Yuanis 11 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Kinopotoyan ni Lajarus

¹ Kuwai ido koyuwan, ngaran niyo si Lajarus, minolak so Bitania maid nu sulod niyo si Maria om si Marta.

² Si Maria yo su nopotuad nu inosak lanung so akod ni Yisus, om piniid nu obuk niyo ri. Minorosakit sono si Lajarus.

³ Mongodawo yo kiduo sulod niyo ri, niloga' dii si Yisus nu, “Oo Tuhan, morosakit una'-una' kosomodan Mu ri,” koo.

⁴ Norongou-o po Niyo abar iiri, mutongaro yo Iyo nu, “Dai ya kopatoi so iyo osakit oono, nga tomod-o po nu ono pobantug nu Kinoringan, om Aku, Anak Niyo nga kobantug-a,” koo.

⁵ Pudi pona kosomodan Niyo si Marta, si Maria om si Lajarus,

⁶ nga norongou-o po Niyo nu morosakit si Lajarus, tinomod-a Niyo mintoron po koduaan so pinolakan Niyo ri.

⁷ Nokotalib koduaan, tongaro yo Niyo mompomaid Niyo ri nu, “Mululi' toko yo so Yudia,” koo.

⁸ Sumombuto yo nosiro nu, “Oo Guru, owagu po boto iri padu ko pilayon om potoyon nu wowaidon nu lobuw Yaudi ri. Nokuro su mokipupululi' Ko po dii?” koo nosiro.

⁹ Sumombuto yo si Yisus nu, “Okon ka ko opulu om duo jinaaman laid onawau nu sondunat-o? Lobuw mompanou nu onawau-o po tantu dai kosadu, so' otogu' nu onawau.

¹⁰ Nga lobuw mompanou so otuong, tantu kosadu, so' d'ado onawau nai so iyo,” koo.

¹¹ Soko ono yo tinangar Niyo pokoilo nu dai ya nosiro oinsaadan so Yudia. Om mutongaro po Iyo so nosiro nu, “Nokoturuw-o sulod toko ri, si Lajarus, nga mian Aku ya mongorios so iyo,” koo.

¹² Mutongaro yo mompomaid Niyo ri nu, “Oo Guru, bang moturuw-a si Lajarus, tantu umatu' ya iyo,” koo.

¹³ Orati nu tangar ni Yisus iiri, minatoi-o si Lajarus, nga ontaman nosiro ong bana nu moturuw-a iyo.

¹⁴ Pagka soko iri, bontolo yo Niyo paabar so nosiro nu, “Minatoi-o si Lajarus.

¹⁵ Nga suat so koworongan muyu, mongunsopot Aku nu d'ado Aku dii nu iya oono su' poimaid kou. Mian toko yo dii si Lajarus,” koo.

¹⁶ Mutongaro yo si Tumas, iri ingoranan so si Apid, so kouna'an niyo ri nu, “Maid toko yo, su' kowaid toko so Iyo matoi,” koo.

Moongoluli' om Monaak nu Kowiawan

¹⁷ Lumogaa si Yisus om mompomaid Niyo ri su koopatan-o kinolobongan so si Lajarus.

¹⁸ Koorawu' nu Bitania kiat so bandar Yirusalim kiro-kiro opat kilumitor.

¹⁹ Indadi osuang-a sono lobuw Yaudi kiat dii minongondaa so si Marta om si Maria monginsosamod suat so kinopotoyan nu sulod nosiro ri.

²⁰ Norongou-o po ni Marta nu nokologa' si Yisus, sumomungo yo iyo. Si Maria minogol-a so waloi.

²¹ Tongaro yo ni Marta si Yisus nu, “Oo Tuhan, bang tuui-tuui Ko nu laid oono ri, dai ya matoi sulod ku ri.

²² Soko ono pona, oilaan ku nu onu-onu ya indomoon Mu so Kinoringan, tumbaidon Ko ya nu ono sono tu,” koo.

²³ Sumombuto yo Iyo so si Marta nu, “Oluli'an-a bo ono sulod mu no,” koo.

²⁴ Mutongaro yo si Marta nu, “Oilaan ku ya nai' nu oluli'an-a iyo ong pongoluli'an-o nu lobuw minatoi so pongoowi'an nu wonuo tu,” koo.

²⁵ Mutongaro yo si Yisus nu, “Aku yo su poluli' nu lobuw minatoi om monaak nu kowiawan. Isai poimaid so Aku, miau iyo pudi minatoi-o.

²⁶ Om lobuw miau-o po ong poimaid so Aku, dai yo matoi musingkolaid. Poimaid ko ka nu tangar Ku oono?” koo.

²⁷ Sumombuto yo si Marta nu, “Oo Tuhan, poimaid aku ya nu Ikau-o su Anak nu Kinoringan, om Ikau-o su Raja Nijanji nu Kinoringan linumoga' so wonuo tu,” koo.

Tinumangi' si Yisus

²⁸ Nokoputangar-o po si Marta soko iri, miano yo iyo pokoilo so si Maria binurung nu, “Nokologa' yo guru toko ri, nipopaau ko Niyo,” koo.

²⁹ Norongou-o po iri ni Maria, mogtuui miano iyo sumambat so si Yisus.

³⁰ (Iya oono kakal po si Yisus so tontong kinopusomungan nosiro si Marta, dai po nokologa' so kampung oono.)

³¹ Nosiou-a nu ongo lobuw Yaudi minonginsosamod so si Maria nu olangkas iyo lumabus kiat so waloi-i, suuto yo sono iyo nosiro, so' ontaman nosiro ong mian so lobong tumangi' moupus.

