1 Petro 3 - Tonga Bible 1986

Ŵawoli ndi ŵarumi

¹ Kwakulingana nako, mwaŵanthukazi, muŵe ŵakujithereske ku ŵarumi ŵaku mwija, alinga kuti, chingana ŵatafuliya mazu gho ŵanyake, chifukwa cha kajaridu ka ŵawoli ŵawo, ŵandulike kwambura mazu,

² ŵachithoŵa kajaridu kinu kakutowa kamu chopu.

³ Kadghoŵedu kaku ŵeniwo kangaŵanga ko kakubwaro cha, ka chiluka cha sisi, ndi ka kavwaridu kavya golide, pamwenga ka chivwaru cha munjirira;

⁴ kweni munthu yo wakubisama mu mtima, watenere kadghoŵedu kambura kuwo, ka mzimu upovu ndi wachisisi, wo pa maso ghaku Chiuta ngwakuzirwa ukongwa.

⁵ Chifukwa mwaka ŵanthukazi ŵakupaturika nawo, wo ŵagomekezganga paku Chiuta, ŵajidghoŵeskanga viyo, pakujithereske ku ŵarumi ŵawo;

⁶ uli ndimo Sara wangumuvwiya Abrahamu, pakumtamula mbuya; waku mweniyo mwaŵa ŵana, pakuchita umampha ndi pakureka kopa wofi wose wakuchiruska.

⁷ Viyo so, mwaŵanthurumi, jariyani nawo pamoza uli ndi mziŵiru, ndipo mugaŵiye munthukazi ulemu, uli nkhu chiyaŵi chakutomboroka, uli so nkhwaku wo mbakuhariya pamoza wezi wa umoyo; viyo kuti ghangaswereskeka cha marombu ghinu.

Kukomwa pakuchita urunji

⁸ Ndipo pakumariya, mose muŵe ŵakuyana mumtima, ŵakuvwiyapo pamoza, ŵakwanja ŵabali, ŵa chitima chamampha, ŵa mitima yakujiyuyuwa;

⁹ ŵakuwerezge uheni pa uheni cha, pamwenga chiphara pa chiphara; kweni kwakupambanako ndiko, muŵe ŵakutumbika; pakuti kwaku chenichi mungudanikiya, alinga kuti muharenge thumbiku.

¹⁰ Chifukwa, “Yo watanja umoyo, ndi wakhumba kuwona mazuŵa ghamampha, warekeske lilime lake ku uheni, ndi milomo yake kuti yingaŵereŵeta cha urghargha;

¹¹ wapambukeko ku uheni, ndi wachite umampha; wapenje chimangu, ndipo wachindondoloske.

¹² Pakuti maso gha Mbuya ghe pa ŵarunji, ndi makutu ghake ku niniziku lawo; kweni chisku cha Mbuya chimikana ndi ŵakuchita uheni.”

¹³ Ndipo njani yo wamchitiya imwe uheni, asani mupamphukiya cho nchamampha?

¹⁴ Kweni asani mungakomwa pa chifwa cha urunji, mweŵamwaŵi; viyo mungopanga chofyu chawo, ndipo mungatenthemeskeka cha.

¹⁵ Kweni patuwani Kristu uli ndi Mbuya mu mitima yinu: pakurongosoleke nyengo zose kumwamuka yose wakumfumbani chifukwa cha chigomezgu chamwinu, kweni ndi upovu ndi wofi;

¹⁶ pakuŵa ndi njuŵi yamampha; viyo kuti mwaku chenicho musuzgika ŵalengeskeke wo ŵaparamula kajaridu kinu kamampha ka mwaku Kristu.

¹⁷ Chifukwa nkhwamamphako ukongwa, asani khumbo laku Chiuta lingakhumba viyo, kukomwa uli mbakuchita umampha kwakuruska nge mbakuchita uheni.

¹⁸ Pakuti Kristu nayo wangukomwe kamoza pa vilakwa, mrunji chifukwa cha ŵaura urunji, alinga kuti watitole kwaku Chiuta, wanguti waperekeka mu liŵavu, kweni wakuchitika wamoyo mu mzimu;

¹⁹ mwaku wo mzimu wanguruta ndi wangutauliya ku mizimu yamu ulinda,

²⁰ wo kali ŵangutafula, penipo chilekerezga chaku Chiuta chalerezenga mu mazuŵa ghaku Nowa, chichirongosoleka chingaraŵa mwaku chenicho ŵakuŵerengeka, ndiwo mauzima ghankhonde ndi ghatatu, ŵangutaskika mu maji:

²¹ maji ghenagha chenga chikozgu, chakurongo ubatizo wo sono umutaskani kusuka lisilu la liŵavu cha, kweni niniziku la njuŵi yamampha kuchiri kwaku Chiuta ndi chiyuka chaku Yesu Kristu,

²² mweniyo we ku marghe ghaku Chiuta, wati waruta kuchanya, pakuthereskeke kwaku iyo ŵangelo ndi mitufu ndi Vyanthazi.