1 Mikoka 22 - Tonga Bible 1986

Davidi wanozgiya limu milimu ya kamangidu ka kasopi

¹ Davidi wanguti, “Pano paŵe nyumba ya Ambuya Chiuta ndi paŵe jochero la sembe yakocha yaku Yisraele.”

² Davidi wangulangula kuti wawungange pamoza ŵalendo wo ŵenga mu charu cha Yisraele, ndipo wanguŵika ŵakusema mya yakuzenge nyumba yaku Chiuta.

³ Davidi wangunozga so chuma chinandi cha visulo vya mzumali ya visasa vya malikomo ndi yakupapikiya pamoza ndi mkuŵa uzitu wake wambura mapimika,

⁴ ndi mathabwa gha miti ya milanje yambura maŵerengeka, pakuti ŵaSidoni ndi ŵaTuro ŵanguza ndi miti yinandi ya milanje kwaku Davidi.

⁵ Pakuti Davidi wanguti, “Solomoni mwana wangu ndi mwanamana ndi wambura kuwamo, ndipo nyumba yo yizengekiyenge Ambuya yitenere kuŵa yikuru ukongwa, ya mbiri ndi ya unkhankhu mu vyaru vyose; chifukwa ichi ndiyilongosoliyenge.” Viyo Davidi wangunozga vinandi ukongwa wenga wandafwe.

⁶ Wangudana mwana wake Solomoni, ndi wangumunene kuŵazenge nyumba Ambuya Chiuta waku Yisraele.

⁷ Davidi wanguti kwaku Solomoni, “Mwana wangu, chenga mu mtima wangu kuzenge nyumba zina la Ambuya, Chiuta wangu.

⁸ Kweni mazu gha Ambuya ghanguza kwaku ine, kuti, ‘Wadiska ndopa zinandi ndi warwa nkhondo zikuru, kuti ungazenge nyumba zina langu cha, chifukwa wadiska ndopa zinandi pa charu chapasi paurongo pango.

⁹ Wona, mwana munthurumi wakapapikanga kwaku iwe; wakaŵanga munthu wa chimangu. Ndikamupumuzganga ku ŵarwani ŵake wose ŵakumuzunguliya; pakutu zina lake likaŵanga Solomoni, ndipo nkhapaskanga chimangu ndi bata kwaku Yisraele mu mazuŵa ghake.

¹⁰ Wakazengiyanga zina langu nyumba. Waŵenge mwana wangu, ine ndiŵenge wiske wake, ndipo nkhakhozganga chitengo chake cha ufumu mu Yisraele muyaya.’

¹¹ Sono wamwana wangu, Ambuya aŵe nawe, mwakuti ufiske kuzenga nyumba ya Ambuya Chiuta wako, nge ndimo wakambiya ndi zaku iwe.

¹² Viyo Ambuya ŵija akupaske vinjeru ndi kuwamu, mwakuti achikupaska ulongozgi paku Yisraele, usungenge dangu la Ambuya Chiuta wako.

¹³ Ndipo viyo ukasakatanga asani uphwerenge kusunga vilayizgu ndi vyeruzgu vyenivyo Ambuya angupangizga Mosese vyaku Yisraele. Uŵe wanthazi ndi wachiganga chamampha. Reka kopa, chingana nkhudezuka nthazi.

¹⁴ Mu visungu vikuru ndarongosole nyumba ya Ambuya usambasi wa golide vikwi machumi chumi (100,000) usambasi wa siliva vikwi machumi pe chumi (1,000,000) ndi mkuŵa ndi visulo vyambura kupimika uzitu wake, chifukwa vinandi ukongwa; mathabwa ndi mya navyo ndanozga. Usazgiyeko kwaku yivi.

¹⁵ Wendi ŵanchitu ŵanandi: ŵakuswa mya, ŵakusema mya, ŵakupara mathabwa ndi ŵanthu wose ŵanchitu za manja ŵambura maŵerengeka,

¹⁶ ng'ombwa za milimu ya golide, siliva, mkuŵa, ndi visulo, soka uchitenge? Ambuya aŵe nawe.”

¹⁷ Davidi wangulanguliya so ŵarongozgi ŵa ŵaYisraele kumovya Solomoni mwana wake, wanguti,

¹⁸ “Kumbi Ambuya Chiuta winu we namwe cha? Kumbi kuti wampumuzgani cha kose-kose? Awonani wapereka ŵenicharu mu janja langu; ndipo charu chathereskeka pa maso pa Ambuya ndi ŵanthu ŵawo.

¹⁹ Sono khozgani mitima ndi umoyo winu kupenja Ambuya Chiuta winu. Sokani ndi muzenge nyumba ya kupaturika ya Ambuya Chiuta, mwakuti bokosi la phanganu la Ambuya ndi viyaŵi vyakupaturika vyaku Chiuta vitoleke mu nyumba yakuzengeke zina la Ambuya.”