Yuanis 18 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Inakom si Yisus

¹ Nokopogdu'a yo po si Yisus soko iri, muripawo kai yo so sungoi-sungoi nu Kidrun, om mintorono kai yo so tonoman dii.

² Tontong iiri noilaan-o laid ni Yudas, iri mompomaid mongimpolanu mongoraai so si Yisus, so' obulit kai yo muimpug dii.

³ Nadi, lumogaa yo si Yudas maid nu somposukan soujar om tinu-tinu moongipat nu Waloi Maayo nu Kinoringan, iri sinuu' nu ongo wowaidon nu imam om lobuw Parisi ri. Naanid nosiro nu sindata om togu'.

⁴ Oilaan-o ni Yisus onu ourug so Iyo, indadi mobio yo sono Iyo so ongo lobuw-i om mutongaro yo nu, “Isai ka diumon muyu?” koo.

⁵ Sumombuto yo nosiro nu, “Modium kai so si Yisus, iri lobuw Najarit-i,” koo. Sumombuto yo Iyo nu, “Aku yo diumon muyu no,” koo. Mundii-dii ya si Yudas, mongoraai iiri so obi' nosiro ri.

⁶ Notangar-o po ni Yisus so nosiro nu, “Aku yo diumon muyu no,” koo, nokosunsurut sono nosiro om nokolunggang.

⁷ Mongoduato po si Yisus so nosiro nu, “Isai ka diumon muyu?” koo. Sumombuto yo nosiro nu, “Modium kai so si Yisus, lobuw Najarit-i,” koo.

⁸ Mutongaro yo Iyo nu, “Inobaran Ku yo iri kou nu Aku yo diumon muyu no. Bang Aku yo su diumon muyu, posimaidi muyu ya ongo lobuw maid-waid s'Aku no,” koo.

⁹ (Minutangar Iyo soko iri, tayon ong otuman tinangar Niyo nu gulu ri nu, “Oo Amo, ado ido oliong nu ongo lobuw nitaak Mu so Aku no,” koo ri.)

¹⁰ Pagka kibadung si Simun Pitrus, wintoso yo niyo uripon nu Imam Maayo ri, noutas tolingo wanan-i. Ngaran nu uripon iiri, si Malkus.

¹¹ Tongaro yo ni Yisus si Pitrus nu, “Sorungi badung mu no. Dai otoop ong dai koirasa Aku nu kosonsora'an notantu yo ni Amo s'Aku no,” koo.

Niapit si Yisus dii si Anas

¹² Okomo yo si Yisus nu ongo soujar nu Ruum, wowaidon nosiro ri, om moongipat bansa Yaudi, om kogosi yo nu rantai.

¹³ Owito yo Iyo nosiro mian dii si Anas. Si Anas-o po iwan ni Kayapas, Imam Maayo nu toun iiri.

¹⁴ Si Kayapas-o su minongobiat nu lobuw Yaudi ri nu, owarong po ido koyuwan matoi mongingolig nu bansa nosiro, ko' kiawi' bansa Yaudi oraag.

Inolim ni Pitrus si Yisus

¹⁵ Maido yo so si Yisus si Simun Pitrus om ido po mompomaid Niyo ri. Pagka otondu'an nu Imam Maayo ri ido mompomaid ni Yisus oono, maido yo iyo so si Yisus masuw so natad nu waloi nu Imam Maayo ri.

¹⁶ Si Pitrus minongindad-a so dilabus-i. Lumobuso yo sono ido mompomaid iiri mokimutangar-tangar nu woinoi moongipat nu pagar-i, om owito yo niyo si Pitrus masuw.

¹⁷ Nga sombato yo si Pitrus nu woinoi minongipat nu pagar iiri mongoduat nu, “Ikau po gaam mompomaid-a nu lobuw oono?” koo. Sumombuto yo si Pitrus nu, “Okon,” koo.

¹⁸ Iya oono osogit, indadi momurokito yo kouriponan om moongipat-i om mintorango yo nosiro. Mobio yo sono si Pitrus dii so nosiro sumimpor mintarang.

Dinuat si Yisus ni Anas

¹⁹ Mongoduato yo si Anas, iri baya' Imam Maayo ri, so si Yisus suat nu mompomaid Niyo om pontudukan Niyo ri.

²⁰ Sumombuto yo si Yisus nu, “Laid oono ri, obontol-a poomontuduk Ku so lobuw suang. Dadan Aku montuduk so waloi sosombooyangan om so natad nu Waloi Maayo nu Kinoringan so poomuimpugan nu lobuw Yaudi. Dai ya su insan posusut nu onu-onu ya pontudukan Ku.

²¹ Indadi, nokuro su Aku duaton mu? Duato ya lobuw nokorongou-o nu niongotuduk Ku ri. Tantu oondoman-a nosiro pinutangar Ku ri,” koo.

