Pontudukan 8 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Mingat-ingat nu lobuw monulak nu koilaan

¹ Rongowon-o! Soko maau-paau koilaan-o. Rongowon-o! Soko maau-paau pongoorotian-o.

² Soko mundii-dii iyo so timpak nu bulud om so isan om simpang nu lalan.

³ Soko momaau iyo so pintu nu lalan masuw so bandar nu,

⁴ “Oo su ongo lobuw, mindamo aku so kou, rongowo muyu yo aku. Momaau aku nu kiawi' lobuw so wonuo tu. Ingati muyu yo pomaawan ku tu!

⁵ Sobana ko ado po oilo-ilaan muyu. Posimaidi muyu yo aku monaak nu oilo-ilaan so kou. Oo su lobuw olowong po, posimaidi muyu yo aku monaak nu pongoorotian so kou.

⁶ Rongowon-o totongaron ku, so' ongo wowarong om musuat kiawi' pontudukan ku so kou.

⁷ Onu yo po tongaron ku obana, om bisigon ku kiawi' dai obana.

⁸ Onu yo po totongaron ku otulid, d'ado ido muulot-ulot intawa kosompirang.

⁹ Oruoi oorotian totongaron ku so lobuw kipongoorotian om so lobuw mokituduk.

¹⁰ Pilio yo pontudukan ku tu kaalib po ko' pirok bana, om poogoto yo pongoilaan-o kaalib po ko' omas luun-luun.

¹¹ Boorogo po pongoilaan-o ko' poromata, om onu yo po koinginan mu dai koinong nu ono.

¹² Aku yo su koilaan om mogol aku maid nu koo'ilo mugogoma'on owarong suat so onu yo po. Pongoilaan-o yo po songapan ku om oilo aku popupinig onu su owarong om oraai.

¹³ Lobuw mongorumat nu TUHAN, mongobisig nu koraayan. Ono yo ko' bisigon ku kogoyaan nu lobuw musingkaayo-ayo om musingkaaku-aku, om bisigon ku po kogoyaan oraai om totongaron mongaakal.

¹⁴ Pongobiatan owarong om koilaan-o songapan ku, pongoorotian om kobosagan-o nga songapan ku ya.

¹⁵ Tuudon ku ongo raja mogkuasa, om tobangon ku wowaidon su' musuat ongo ukum waalon nosiro no.

¹⁶ Kiat so ponobangon ku, osuat sono poomogkuasa nu wowaidon, om solusuk nu raja nga ooluk gogoma'on.

¹⁷ Somodan ku lobuw osamod so aku, om lobuw modium so aku nga kooyang so aku.

¹⁸ Kokoyaan, koorumatan om koolukan nga songapan ku. Kiawi' oono kotaak ku so kou.

¹⁹ Onu yo po aalap mu kiat so aku, owarong po ko' omas luun-luun om boorogo po ko' pirok.

²⁰ Maid aku so lalan obana om sumundur so lalan ooluk.

²¹ Iri lobuw osamod s'aku, kopusaka nu kokoyaan kiat so aku.

²² Aku yo su togna winaal nu TUHAN nu dai po nowangun Niyo onu yo po so wonuo tu.

²³ Aku yo su inurug Niyo togna nu dai po nowaal wonuo tu.

²⁴ Nourug aku yo nu dai po nowaal su raat, om towud nu sungoi.

²⁵ Nourug aku yo nu d'ado po kobubuludan,

²⁶ dai po nowaal nu TUHAN kotona'an om ongo umo, om d'ado po songanggom tana'.

²⁷ Dii aku ya nu momaal om poputondiang TUHAN nu langit om raat.

²⁸ Dii aku ya nu popolak Iyo nu kawut so dilanggau, om monukab nu puun nu sungoi so raat.

²⁹ Dii aku ya nu pinomaalan Niyo nu puontoban nu raat nu dai potolibon. Dii aku ya nu pinomaalan Niyo nu pinopolakan nu wonuo tu.

³⁰ Mobi'-obi' aku so Iyo nu iya oono, om aku yo su kosonangan Niyo runat-runat. Dadan sumudu'an aku so tiningkuangon Niyo.

³¹ Osudu'an aku sobana nu wonuo om lobuw inurug Niyo.

³² Oo su lobuw omuda po, rongowo muyu yo aku! Waido muyu yo nituduk ku so kou, so' osanang ong lobuw mongowaid nu pontudukan ku no.

³³ Rongowo muyu yo niongotuduk ku su' oilo kou, om kodi muyu yo lupai.

³⁴ Osanang-o lobuw mongkinongou so aku, iri runat-runat mongimat so pintu nu waloi ku ri.

³⁵ Isai yo po kooyang s'aku, kaalap nu kowiawan om kosonangan iyo nu TUHAN.

³⁶ Nga lobuw dai maid s'aku, kopusaad kondiri, so' isai obisig s'aku, muinong-a nu musimpatoi iyo,” koo koilaan-o.