1 Petro 2 - Tonga Bible 1986

Mwa ŵa moyo ndi mtundu wakupaturika

¹ Viyo, pakujizuliya uheni wose, ndi urghargha wose, ndizifuzi, ndi viŵinu, ndi masuzgu ghose,

² nge mbamjedu ŵakuwa sono, fwenkhiyani mkaka wo wamzimu wambura jufyu, alinga kuti mwaku weniwo mukuliyenge ku utaski,

³ asani nadi mwalaŵa kuti ngwaulemu Kristu.

⁴ Muzenge na kwaku mweniyo, mwa wamoyo, wakupatika nadi ndi ŵanthu, kweni kwaku Chiuta wakusankhika, wakuzirwa;

⁵ ndipo mwaŵeni, uli ndi mya yamoyo muzengeke nyumba ya mzimu, kwachiŵa uzukuru wakupaturika, kuperekapo visopu vya mzimu, vyamarondeka kwaku Chiuta mwaku Yesu Kristu.

⁶ Chifukwa mu lembo kutiti, “Aona, ndijarika mu Zioni mwa, wachikhozge-nyondo, wakusankhika, wakuzirwa: ndipo mweniyo ngwakuvwana paku iyo wangalengeskeka cha.”

⁷ Viyo kwaku imwe mwaŵakuvwana kwe kuzirwa ko: kweni ku ŵamtafu, “Mwa weniwo ŵakuzenga ŵangupata, weniwo waŵa mutu wa nyondo”;

⁸ ndi, “Mwa wachiguŵisku, ndi jarawe la livwizu; Pakuti ŵaguŵa penipo, pakutafula pa mazu gho”; kwaku chenicho nacho ŵangutemeke.

⁹ Kweni ndimwe fuku lakusankhika, uzukuru waufumu, mtundu wakupaturika, khamu lapa mtima wake, viyo kuti mutaulenge maumampha ghaku mweniyo wangumdanani mu mdima kuyiya ku ukweru wake wakuzizwiska;

¹⁰ imwe mwaŵenimwe kali kuti mwenga khamu so cha, kweni sono mwe khamu laku Chiuta; mwaŵenimwe mwengavi kuchitikiya lisingu, kweni sono mwachitikiya lisungu.

Ŵaŵanda ŵaku Chiuta

¹¹ Mwaŵakwanjiwa, ndikuŵeyereni nge mbayinga ndi ŵalendo kufunga pa maulakalaka ghanyama, ghenigho ghaturwa pa uzima wo.

¹² Muŵe ndi kajaridu kakutowa mu ŵaMitundu wo; alinga kuti, mwaku chenicho ŵangasuza paku imwe uli mbakuchita uheni, pakuthoŵa nchitu zinu zakutowa ŵakankhuske Chiuta mu zuŵa la kuza kwake.

¹³ Chifukwa cha Ambuya muthereskeke ku mutufu wose wakwatika ndi ŵanthu; pamwenga ku karonga, nge ngwapachanya limu;

¹⁴ pamwenga ku zinduna, nge mbeniwo ŵatumika ndi iyo kwachilanga ŵakuchita uheni ndi kwachirumba ŵakuchita umampha.

¹⁵ Pakuti khumbo laku Chiuta ndaviyo, kuti pakuchita umampha musunamiske ujira wa ŵanthu ŵakupusa.

¹⁶ Jani nge mbanangwa, kweni ŵakuchitiya ndi wanangwa winu uli nchivwinkhu cha uheni cha, kweni uli mbaŵanda ŵaku Chiuta.

¹⁷ Mutumbikenge wose. Mwanjenge ubali wo. Mopenge Chiuta. Mutumbikeni karonga.

¹⁸ Mwaŵaŵanda, muthereskeke ku ŵambuyamwe mu chopu chose; ku ŵamampha ndi ŵaroŵevu wo pe cha, kweni so ku ŵakunyongoroka.

¹⁹ Pakuti chenichi nchamawongeka, asani pa chifwa cha kugomezga mwaku Chiuta munthu wakunthiyapo vyakuŵaŵa, vyambura kwene.

²⁰ Chifukwa mbulemu wakutinji, asani pakulakwa ndi kujenyeskeka mukunthiyapo? Kweni asani pakuchita umampha ndi kukomwiyapo pa umampha wo mukunthiyapo, chenichi nchamawongeka kwaku Chiuta.

²¹ Chifukwa kwaku chenichi mungudanikiya; pakuti Kristu nayo wangukomwa chifukwa chinu, ndipo wamsiyiyani chandiru, kuti mundondoloskemo mu menderu ghake.

²² Iyo wengavi kuchita chilakwa, chingana nkhuti lingusanirika fuvyu mu mlomo wake cha;

²³ wachinyozeka iyo, kuti wanyozanga cha; wachikomwa, kuti wafinganga cha, kweni wajiperekanga kwaku mweniyo wateruzga kwaurunji.

²⁴ Iyo mweneko wangunyamuliya vilakwa vidu mu liŵavu lake pa muti wo, alinga kuti ifwe taŵakufwa kuchiri ku vilakwa tijaririyenge ŵamoyo kuchiri ku urunji; mu vikukusa vyaku mweniyo munguchizgika.

²⁵ Chifukwa mwenga nge ndi mberere zakuranda; kweni sono mwanyongoke ku Mliska yo ndi Mlereze wa mauzima ghinu.