1 Mikoka 16 - Tonga Bible 1986

¹ Ndipo ŵanguza nalo bokosi laku Chiuta, ndi ŵanguliŵika mu hema lo Davidi wangulijinthiya; ndipo wangupereka sembe yakocha, ndi sembe ya chimangu, paurongo paku Chiuta.

² Ndipo penipo Davidi wangumara kupereka sembe yakocha, ndi sembe ya Chimangu, wangutumbika ŵanthu mu zina la Ambuya,

³ ndi wangupaska viŵande ku ŵaYisraele wose, ŵanthurumi, ndi ŵanthukazi, kwaku we yose chiŵande chimoza, ndi thuŵi la nyama, ndi keki wa mphereska zakumira.

⁴ Ndipo so wangumika ŵanyake ŵa ŵaLevi nge mbateŵeti paurongo pa bokosi la Ambuya, kudanirizga, kuwonga, ndi kuthamika Ambuya Chiuta waku Yisraele.

⁵ Asafi wenga murongozgi, ndipo wachiŵi kwaku iyo wenga Zekariya, Yeieli, Shemiramoti, Yehieli, Matatiya, Eliabi, Benai, Obededomu, ndi Yeieli, wo ŵambanga ŵazeze, ndi ŵabangwe, Asafi wenga wakumba vimbumbuli,

⁶ ndi Benai ndi Yahaziele ŵazukuru ŵenga ŵakumba malipenga rutaruta, paurongo pa bokosi la phanganu laku Chiuta.

Sumu ya mathamiku

⁷ Viyo pa zuŵa leniliya Davidi wangulangula kuti sumu ya kuwonga yimbike kwa Ambuya ndi Asafi ndi ŵabali ŵake.

⁸ Wongani Ambuya, danani zina lake, wandiskani nchitu zake mukati mu ŵanthu!

⁹ Mumbiyeni, mumbiyeni, iyo marumbu, kambani ndi nchitu zake zose zakuziziswa.

¹⁰ Mujithamike mzina lake lituŵa; yikondwe mitima yaku wo ŵatumupenja!

¹¹ Penjani Ambuya ndi nthazi zake, penjani uŵapo wake rutaruta!

¹² Kumbukani nchitu zakuziziswa zo wachita, vyaminthondwe vyo wachita, ndi vyeruzgu vya mlomo wake,

¹³ mwa mphapu yaku Abrahamu, mteŵeti wake, mwa ŵana ŵaku Yakobe, mwakusankhika ŵake!

¹⁴ Iyo ndi Ambuya Chiuta widu; vyeruzgu vyake vye mu charu chose chapasi.

¹⁵ Wakumbuka phanganu lake mazuŵa ghose, ndi mazu gho wangulanguliya nthanga chikwi chimoza.

¹⁶ Phanganu lenilo wangupangana ndi Abrahamu ndi phanganu lake lo wangurapa kwaku Yisraele,

¹⁷ lenilo wangukhozga nge ndi dangu kwaku Yakobe, nge ndi phanganu la muyaya kwaku Yisraele.

¹⁸ Kuti, “Kwaku imwe ndipaskenge charu cha Kanani, nge nchigaŵa cha chihara chako.”

¹⁹ Penipo kuti ŵenga ŵanandi cha, ŵakuyuyuka, ndi ŵalendo mwaku cho.

²⁰ Ŵakuyinga kutuwa ku mtundu ndi mtundu, kutuwa ku ufumu umoza ndi kuya ku ŵanthu ŵanyake.

²¹ Kuti wanguzomerezga munthu cha kuŵasunjizga; wanguchenya ŵakaronga chifukwa chaku iwo,

²² kuti, “Mungaŵakwaskanga cha ŵakupakika ŵangu mungapwetekanga ŵamchimi ŵangu cha!”

²³ Mbiyani Ambuya, mwa charu chose! Taulani gha utaski wawo wa zuŵa ndi zuŵa.

