1 Mikoka 21 - Tonga Bible 1986

Davidi waŵerenga ŵanthu, suzgu yiwiya ŵaYisraele

¹ Satana wangumikana ndi Yisraele, wangusosomo Davidi kuŵerenga Yisraele.

² Viyo Davidi wanguti kwaku Yoabu, ndi ku ŵakulangula nkhondo, “Rutani mukaŵerenge Yisraele kutuwa ku Beresheba mpaka kufika ku Dani, ndi mukazi ndi chiziŵisku mo mwaŵerenge, alinga kuti ndiziŵi unandi wawo.”

³ Kweni Yoabu wanguti, “Ambuya andaniskiyeko ŵanthu ŵawo ndi machumi pe chumi (100) nge ndimo ŵalili! Kweni mbuya wangu karonga, kumbi wose kuti mbateŵeti ŵa mbuyangu cha? Nchifukwa uli nanga mbuya wangu mukhumba chinthu ichi? Chifukwa nchine mutoleyenge kwananga paku Yisraele?”

⁴ Kweni mazu gha karonga ghangumuthereska Yoabu. Viyo Yoabu wanguruta ndi wangwenda mu Yisraele yose, ndi wanguwere ku Yerusalemu.

⁵ Ndipo Yoabu wangupereka kaŵerengedu ka unandi wa ŵanthu kwaku Davidi. Mu Yisraele yose mwenga vikwi-vikwi ndi vikwi machumi pe chumi (1,100,000) ŵanthu ŵakuwewepuwa malipanga, ndi mu Yuda vikwi machumi pe chumi ghanayi, pachanya vikwi machumi ghankhonde ndi ghaŵi (47,000) ŵakuwewepuwa malipanga.

⁶ Kweni kuti wangusazgako ŵaLevi ndi ŵaBenjamini cha mukuŵerenga uku, chifukwa mazu gha karonga ghenga ghaunyakazi kweku Yoabu.

⁷ Kweni ichi chingumukwiyiska Chiuta, ndi wangukoso Yisraele.

⁸ Ndipo Davidi wanguti kwaku Chiuta, “Ndalakwa ukongwa, chifukwa ndachita chinthu ichi, kweni sono ndimuŵeyani kuti mutuzgepo kwananga uku kwa mteŵeti winu, pakuti ndachita kwakupusa.”

⁹ Ndipo Ambuya angunena ndi Gadi, muwona waku Davidi, kuti,

¹⁰ “Ruta ukamunene Davidi kuti, ‘Ambuya atiti vinthu vitatu vyo ndipereka kwaku iwe; usankhe chimoza chaku vyo, mwakuti ndichichite kwaku iwe.’ ”

¹¹ Viyo Gadi wanguza kwaku Davidi ndi wanguti kwaku iyo, “Ambuya atiti, ‘To chenicho unkhumba.

¹² Pamwenga virimika vitatu vya chilala, pamwenga myezi yitatu kuparghang'ika paurongo pa ŵamawongo ŵako, ndipo penipo ŵamawongo ŵako ŵakukosonge ndi malipanga ghawo, pamwenga mazuŵa ghatatu gha lipanga la Ambuya, cho nchideru chakupopeska pa charu, ndi mungelo wa Ambuya wakuparghang'a mu charu chose cha ŵaYisraele.’ Sono ughanaghane ndi mazu uli gho ndi wezgiyenge kwaku yo wandituma.”

¹³ Ndipo Davidi wanguti kwaku Gadi, “Ndafyekeka ukongwa; ndiwe mu janja la Ambuya, chifukwa lisungu lawo ndikuru ukongwa; kweni kuwiya mu janja la munthu ndiko cha.”

¹⁴ Viyo Ambuya angutuma chideru pa ŵaYisraele; ndipo ŵaYisraele vikwi machumi ghankhonde ndi ghaŵi (70,000) ŵangufwa.

