1 Mikoka 24 - Tonga Bible 1986

Vigaŵa vinayi vya sembe

¹ Ivi ndivyo vyenga vigaŵa vya ŵana ŵaku Aroni. Ŵana ŵaku Aroni: Nadabu, Abihu, Eleazara, ndi Itamara.

² Kweni Nadabu ndi Abihu wangufwa auskeu ŵeche ŵamoyo, ndipo ŵengavi ŵana. Viyo Eleazara ndi Itamara ŵanguŵa wazukuru.

³ Ndi chovyo chaku Zadoki wamu ŵana ŵaku Eleazara ndi Ahimeleki wamu ŵana ŵaku Itamara Davidi wanguŵaŵika mu zinchitu za uteŵeti wawo.

⁴ Pakuti mu ŵana ŵaku Eleazara mungusanirika ŵara ŵanandi kwakuruska mu ŵana ŵaku Itamara, viyo ŵangugaŵikiya pasi pa ŵarongozgi ŵa nyumba za auskeu. Mukati mu ŵana ŵaku Eleazara mwenga ŵarongozgi chumi pachanya ŵankhonde ndi yumoza ŵa nyumba za auskeu, mu ŵana ŵaku Itamara mwenga ŵankhonde ndi ŵatatu.

⁵ Ŵangugaŵika ndi mphenduzga, wose ŵakuyana, chifukwa ŵakulangula ŵa malo ghakupaturika ndi ŵakulangula ŵaku Chiuta wose ŵenga ŵamu ŵana ŵaku Eleazara ndi ŵana ŵaku Itamara.

⁶ Ndipo Shemai mlembi, mwana waku Netanale wamu ŵaLevi wanguŵalemba paurongo pa karonga ndi ŵana ŵa karonga, ndi Zadoki mzukuru, ndi Ahimeleki, mwana waku Abiyatari, ndi ŵara ŵa nyumba za auskeu, ŵazukuru ndi ŵaLevi; nyumba yumoza ya auskeu yingutondoleke Eleazara ndi yinyake Itamara.

⁷ Sono mphenduzga yakudanga yinguwiya Yehoyaribu, yachiŵi Yedaya

⁸ yachitatu Hirimu, yachinayi Serimu,

⁹ ya chinkhonde Malakiya, yachinkhonde ndi chimoza Mijamini,

¹⁰ yachinkhonde ndi chiŵi Hakozi, ya chinkhonde ndi chitatu Abija,

¹¹ yachinkhonde ndi chinayi Yeshua, ya chumi Shekaniya,

¹² ya chumi pachanya yumoza Eliashibi, ya chumi pachanya ziŵi Yikimu,

¹³ ya chumi pachanya zitatu Hupa, ya chumi pachanya zinayi Yashebeyabu,

¹⁴ ya chumi pachanya zinkhonde Beliga, ya chumi pachanya zinkhonde ndi yumoza Imeri,

¹⁵ ya chumi pachanya zinkhonde ndi ziŵi Heziri, ya chumi pachanya zinkhonde ndi zitatu Hapizezi,

¹⁶ ya chumi pachanya zinkhonde ndi zinayi Petahiya, ya machumi ghaŵi Yehezikele,

¹⁷ ya machumi ghaŵi pachanya yumoza Yakini, ya machumi ghaŵi pachanya ziŵi Gumula,

¹⁸ ya machumi ghaŵi pachanya zitatu Delaya, ya machumi ghaŵi pachanya zinayi, Maziya.

¹⁹ Yagha ndigho malongosoledu ghawo mu uteŵete wawo kuzachisere mu nyumba ya Ambuya kwakulingana ndi kachitidu kawo pasi paku Aroni wiskeu nge ndimo Ambuya Chiuta waku Yisraele wangumlanguliya.

²⁰ ŴaLevi wo ŵangujapo ndi yaŵa: ŵana ŵaku Amramu, Shubaeli; mu ŵana ŵaku Shubaeli, Yedya.

²¹ ŴaRehabiya: mu ŵana ŵaku Rehabiya, Ishiya wakudanga.

²² ŴaIzhari, Shelomoti; mu ŵana ŵaku Shelomoti, Yahati.

²³ Ŵana ŵaku Hebroni: yeriya wakudanga, Amariya wachiŵi, Yahaziele wachitatu, Yekameyamu wachinayi.

²⁴ Ŵana ŵaku Uzieli, Mika; mu ŵana ŵaku Mika, Shamali.

²⁵ Mbali waku Mika, Ishiya; mu ŵana ŵaku Ishiya, Zekariya.

²⁶ Ŵana ŵaku Merari: Mahili ndi Mushi; ŵana ŵaku yaziya: Beno.

²⁷ Ŵana ŵaku merari: ŴaYaziya, Beno, Shohamu, Zakuri, ndi Ibiri.

²⁸ ŴaMahili: Eleazara yo wengavi ŵana.

²⁹ ŴaKishi, ŵana ŵaku Kishi: Yerehimeli.

³⁰ Ŵana ŵaku Mushi: Mahili, Ederi, ndi Yerimoti. Yaŵa ŵenga ŵana ŵa ŵaLevi kwakuyana ndi nyumba za auskeu.

³¹ Yaŵa nawo so, mura wa nyumba ye yose ya auskeu pamoza ndi mhurwa wake ŵanguchita mphenduzga, nge mbabali ŵawo ŵana ŵaku Aroni, pa maso pa karonga Davidi, Zadoki, Ahimeleki, ndi ŵarongozgi ŵa nyumba za auskeu ŵazukuru ndi ŵaLevi.