1 Petro 1 - Tonga Bible 1986

¹ Kalata wakutuwa kwaku Petro wakutumika waku Yesu Kristu, ku ŵalendo ŵakuchariya mu Pontu, Galatia, Kapadokia, Asia ndi Bithunia,

² ŵakusankhika uli ndi mziŵiru limu waku Chiuta Dada, mu chitowesku cha Mzimu, ku muvwiyu ndi ku chiwazga cha ndopa zaku Yesu Kristu: Wezi ndi chimangu vyandaniskikiye kwaku imwe.

Chigomezgu chamoyo

³ Warumbike Chiuta wiske wa Mbuyafwe Yesu Kristu, mweniyo kwakuyana ndi unandi wa lisungu lake wangutipapiya so ku chigomekezgu chamoyo mu chiyuka chaku Yesu Kristu ku ŵakufwa,

⁴ ndi so ku chihara chambura mawoleka, ndi chambura banga, ndi chambura mafoteka, chakuŵikikiya imwe kuchanya,

⁵ mwaŵakusungika ndi nthazi yaku Chiuta mu chivwanu ku utaski wakurongosoleke kuvumbulikiya mu nyengo yaumari.

⁶ Mwaku weniwo mujikankhaŵiriya, chingana nkhuti mukasuzgikanga kamanavi sono mu mesedu ghamtundumtundu,

⁷ alinga kuti chirozgu cha chivwanu chinu, chakuzirwa kwakuruska golide, lo litanangika chingana ndakweseka mu moto, chisanirike kutataliya rumbu ndi unkhankhu ndi thamu pa uvumbuzi waku Yesu Kristu;

⁸ mweniyo mwaŵambura kumwona mutumwanja; mwaku mweniyo sono mwaŵambura kumlereska, kweni mwaŵakuvwana nayo, mukankhaŵiya ukongwa ndi chimwemwe chambura makambika ndi chakuzara unkhankhu,

⁹ nge nchaduwu cha chivwanu chinu, muronda utaski wa mizimu yinu.

¹⁰ Pakuweniwo utaski ŵamchimi ŵangurembe ndi ŵangupenjeska, ŵeniwo ŵangutauliya limu ghapa wezi weniwo utazanga kwaku imwe;

¹¹ pakupenja nyengo ninji pamwenga yakutinji Mzimu waku Kristu wamwaku iwo warongonga, uchisimikizgiya limu vyakukomwa vyaku Kristu, ndi maunkhankhu gha pavuli paku vyo.

¹² Kwaku ŵenaŵa kunguvumbulikiya, kuti kwaku ŵija cha, kweni kwaku imwe ŵateŵetiyanga vyenivi, vyo sono vyataulikiya imwe ndi ŵeniwo ŵangumkambiyani evangeli mu Mzimu Wakupaturika, yo wangutumika kutuliya kuchanya; mwaku vyenivyo ŵangelo ŵanweka kulingirizgamo.

¹³ Chifukwa chenichi pakujichinyiya mu vionu vya vinjeru vinu, zizani ndi gomekezgiyani limu kwaumari pa wezi wo utolekiyenge kwaku imwe pa uvumbuzi waku Yesu Kristu;

¹⁴ uli mbana ŵa ŵakuvwiya kwambura kujilinganizga ndi malikhumbira ghakudanga ghamu ujira winu,

¹⁵ kweni uli ndimo mweniyo wangumdanani waliri wakupaturika, namwe so muŵe ŵakupaturika mu kajaridu kose;

¹⁶ chifukwa kwalembeka, “Mukaŵanga ŵakupaturika, pakuti nde wakupaturika ine.”

¹⁷ Ndipo asani mumudana Dada mweniyo kwambura kurumba chisku ngwakweruzgiya uli ndi nchitu ya munthu yose, mu wofi jaririyani nyengo yo ya chitandara chinu:

¹⁸ pakuziŵa kuti munguwomboleka, ndi vyakuwo cha, ndi siliva pamwenga golide cha, ku kajaridu kinu kauvumbwa kakurondeka ku ŵauskemwe,

¹⁹ kweni ndi ndopa zakuzirwa, uli za mwanamberere wambura kalema ndi wambura banga, ndopa nazo zaku Kristu:

²⁰ mweniyo wanguziŵikwiya limu, chenga chindajarikike charu, kweni wangurongoleka pa umariwa zinyengo chifukwa chaku imwe,

²¹ mwaŵakuvwaniya mwaku iyo paku Chiuta, yo wangumyuska ku ŵakufwa, ndi wangumpaska unkhankhu; viyo kuti chivwanu chinu ndi chigomekezgu chinu viŵe paku Chiuta.

²² Mwati mwatozge mauzima ghinu mu muvwiyo wa uneneska ku kwanjaŵabali kwambura fuvyu, mwanjane kwamtima ndi kwakufwiririyapo:

²³ pakupapika so, ku mbeu yamawoleka cha, kweni ku yiziramawoleka, mu mazu ghaku Chiuta, ghamoyo ndi ghakujaririya.

²⁴ Chifukwa kuti, “Munthu yose we uli mbuteka, ndi unkhankhu wake wose uli ndi luŵa la uteka. Uteka wo umira, ndipo luŵa lake limota:

²⁵ kweni nenedu lo la Mbuya lijaririya muyaya.” Ndipo lenili ndi nenedu lenilo litaulikiya kwaku imwe.