¹⁵ Chiuta wangutuma mungelo ku Yerusalemu kuwuparghang'a; kweni penipo wenga pafupi kuwuparghang'a Ambuya anguwona ndipo angugowoka pa uheni uwu; anguti ku mungelo wakuparghang'a, “Mbweno, gowozga janja lako sono.” Ndipo mungelo wa Ambuya wanguma pafupi pa mbuli waku Ornani mu Yebusi.

¹⁶ Davidi wanguyunuska maso ghake ndi wanguwona mungelo wa Ambuya wakuma pakati pa charu ndi machanya we ndi lipanga lakuwewepuka pachanya pa Yerusalemu, Viyo Davidi ndi ŵaraŵara ŵaku Yisraele ŵakuvwara vigudulu ŵanguwa kavunama.

¹⁷ Ndipo Davidi wanguti kwaku Chiuta, “Kumbi kuti ndine cha ndingulangula kuti ŵanthu ŵaŵerengeke? Ndalakwa ndine, ndipo ndachita uheni. Kweni mberere izi zachita chine? Ndimurombani Ambuya Chiuta wangu kuti janja linu limikani ndi ine ndi nyumba ya ada; kweni ŵanthu ŵareke kukomwa ndi nthenda ya chigodora.”

¹⁸ Viyo mungelo wa Ambuya wangunene Gadi kwachimunene Davidi kuti waruti wakaŵazenge jochero Ambuya pa mbuli waku Ornani muYebusi.

¹⁹ Viyo Davidi wanguti wavwa mazu gho Gadi wangumunene mu zina la Ambuya wanguruta.

²⁰ Ornani wapwanthanga trigu, ndipo wanguti wang'anamuka wanguwona mungelo, ŵana ŵake ŵanayi pamoza ndi iyo ŵangubisama.

²¹ Po Davidi wanguza kwaku Ornani, Ornani wangulereska ndi wanguwona Davidi, wangutuwa mu mbuli ndi wangumulambiya Davidi pakusindama chisku chake pasi.

²² Ndipo Davidi wanguti kwaku Ornani, “Ndipaske malo yagha gha mbuli kuti ndiŵazengeyepo jochero Ambuya, undipaske ndi undipimiye mtengo wake wakukwana, mwakuti nthenda ya chigodora yimale mu ŵanthu.”

²³ Ornani wanguti kwaku Davidi, “Toni malo gho, mbuya, karonga wangu, muchite cho nchakwenere kwaku imwe, ehe, nditukupaskani ng'ombe ya sembe yakocha, ndi vibulilu kuti viŵi nkhuni, ndi trigu kuŵa sembe ya ufwa. Nditumpaskani vyose.”

²⁴ Kweni karonga Davidi wanguti kwaku Ornani, “Awa, kweni nkhagulanga pa mtengo wakukwana; kuti nkhatoliyanga Ambuya cho nchako cha, pamwenga kupereka sembe yakocha yaku cho kuti ndagula cha.”

²⁵ Viyo Davidi wangulipa Ornani mashekelo gha golide gha mweso machumi pe chumi ghankhonde ndi limoza (600) chifukwa cha malo gho.

²⁶ Ndipo Davidi wanguŵazenge jochero penipa Ambuya, ndi wangupereka sembe zakocha, ndi sembe za chimangu, ndi kudana pa zina la Ambuya ndi angumwamuka ndi moto kutuwa kuchanya kusikiya pa jochero la sembe yakocha.

²⁷ Ambuya angulanguliya mungelo; ndipo wanguweleziyamo lipanga lake mu chibazi chake.

²⁸ Pa nyengo yiya Davidi wanguti wawona kuti Ambuya angumwamuka pa mbuli waku Ornani muYebusi wangupereka sembe penipa.

²⁹ Chifukwa chihema cho wanguchita Mosese mu bozwa ndi jochero la sembe yakocha vyenga mu malo gha pachanya mu nyengo yiya ku Gibeoni;

³⁰ kweni Davidi kuti wanguziŵa kuyako cha kwachifumba kwaku Chiuta chifukwa wawopanga lipanga la mungelo wa Ambuya.