²² Notangar-o po ni Yisus soko iri, sompako yo Iyo nu ido moongipat dii ri om mutongaro yo nu, “Opogi ko sobana mutangar soko ono so Imam Maayo,” koo.

²³ Sumombuto yo si Yisus nu, “Bang mutangar Aku nu dai osuat, obari ya so lobuw iitu no ong onu tinangar Ku dai osuat oono. Nga bang bana ya pinutangar Ku no, nokuro su sompakon mu Aku?” koo.

²⁴ Pagka soko iri, opiti yo si Yisus ni Anas dii si Kayapas, Imam Maayo nu toun iiri, nga kakal po kikogos longon Niyo.

Inolim po ni Pitrus

²⁵ Kakal po mundii-dii si Simun Pitrus so obi' nu apui-i, duato yo sono iyo nu ongo lobuw-i nu, “Ikau bo gaam nga mompomaid-a nu lobuw oono,” koo. Nga mongolimo yo iyo nu, “Okon,” koo.

²⁶ Mutongaro yo ido uripon nu Imam Maayo ri, koronian-a nu lobuw winintos ni Pitrus tolingo ri nu, “Ikau-o bo gaam nosiou ku maid-waid so Iyo so tonoman iiri?” koo.

²⁷ Mongolimo po si Pitrus nu, “Okon,” koo. Notangar-o po niyo iri, mongingkukuuko sono su piu'.

Binisara' si Yisus ni Pilatus

²⁸ Osarap-sarap po, owito yo nosiro si Yisus kiat so waloi ni Kayapas mian so waloi ni Gobonor Pilatus. Nga dai ya minasuw ongo wowaidon nu Yaudi ri, so' mongowaid nu oturan nu ugama nosiro, bang masuw nosiro dii, osaiman nosiro, om dai sono kowasa maid mongokan nu iinokanon nu Rami-Rami Paska.

²⁹ Indadi, lumobuso yo si Pilatus sumamung so nosiro om duato yo niyo nu, “Onu ka kopongobisora'an muyu nu lobuw iitu?” koo.

³⁰ Sumombuto yo nosiro nu, “Dai mai ya owiton Iyo tuui so ikau ong d'ado kosola'an Niyo,” koo.

³¹ Mutongaro yo si Pilatus nu, “Olapo muyu yo Iyo om ukumo muyu ya mongowaid nu oturan nu ugama muyu,” koo. Nga sumombuto yo nosiro nu, “Mongowaid nu oturan nu Raja Maayo nu Ruum, dai kai kowasa mongukum nu lobuw nu potoyon,” koo.

³² (Iri yo ko' nourug soko iri tayon ong otuman tinangar ni Yisus suat so isai su momatoi so Iyo.)

³³ Mosuwo yo si Pilatus so waloi niyo ri om paawo yo niyo si Yisus mongoduat nu, “Ikau-o ka su raja nu lobuw Yaudi?” koo.

³⁴ Sumombuto yo si Yisus nu, “Onu ka duduat mu no, ungkiat so ikau kondiri ko' norongou mu ya so lobuw wokon?” koo.

³⁵ Mutongaro yo si Pilatus nu, “Okon ko lobuw Yaudi ong aku! Lobuw songinong bansa Mu no om ongo wowaidon nu imam-o yo su minongowit so Ikau tuui so aku. Onu ka kosola'an Mu?” koo.

³⁶ Sumombuto yo si Yisus nu, “Pogkuosaan Ku no okon ko suat so wonuo tu. Bang suat so wonuo tu, tantu lumawan mompomaid Ku no dai moingin nu nikomouli' Aku so wowaidon nu Yaudi. Nga pogkuosaan Ku no okon ko suat so wonuo tu,” koo.

³⁷ Duato po Iyo ni Pilatus nu, “Bang soko ono, bana ka nu raja Ko?” koo. Sumombuto yo si Yisus nu, “Ikau-o su minutangar nu Aku yo su raja. Nopuanak Aku om nokologa' so wonuo tu nga ido-ido ya tomod Ku, ono yo pointolang nu onu ya obana. Isai moingin maid so onu ya obana, mongkinongou iyo nu tongaron Ku no,” koo.

³⁸ Mongoduato po si Pilatus so Iyo nu, “Onu ka orati nu obana no?” koo. Lumobuso po si Pilatus om tongaro yo niyo ongo wowaidon nu Yaudi ri nu, “D'ado ya onu-onu noimpa'an ku kosola'an Niyo.

Inukuman si Yisus nu potoyon

³⁹ Nga mongowaid nu koopotan muyu, ono yo su kododanan, polabus aku nu lobuw ungkiat so jiil iya nu Paska. Moingin kou ka ong nilabus ku pinokoRaja nu lobuw Yaudi iitu no?” koo.

⁴⁰ Gumonsoko yo nosiro sumambut nu, “Kodi ya lobusi Iyo! Dai kai moingin! Si Barabas-o su lobusi!” koo. (Si Barabas oono moonolod.)