Pinongurugan 47 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Sinumambat si Yakub nu Raja Masir

¹ Noopod iri, owito yo ni Yusup limo kosusulodan niyo ri sumambat nu raja. Tongaro yo sono ni Yusup raja ri nu, “Nokologa' yo amo om kosusulodan ku kiat so Kanaan maid nu baanan nu dumba om sapi om kiawi' songapan nosiro. Dii-dii nosiro so Gusin,” koo.

² Potonduo yo niyo so raja oono kosusulodan niyo ri.

³ Duato yo sono nosiro nu raja ri nu, “Onu ka gogoma'on kinoopotan muyu?” koo. Sumombuto yo nosiro nu, “Kai yo po moongipat nu dumba, soko iri ya porookian mai ri.

⁴ Tomod mai yo po lumoga' nga molak tuui, so' osokakan sobana likop so Kanaan, om d'ado yo rikut okanon nu baanan nu dumba mai. Indadi, mokilila' kai maam so ikau nu molak kai so Gusin,” koo.

⁵ Mutongaro yo sono raja ri so si Yusup nu, “Kosiono, nokologa' yo amo om kosusulodan mu no tuui,

⁶ om tana' nu Masir tu songapan muyu ya. Pototogon-o nosiro molak so Gusin, iri tana' owarong sobana tuui. Isai opintar so nosiro mongipat nu pongayam, iyo yo su popongipaton nu pongayam ku,” koo.

⁷ Posombato yo sono ni Yusup so raja ri si Yakub, om borokati yo ni Yakub raja ri.

⁸ Duato yo nu raja ri si Yakub nu, “Komuro yo ka umur mu?” koo.

⁹ Sumombuto yo si Yakub nu, “Maatus-o tolu nopulu toun umur ku mogilolongkop mompanou. Nga umur ku oono oipak om sobana ko osonsara' aku ong popuinongon-o nu kootogui nu kotutuaan ku ri,” koo.

¹⁰ Noopod iri, borokati yo ni Yakub raja ri om momponowo yo sono iyo.

¹¹ Tobango yo ni Yusup amo om kosusulodan niyo ri momolak-polak so Masir, om taaki yo niyo nosiro nu tana' nu sobana ko owarong nu osongapan nosiro so obi' nu bandar Ramisis, mongowaid nu pinonuu'an nu raja ri.

¹² Taaki yo ni Yusup nu ingkookan amo niyo ri, kosusulodan om suku-sakat niyo wokon maid nu inonakan nosiro ri.

Likop

¹³ Sobana ko osokakan-o sono su likop, so' siombo-ombo nga d'ado yo okanon. Ongo lobuw nu Masir om Kanaan nga olunggui-o witilon.

¹⁴ Koduung momoli yo nosiro nu paroi, impugon-o ni Yusup orogo ri om niapit niyo so waloi nu raja ri.

¹⁵ Noongoowi'an-o po nu siin ongo lobuw so Masir om so Kanaan, lumogaa yo sono nosiro dii si Yusup om mutongaro yo nu, “Taaki kai yo nu ingkookan! Kodi kai yo posimaidi matoi. Naawi' yo siin mai,” koo.

¹⁶ Sumombuto yo si Yusup nu, “Bang noowi'an kou yo nu siin, borayi muyu yo pongayam muyu no om taakan ku nai' kou nu ingkookan,” koo.

¹⁷ Owito yo sono nosiro pongayam nosiro ri dii so si Yusup, om taaki yo niyo nosiro nu ingkookan pinongoganti' nu kuda, dumba, kambing, sapi om koladai. Toun iiri, tinaakan-o ni Yusup nosiro nu ingkookan binorayan nosiro nu pongayam.

¹⁸ Toun koimbagu ri, mululio yo nosiro dii so si Yusup om mutongaro yo nu, “Bontolon mai ya so ikau nu, naawi' yo siin om pongayam mai ri nga nosongapan mu yo. D'ado yo sono pongobarai mai sondiang ko' kai kondiri om tana' mai.

¹⁹ Nga kodi kai yo posimaidi matoi! Kodi yo posimaidi gumowuton umo mai. Wolio kai yo om tana' mai no nu paroi. Mokisongapan kai yo om tana' mai no so raja. Taaki kai yo nu paroi kowiwiau mai om sampug nipulo so umo mai no!” koo.

²⁰ Wolio yo sono ni Yusup kiawi' tana' so Masir oono nu osongapan nu raja. Om d'ado yo pouyungan nu ongo lobuw nu Masir dai powoli nu tana' nosiro so' osokakan sobana likop oono. Indadi, kiawi' tana' so Masir nosongapan sono nu raja.

²¹ Urugo yo sono ni Yusup nu uripon ongo lobuw so pilolongkop nu Masir.

²² Iri po tana' songapan nu ongo imam-i su dai winoli ni Yusup. Dai muru' nosiro powoli nu tana' so' gojian-a nosiro nu raja pomoli nu ingkookan.

²³ Tongaro yo ni Yusup ongo lobuw oono nu, “Kosiono, nowoli ku yo kou om tana' muyu nu osongapan nu raja. Olapo muyu yo sampug tu om puloi muyu yo so umo muyu.

²⁴ Ologa' yo pomoroyan, taaki muyu sono so raja no sombaagi' limo nu pinumpung nu paroi muyu no. Lobian-o sono sompugon muyu om ingkookan muyu sompuanak sawo,” koo.

²⁵ Sumombuto yo nosiro nu, “Munsopot kai so ikau nu owarong ko so kai om minomiau so kai. Pagka soko ono, uripon kai yo sono nu raja,” koo.

²⁶ Indadi, urugo yo sono iri ni Yusup nu ido oturan wagu so Masir, nu sombaagi' limo nu pinumpung nu paroi subai itaak so raja. Om kosiono tu kakal-a waidon oturan oono so Masir. Iri po tana' nu imam-i su dai osongapan nu raja.

Inindamo pongoowi'an ni Yakub

²⁷ Iri yo po lobuw Israil tinumotog molak so Masir dii so Gusin, okaya sono om osuang inonakan.

²⁸ Opulu po om turu toun laid ni Yakub molak so Masir om nologa' yo umur niyo maatus opat nopulu om turu toun.

²⁹ Iya nu mokipopatoi-o si Yakub, paawo yo niyo si Yusup, anak niyo ri om tongaro yo nu, “Topopi yo palad mu no so puun nu paa ku tu pongilaan nu waalon mu ya indomoon ku tu, nu dai mu ya aku ilobong so Masir tu,

³⁰ so' moingin aku nu ilobong so pinolobongan nu porookian ku ri. Indadi, owito yo bangkai ku kiat tuui om lobongi yo so pinolobongan so nosiro ri,” koo. Sumombuto yo si Yusup nu, “Waalon ku ya onu yo po tinangar mu no,” koo.

³¹ Mutongaro po si Yakub nu, “Pujanji yo nu waalon mu ya ono,” koo. Mongojonjio yo sono si Yusup, om mongunsopoto yo si Yakub so poomoturuwan niyo ri.