³² Nokologa' yo po si Maria so pinolakan ni Yisus, sumurukudo yo iyo so tiningkuangon ni Yisus om mutongaro yo nu, “Oo Guru, bang tuui-tuui Ko nu iya iiri, miau po sulod ku ri nu kosiono tu,” koo.

³³ Nosiou-o po ni Yisus nu tumangi' si Maria om lobuw minonundan so iyo ri, umurado yo sono inawo Niyo ri.

³⁴ Duato yo Niyo nosiro nu, “Siombo ka pinolobongan muyu so iyo?” koo. Sumombuto yo nosiro nu, “Kayo toko yo monsiou,” koo.

³⁵ Tumongio yo si Yisus.

³⁶ Mutongaro yo ongo lobuw-i nu, “Siowi toko yo bo, osamod sobana pala Iyo so si Lajarus,” koo.

³⁷ Nga kuwai ya so nosiro minutangar nu, “Kopomali' Iyo nu lobuw bolou, nga dai ya gaam nopogos Niyo si Lajarus dai popatoi,” koo.

Linuli'an si Lajarus

³⁸ Minurad po inawo ni Yisus, om miano yo sono so lobong-i. Lobong iiri bulud nu watu, kinuringib monguang om tinutuban nu watu maayo. Mutongaro yo Iyo so nosiro nu,

³⁹ “Lungkibo muyu watu no,” koo. Nga sumombuto yo si Marta, sulod nu lobuw minatoi iiri nu, “Oo Guru, koopatan-o kinolobongan nu ono, tantu owutong-o,” koo.

⁴⁰ Sumombuto yo Iyo so si Marta nu, “Okon ka ko notangar Ku yo iri so ikau nu, bang poimaid ko, kosiou ko ya nu kobontugan nu Kinoringan?” koo.

⁴¹ Lungkibo yo nosiro watu ri. Tumingaa'o yo si Yisus so langit om mutongaro yo nu, “Oo Amo, munsopot Aku so Ikau, so' rinongou Mu ya Aku.

⁴² Oilaan Ku nu rongowon Mu ya Aku dadan. Nga tongaron Ku itu suat so lobuw iitu tayon Ku ong poimaid nosiro nu Ikau-o su minonuu' so Aku,” koo.

⁴³ Nopupus po si Yisus mutangar soko iri, momaawo yo Iyo nu, “Oo Lajarus, labus-o!” koo.

⁴⁴ Lumobuso yo lobuw minatoi iiri, nga kakal po nosolui akod longon niyo ri nu koukuputi om buatan-i, nga kisosayut po nu soputangan. Tongaro yo ni Yisus ongo lobuw-i nu, “Uyadi muyu yo iyo om poponowon-a,” koo.

Upakat momatoi so si Yisus

⁴⁵ Osuang lobuw Yaudi, iri minongondaa so no Maria, nopoimaid so si Yisus nu nokosiou nu winaal Niyo iiri.

⁴⁶ Nga kuwai ya tinu-tinu so nosiro minian so lobuw Parisi ri pokoilo nu winaal ni Yisus.

⁴⁷ Pagka soko iri, muimpugo yo lobuw Parisi om wowaidon nu imam-i muupakat maid nu lobuw so Poongobisora'an nu Ugama ri nu, “Onu gaam opatut waalon toko? Siowi muyu, osuang-o koiran-iran winaal nu lobuw iitu.

⁴⁸ Bang posimaidan toko ya Iyo, olaid-o po osuang-o sono lobuw poimaid so Iyo. Koompusan, lumoga' sono momogkuasa nu Ruum mongoraag nu Waloi Maayo nu Kinoringan tu om kiawi' bansa toko!” koo.

⁴⁹ Mutongaro yo ido koyuwan kiat so nosiro, ingoranan so si Kayapas, Imam Maayo nu toun iiri nu, “Ado oilo-ilaan muyu.

⁵⁰ Dai muyu oilaan nu owarong po ido koyuwan matoi mongingolig nu bansa toko, ko' kiawi' bansa toko oraag,” koo.

⁵¹ Sobana yo tinangar niyo iiri okon ko ungkiat so pikiran niyo, nga pagka iyo yo su Imam Maayo nu toun iiri, tinaakan iyo nu Kinoringan nu pongoilaan nu si Yisus-o su matoi suat so lobuw Yaudi.

⁵² Om okon ko so lobuw Yaudi ya su kopotoyan Niyo, nga popuido po nu ongo lobuw songapan nu Kinoringan nokoias nu pinolakan.

⁵³ Kiat-o nu runat iiri, tumimpuuno sono muupakat ongo wowaidon nu lobuw Yaudi momatoi so si Yisus.

⁵⁴ Pagka soko iri, dai yo sono moingin si Yisus mintolang so ongo lobuw Yaudi. Mulaiwo yo Iyo kiat so Yudia om miano yo so bandar Ipraim orani so padang pantai. Molako yo Iyo om mompomaid Niyo ri dii.

⁵⁵ Iya oono oduruk-o Rami-Rami Paska nu lobuw Yaudi. Osuang-o lobuw ungkiat so ongo kampung minian so Yirusalim mongowaid nu oturan nu odu aki nosiro, musingugas nu dai po ologa' rami-rami maayo oono.

⁵⁶ Minodium sono nosiro so si Yisus, om noimpug-o po nosiro so Waloi Maayo nu Kinoringan-i, mududuato yo nosiro nu, “Onu ka pikiran muyu? Koian-a ka Iyo so rami-rami tu?” koo.

⁵⁷ Minutangar nosiro soko iri so' nokoputangar-o wowaidon nu imam om lobuw Parisi ri nu, isai-isai kosiou so si Yisus intawa koilo nu pinolakan Niyo, subai niabar su' aakom Iyo.