiya so paku iyo, ndipo wachiruta wachimanga, mpaka po wangufika pa Nayoti mu Rama.

²⁴ Ndipo nayo so wanguzuwa vivwaro vyake, wanguchima paurongo paku Samuele, ndipo wangugona nkhuli zuŵa liya lose ndi usiku wase uwa. Chifukwa ichi ŵatiti, “Kumbi Sauli nayo so we mukati mu ŵamchimi?”