²⁴ Wandiskani unkhankhu wake mukati mu mitundu nchitu zake zakuziziswa mu ŵanthu wose!

²⁵ Chifukwa mbakuru Ambuya ndi ŵatenere kuthamikika ukongwa, ndi ŵatenere kopeka kwakuruska ŵachiuta wose.

²⁶ Chifukwa ŵachiuta wose ŵa ŵanthu mbangoza; kweni Ambuya angulenga machanya.

²⁷ Unkhankhu ndi ulemu vye paurongo pawo; nthazi ndi chimwemwe vye mu malo ghawo.

²⁸ Perekani ku Ambuya mwa ŵana ŵa ŵanthu, Perekani ku Ambuya unkhankhu ndi nthazi!

²⁹ Perekani ku Ambuya unkhankhu wakwenere zina lake, toni sembe ndi zani nayo paurongo pake! Ŵalambiyeni Ambuya mu utozi wa utuwa wawo,

³⁰ Chinjenjemi paurongo pake, charu chose chapasi; inya charu chituma nganganga kuti chituzgikapo cha.

³¹ Machanya ghakondwe, ndi charu chapasi chisekere, ŵanene mukati mu mitundu kuti Ambuya ausa.

³² Nyanja yiwurumi ndi uzali wake, minda yisekere ndi vyose vya mwenimo.

³³ Penipo miti yikuru yimbenge ndi kukondwa paurongo pa Ambuya chifukwa atuza kweruzga charu.

³⁴ Wongani Ambuya chifukwa mbamampha, chifukwa ncha muyaya chifundu chawo!

³⁵ Munene so! “Titaskeni, A Chiuta mtaski widu, mutiwunjike ndi kutitaska ku ŵamitundu mwakuti tiwonge zina linu lituŵa, ndi kujithamiya mu unkhankhu winu.

³⁶ Ŵatumbikike Ambuya, Chiuta waku Yisraele, muyaya ndi muyaya!” Ndipo ŵanthu wose ŵanguti, “Ameni!” ndi ŵangutumbika Ambuya.

³⁷ Viyo Davidi wangusiya Asafi ndi ŵabali ŵake penipa paurongo pa bokosi la phanganu la Ambuya kuteŵeta pa bokosi rutaruta nge ndimo nchitu ya zuŵa ndi zuŵa yakhumbikwiyanga,

³⁸ ndi so Obededomu ndi ŵabali ŵake machumi ghankhonde ndi limoza pachanya ŵankhonde ndi ŵatatu (68) po Obededomu mwana waku Yedutani, ndi Hosa ŵenga ŵalinda likomo.

³⁹ Ndipo wangureka Zadoki mzukuru ndi ŵabali ŵake ŵazukuru paurongo pa hema lakuwunganamo la Ambuya mu malo gha pachanya ghenigho ghenga ku Gibeoni,

⁴⁰ kwachipereka sembe yakocha ku Ambuya pa jochero la sembe yakocha rutaruta, mlenji ndi mazulu, kwakuyana ndi vyose vyo vikulembeka mu dangu la Ambuya lo angulanguliya ŵaYisraele.

⁴¹ Pamoza nawo penga Hemani Yedutuni, ndi ŵanyake ŵaku wo ŵangusankhika ndi kuzumbulika mazina kuŵawonga Ambuya, chifukwa chifundu chawo ncha muyaya.

⁴² Hemani ndi Yedutuni ŵenga ndi malipenga ndi vidingindi vyakumbiya sumu ndi visulo vinyake vyakumbiya sumu zakupaturika, Ŵana ŵaku Yedutuni ŵangusankhikiya kuŵa ŵalinda ŵa likomo.

⁴³ Ndipo ŵanthu wose ŵanguruta we yose ku nyumba yake, Davidi nayo wanguwe kwachitumbika ŵamunyumba yake.