1 Samuele 16 - Tonga Bible 1986

Davidi wapakika mafuta kuŵa karonga

¹ Ambuya anguti kwaku Samuele, “Mpaka zuŵanji ukachitiyanga chitima Sauli, pakuti Ine ndamukana kuti waŵe karonga pa ŵaYisraele? Zaza supa yako ndi mafuta. Ndipo ruta; ndikutumenge kwaku Jese waku Betelehemu, pakuti ndajiwone ndamwene karonga mukati mu ŵana ŵake.”

² Samuele wangwamuka, “Ndirutenge uli? Asani Sauli wavwa ichi, wandibayenge.” Ambuya anguti, “Uto thole la ng'ombe, ndipo wamukuti, ‘Ndaziya kwazipereka sembe ku Ambuya.’

³ Ukadani Jese kuti waze ku sembe, sono ndi kurongonge mo ukachitiyanga, ndipo wukandipakiyanga yo Ine ndamkukuzumbuliya.”

⁴ Samuele wanguchita cho Ambuya angumulanguliya, ndipo wanguza ku Betelehemu. Ŵara ŵa msumba ŵanguza kukamana nayo ŵakuŵa ndi chitenthe, ŵanguti, “Kumbi mwaza mu chimangu?”

⁵ Iyo wanguti, “Muchimangu; ndaziya kwazipereka sembe ku Ambuya; jipaturiskeni mwaŵeni, ndipo muzi pamoza nane ku sembe.” Ndipo wangupaturiska Jese ndi ŵana ŵake ŵanthurumi wanguŵadaniya ku sembe.

⁶ Ŵanguti ŵafika, wangulereska paku Eliabu wangughanaghana, “Nadidi wakupakika wa Ambuya we paurongo pake.”

⁷ Kweni Ambuya anguti kwaku Samuele, “Reka kulereska pa kawonekero kake nanga mphautali wa msinkhu, wake, chifukwa ine nda mukana; pakuti ine kuti ndiwona mo munthu wawone cha; munthu walereska pa kawonekero ka kubwaro, kweni Ine ndilereska mtima.”

⁸ Sono Jese wangudana Abinadabu ndi kumujumphiska pa maso paku Samuele. Ndipo wanguti, “Nanga ndi uyu kuti Ambuya amusankha cha.”

⁹ Jese wangujumphiskapo Shama, Samuele wanguti, “Nanga ndi uyu kuti Ambuya amusankha cha.”

¹⁰ Jese wangujumphiska pa maso paku Samuele ŵana ŵake ŵankhonde ndi ŵaŵi. Samuele wangumnene Jese, “Wose yaŵa Ambuya kuti aŵasankha cha.”

¹¹ Sono Samuele wanguti, “Kumbi ŵana ŵako wose ŵepanu?” Jese wanguti, “Yo wajako ngwakumariya, kweni awonani, waliska mberere.” Samuele wanguti kwaku Jese, “Tuma ŵakamuto, chifukwa kuti tijenge pasi cha mpaka po iyo waza pano.”

¹² Wangumutumiya munthu ndipo wanguza nayo. Wenga muyera wakuŵa ndi maso ghakunozga wakuma umampha. Ambuya anguti, “Soka umupake; chifukwa ndiyo mwenuyu.”

¹³ Samuele wanguto supa ya mafuta, wangumupaka kumupatuwa mukati mu ŵabali ŵake; ndipo mzimu wa Ambuya unguza ndi nthazi paku Davidi kutuliya pa zuŵa liya mpaka ku urongo. Samuele wangusoka, ndi kuruta ku Rama.

¹⁴ Viyo mzimu wa Ambuya ungutuwamo mwaku Sauli, ndipo mzimu uheni wakutuliya ku Ambuya ungumusuzga.

¹⁵ Ŵateŵeti ŵaku Sauli ŵangunena nayo, “Awonani sono, mzimu uheni wakutuliya kwaku Chiuta utukusuzgani.

¹⁶ Sono mbuyafwe, languliyani ŵateŵeti ŵinu, wo ŵe paurongo pinu, ŵapenje munthu yo nchilimbi cha kumba kaligu; mwakuti po mzimu uheni waku Chiuta ungakuziyani, iyo wambenge, ndipo muŵenge umampha.”

¹⁷ Sauli wanguti ku ŵateŵeti ŵake, “Ndisaniriyeni munthu yo wangaziŵa kumba umampha, mutoriyeni kunu.”

¹⁸ Yumoza wa ŵahurwa wangwamuka wanguti, “Awonani, Ndawona mwana waku Jese waku Betelehemu; yo nchilimbi mu kumba, munthu yo ngwanthazi, ndipo ndi ngwazi ya kurwa, wa vinjeru mu kurongoro, munthu wakuma umampha; ndipo Ambuya ŵe nayo.”

¹⁹ Chifukwa ichi Sauli wangutuma mathenga kwaku Jese, ndikuti, “Nditumiyi Davidi mwana wako, yo we ku mberere.”

²⁰ Sono Jese wanguto mbunda wanguyipingizga viŵande, ndi thumba la vinyo ndi kamwana kambuzi, wangu vitumizga kwaku Sauli pa janja laku Davidi.

²¹ Davidi wanguti wafika kwaku Sauli wangwamba kumuteŵete. Sauli wangumwanja ukongwa Davidi, ndipo wangumuŵika kuŵa wakupinga vidya vyake.

²² Viyo Sauli wangutuma kwaku Jese, wakuti, “Zomera kuti Davidi wajaririye pakunditeŵete, pakuti wasaniya wezi mu maso ghangu.”

²³ Ndipo po pose mzimu uheni wakutuliya kwaku Chiuta ungumufikiya Sauli, Davidi wanguto kaligu wangumba; viyo Sauli wangusisipuskika, wanguŵa umampha, mzimu uheni ungutuwamo mwake.