Pinongurugan 46 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Minurongkat si Yakub om inonakan niyo ri so Masir

¹ Timos-timoso yo sono ni Yakub gonggamon niyo ri om mungkoyaso yo. Nokologa' so Birsiiba, mongusaa'o yo iyo nu Kinoringan, iri usaa'on ni Isak, amo niyo ri.

² Awi ri, mintolango yo Kinoringan so iyo, om mutongaro yo nu, “Oo Yakub!” koo. “Onu nu iri?” koo sambut ni Yakub.

³ “Aku yo su Kinoringan, iri usaa'on ni apa mu. Ikod-o kilaa' mian so Masir. Posuangon Ku sobana solusuk mu dii.

⁴ Tundanon Ku ya ikau mian so Masir, om popululi'on Ku ya koimbagu tuui solusuk mu, om mobi'-obi' ya si Yusup so ikau iya nu matoi ko,” koo.

⁵ Sokoyi yo sono iyo nu inonakan niyo ri maid nu anak sawo nosiro so korita kuda nipoowit nu raja Masir so nosiro ri, om murongkato yo nosiro kiat so Birsiiba.

⁶ Pongayam om kiawi' gonggamon naalap nosiro so Kanaan nga inowit-a nosiro so Masir. Inowit-a ni Yakub kiawi' solusuk niyo,

⁷ iri komongkupuan niyo, woinoi kusoi.

⁸ Itu yo su suku-sakat ni Yakub nokowaid so Masir:

⁹ Si Rubin anak ongko niyo om inonakan kusoi ni Rubin, ono yo si Inok, Palu, Ijrun om si Karmi.

¹⁰ Si Simiun, om inonakan niyo kusoi, ono yo si Imuil, Yamin, Uhad, Yakin, Johar om si Saaul, anak so sawo niyo woinoi nu Kanaan.

¹¹ Si Liwi, om inonakan niyo kusoi, ono yo si Girsun, Kiat om si Mirari.

¹² Si Yahuda, om inonakan niyo kusoi, ono yo si Siila, Piris om si Jira, nga iri inonakan ni Yahuda wokon, si Iir om si Unan minatoi so Kanaan. Om inonakan-o po ni Piris, si Ijrun om si Amul.

¹³ Si Isakar om inonakan niyo kusoi, ono yo si Tula, Pua, Asiub om si Simrun.

¹⁴ Si Jibulun om inonakan niyo kusoi, ono yo si Sirid, Ilun om si Yaliil.

¹⁵ Nosiro oono inonakan ni Lia om ni Yakub nu laid nosiro molak-polak so Misuputamia. Sondiang ko ono, kianak po iyo nu woinoi ingoranan so si Dina. Indadi solusuk ni Yakub so sawo niyo si Lia, tolu nopulu om tolu sampuw.

¹⁶ Si Gad, om inonakan niyo kusoi, ono yo si Jipiun, Agi, Suni, Ijbun, Iri, Arudi om si Arili.

¹⁷ Si Asir, om inonakan niyo kusoi, ono yo si Imna, Iswa, Iswi om si Boria. Kisulod nosiro nu woinoi, ingoranan so si Siira. Inonakan kusoi ni Boria, si Iibir om si Malkiil.

¹⁸ Opulu om onom lobuw oono yo solusuk ni Yakub so si Jilpa, uripon woinoi nitaak ni Laban so si Lia, anak woinoi niyo ri.

¹⁹ Si Rahil-o po, iri sawo ni Yakub, duo yo anak, ono yo si Yusup om si Binyamin.

²⁰ Inonakan-o po ni Yusup nu laid niyo so Masir, ono yo si Manasi om si Ipraim, anak niyo so si Asnat, anak ni Putipira, imam so Iliupulis.

²¹ Inonakan-o po ni Binyamin kusoi, ono yo si Bila, Bikir, Asibol, Gira, Naaman, Ihi, Ros, Mupim, Upim om si Arid.

²² Opulu om opat lobuw oono yo solusuk ni Yakub so sawo niyo, si Rahil.

²³ Si Dan om anak niyo kusoi, si Usim.

²⁴ Si Naptali om inonakan niyo kusoi, ono yo si Yajiil, Guni, Iijir om si Silim.

²⁵ Kituru-turu nu lobuw oono solusuk ni Yakub so si Bilha, uripon woinoi ni Rahil, nitaak ni Laban so iyo ri.

²⁶ Koosuang nu solusuk ni Yakub minian so Masir, onom nopulu om onom, dai koiap nokotakin so iyo ri.

²⁷ Inonakan-o po ni Yusup nopuanak so Masir duo koyuwan. Indadi suku-sakat ni Yakub nokologa' so Masir, turu nopulu sampuw.

Si Yakub om Inonakan niyo so Masir

²⁸ Popoguluo ya ni Yakub si Yahuda mompanou pokoilo so si Yusup nu posombaton so iyo so Gusin. Nokologa' yo po nosiro so Gusin,

²⁹ sumokoyo yo si Yusup so korita kuda niyo ri mian sumambat nu amo niyo ri. Nokopusambat-o po nosiro, koromi yo ni Yusup amo niyo ri om olaid iyo tumangi'.

³⁰ Mutongaro yo sono si Yakub so si Yusup nu, “Pagka nosambat ku yo ikau om noilaan ku nu miau ko po, dai aku yo sono maagut pudi matoi aku,” koo.

³¹ Tongaro yo ni Yusup kosusulodan niyo om suku-sakat niyo wokon-i nu, “Mian aku po pokoilo nu raja ri nu nokologa' yo kosusulodan om suku-sakat ku wokon kiat so Kanaan.

³² Obaran ku iyo nu gogoma'on muyu yo po moongipat nu dumba om sapi, om noowit muyu yo pongayam om kiawi' songapan muyu.

³³ Bang soginaan kou niyo om duaton kou ong onu gogoma'on muyu,

³⁴ tongaro muyu ya nu gogoma'on muyu yo po kiat koworos moongipat nu pongayam, soko iri porookian muyu gulu ri. Bang soko ono tongaron muyu, popolakon kou sono niyo so Gusin,” koo. Tinangar ni Yusup soko iri so' lobuw-o po nu Masir dai mokimuido nu moongipat nu pongayam.