1 Petro 4 - Tonga Bible 1986

Kusintha kwa umoyo

¹ Viyo mwakuti Kristu wangukomwe mu liŵavu, namwe so jiphatiyeni ndi kapimidu keniko ndiko (pakuti mweniyo wakomwa mu liŵavu warekeko ku ulakwi);

² viyo kuti mu nyengo yakujamo so mu liŵavu mungajariyanga ku maulakalaka gha ŵanthu so cha, kweni ku khumbo laku Chiuta.

³ Chifukwa nyengo yo yakapo njikuru kutataliya khumbiro la ŵaMitundu, ndi kujende mu mauyaya, maulakalaka, mauloŵevu, vindimba, maunkhamwi, masopedu ghamwikhu gha ŵangoza.

⁴ Paku chenichi ŵazizwa, chakuti mureka kuchimbiriyamo pamoza nawo mu mauheni gha utayisi, ndipo ŵampikisani,

⁵ kweni ŵanenenge iwo kafukwa, kwaku mweniyo warongosoleke kweruzga ŵamoyo ndi ŵakufwa.

⁶ (Chifukwa pa chifwa chenichi kungutaulikiya evangeli ku ŵakufwa nawo, alinga kuti ŵeruzgike ku liŵavu uli mbanthu, kweni kuti ŵajariye wamoyo ku mzimu kwakuyana ndi Chiuta.)

⁷ Kweni umari waku vyose waŵandika: viyo muŵe ŵavinjeru, ndipo ziziyani ku marombu.

⁸ Pachanya paku vyose muŵe ndi chanju chakufikapo mwaku mwaŵeni, pakuti chanju chivimba muru wa vilakwa.

⁹ Muŵe ŵawezi kuŵalendo, yumoza ku munyake kwambura dinginiku:

¹⁰ uli ndimo munthu yose warondere chawezi, teŵetiyanani ndi chenicho, nge mbateŵeti ŵeneko ŵa wezi wa mtundumtundu waku Chiuta.

¹¹ Asani munthu wakamba, wakambe kwakuyana ndi makambidu ghaku Chiuta; asani yumoza wateŵete, wateŵetenge kwakulingana ndi nthazi zenizo Chiuta wampaska, alinga kuti mwaku vyose wakankhuskike Chiuta mwaku Yesu Kristu, kwaku mweniyo kwe unkhankhu ndi ukumu muyayamuyaya. Ameni.

Kukomwa nge ndi Mkristu

¹² Mwaŵakwanjiwa, mungazizwanga ndi kesedu ulaka nkha rufya lo lazamkwesa imwe, nge nkhuti kachilendo kamuwiyani:

¹³ kweni uli mphenipo musanganiya vyakukomwa vyaku Kristu kondwani; alinga kuti mu uvumbuzi wa unkhankhu wake, mumwemwetiyenge kwakukondwa.

¹⁴ Asani mutozeka chifukwa cha zina laku Kristu, mwe ŵamwaŵi; pakuti Mzimu wa unkhankhu, Mzimu waku Chiuta wapumuliya pinu.

¹⁵ Kweni wareke kukomwa nanga njumoza waku imwe uli ngwambanda, pamwenga munkhungu, pamwenga wakuchita uheni, pamwenga ndi mwendanatu.

¹⁶ Kweni asani wakomwa uli ndi mkristu, wareke kuŵa wasoni; kweni wakankhuske Chiuta mu zina lenili.

¹⁷ Pakuti ndi nyengo yakuti cheruzgu chiyambenge pa nyumba yaku Chiuta: kweni asani chidanga paku ifwe; chiŵenge chine chigoti cha ŵakutafuliya evangeli waku chiuta?

¹⁸ Ndipo “Asani murunji ndiyo wataskika kwa unononu, mkana Chiuta yo ndi mulakwi wawonekenge pani?”

¹⁹ Viyo, so ŵeniwo ŵakomwa kwakulingana ndi khumbo laku Chiuta ŵapazgiye mauzima ghawu mu kuchita umampha ku mlengi wamagomekezgeka.